Lou vièsti en Auto-Prouvènço

Vaqui un libre que, de segur, defautavo. S’agis de l’oubrage de referènci d’Eliano Michel, presidènto de Parlaren Lis Aup, sus lou vièsti tradiciounau prouvençau dins l’Auto-Prouvènço. Es esta escri pèr uno Prouvençalo, touto embugado de soun terraire, e vèn adurre uno mount-joio di bello dins la memòri bas-aupino.

A pèr titre Le vêtement en Haute Provence (brève histoire du textile bas-alpin, 1830-1920).

En mai de 400 foutò, qu’en maje part vènon de l’ufanouso espousicioun de 2007 à Sisteroun, lou legèire à drech à-n-uno escourregudo sus li routo serpentouso d’antan, que lou menaran dins la Vau de Durènço e jusqu’en Ubaïo.

Emé li temouniage precious d’ancian sauprés tout de l’endustrìo dóu teissut bas-aupin, dis óutis pèr travaia la lano, lou canebe e la sedo, autambèn que di mestié, uno endustrìo que fasié viéure de mounde e que prouvesissié touto uno poupulacioun fièro de si vièsti asata à soun èime, à sa vido e à soun climat.

Descurbirés, segur, tóuti aquéli vièsti femenin e masculin, emé la raubo de la nòvio, li vièsti pèr li pichot, sènso óublida li faudau, li couifo, la taiolo, li braio, li capèu, li caussaduro e li beloio.

Lou libre d’Eliano Michel nous porge, tambèn, tout un fube de patroun emé tóuti lis esplico necito. Es recoumanda pèr la Soucieta Scientifico e Literàri dis Aup d’Auto-Prouvènço. Se pòu croumpa vers l’autour.

À l’ouro que d’ùni voudrien escafa nòsti memòri poupulàri, acò douno de soulas de vèire qu’au nostre, en Prouvènço, li femo de noste pople se groupon à manteni si bèlli tradicioun vestimentàri. JGR