Uno encicloupedìo pèr lis Aupiho

L’an passa 2009, l’assouciacioun Les Alpes de Lumière a espeli, souto li numerò 160 e 161 de sa revisto, après Luro e Ventour, sa tresenco encicloupedìo toucant li mountagno prouvençalo. S’agis, aqueste cop, dis Aupiho, realisado, souto la beilié, estènt coutrìo, de l’istourian e arqueoulogue Guis Barruol e de Nerto Dautier, istouriano d’art, emé l’ajudo de setanto coulabouraire. La resulto n’es di chanudo, em’ un oubrage agradiéu, coumplèt e bèn ilustra.

Uno mountagno de 6 milioun d’annado

Dins ùni 300 article, tout i’es espepidouna. Lou mitan naturau proumié es abourda, emé la geoulougìo, li païsage, lou climat, l’aigo, la floro, li bèstio. Sauprés ansin coume la mountagno trouvè sa formo de vuei, i’a 6 milioun d’annado. Sauprés l’impourtanço de l’aigo e tout ço que fuguè fa pèr la mestreja e la richesso de la bioudiversita, em’ uno vinteno d’espèci proutegido, coume lou capoun-fèr (vautour percnoptère) o la magicienne dentelée, uno bèstio de la famiho di sautarello, un carnivore mai terrible encaro que lou prego-diéu.

Vènon pièi li ressourso e l’endustrìo, chapitre qu’eisamino li peiriero di Baus, de Sant-Roumié, de Font- Vièio, la baussito, que fuguè descuberto proche Li Baus, vilage que ié dounè soun noum, la séuvo, l’agriculturo, l’elevage, li moulin d’auro e d’òli. Vigno e óulivié douminon. I’aguè, dins lou tèms, lou celèbre cardoun utilisa pèr grata la lano, après lou teissage. L’elevage es proumié la móutounaio, i’a pièi li biòu pèr la bouvino e li cabro, emé l’assai di cabro dóu Rove. Aleva di sabliero de Senas, lis endustrìo soun subre-tout de PME toucant de doumaine divers (teissut, papié, chimìo, agroualimentàri). Soun bèn couneigu Souleïado, Les Olivades, li counservo Jan Martin, la counfissarié Lilamand, l’òli de la Valèio di Baus…Lou tourisme, pièi, fai un article bèn desvouloupa qu’espauso tóuti li rode atiraire e pauso la questioun de sa plaço dins lou païs.

L’Ome dempièi 100.000 an

L’Istòri, di proumiés abitant, en passant pèr l’Antiqueta, enjusquo vuei, fai encaro un chapitre impourtant. Lou temouniage lou mai ancian de presènci umano dato de 100.000 an (ome de Neandertal). Li temouniage dóu neouliti mancon pas (i’a meme uno baumo pintado proche Sant-Roumié) e tóuti lis epoco soun bèn representado : ipougèu di Mount de Cordo, oupidon, necroupòli, mounumen e soubro de l’Antiqueta roumano, l’arrivado dóu crestianisme, l’Age-Mejan, la famiho di Baus, li Jusiòu de Sant- Roumié, la guerro e l’acioun de Jan Moulin. L’article sus la lengo prouvençalo dis Aupiho (roudanen, mai Eiguiero es pulèu maritime) e soun estamen de vuei es de Glaude Martel e lou sus la toupounimìo de Jan-Glaude Bouvier.

L’architèituro, glèiso e capello, castèu, tourre e fourtaresso, mas e oustau, que lou païs n’es clafi, es analisado de proche, la culturo poupulàri tambèn. Roumié Venture signo aqui d’article sus lou coustume, la musico e la danso, lou Felibrige. Evelino Duret evoco li fèsto tradiciounalo, coume la Carreto Ramado e la Bouvino, e soun pas óublida la literaturo e lis art, que n’i’a ‘gu d’escrivan dempièi lou troubadou Bertrand de Lamanoun, en lengo prouvençalo e franceso (Quiqueran de Beaujeu, Nostradamus, Mistral, Roumanille, Daudet, Marìo Gasquet, Marìo Mauron, Carle Galtier, Ivan Audouard…). Glaude Mauron nous pourgis uno geougrafìo literàri prouvençalo dis Aupiho. Gounod a marca soun passage e de pintre, dessinaire e gravaire tambèn, que n’i’a de mouloun, estènt Van Gogh lou mai couneigu, coume Leo Lelée, Francés de Hérain, Ives Brayer, Louïs Jou.

Coumuno e ciéuta soun enfin presentado e lou tout s’acabo sus la questioun de l’aveni e l’espèr plaça dins lou Pargue Naturau Regiounau, crea en 2007. Em’ uno bono bibliougrafìo pèr quicho-clau, avèn aqui, fin finalo, uno referènci, que fara mestié de se croumpa o de se faire óufri.