Lou camin percoula

Es uno bello souspresso que nous fai noste ami Jan-Pèire Sichère, lou secretàri dóu Flourege Prouvençau e sòci de Parlaren, emé l’espelido, en numerò foro-tiero dóu buletin Lou Flouregian, de soun recuei de pouèmo «Lou camin percoula».

Es un Jan-Pèire Sichère que couneissian pas que se desvèlo aqui, un ome qu’a deja forço camina dins la vido, e qu’à-n-un moumen a senti lou besoun de s’aplanta un pau, de se pausa de questioun e de se vira à rèire pèr regarda e reviéure enca ‘n cop lou camin percoula. Sa pichoto entrouducioun i 21 pouèmo que nous semound es ansin di bello.

Li pouèmo tambèn soun agradiéu de legi, tout embuga d’uno pensado prefoundo, d’uno vesioun filousoufico di causo e dóu plesi dóu souveni. Un di pouèmo, «Tres degout», es esta guierdouna d’uno medaio d’argènt i Jo Flourau 2009 de Toulouso, n’en vaqui, en avans-goust, quàuqui vers :

«Tres degout de sang an seca
Sus un pitre en susour.
Mai, es-ti pas aquéu d’un Crist
Qu’un sourdat rouman a pica
Pèr uno redemcioun dóu mounde?
Vo pulèu aquest de la fiho
Qu’es morto d’agué trop ama
Au bèu mitan d’un champ de blad»,

De nouta que lou pourtissoun dóu recuei es esta escri pèr lou majourau toulousan, Jòrdi Passerat, mantenèire di Jo Flourau de Toulouso, bello provo de la qualita de l’obro de Jan-Pèire Sichère.

De nouta encaro que li pouèmo soun douna emé sa reviraduro au francés.