Èro, à la debuto de janvié, lou tèms dis armana, aquéli librihoun que fan mestié tout de long de l’annado. Sian, bèn segur, à l’espèro de l’Armana prouvençau qu’a pancaro pareigu, mai n’avèn reçaupu bèn d’autre que vous signalan vuei :

L‘Almanach Ardèche & Drôme. Es uno publicacioun que fai ges de plaço à la lengo nostro. Douno, pamens, forço entre-signe sus la vido, l’istòri, li tradicioun, etc. d’aquéli dous despartamen. 192 pajo, costo 4,95 €. Ed. de La Bouquinerie, 8 carriero Ampère, 26000 Valènço.

L’Almanach dauphinois. Fai uno pichoto plaço i patoues dóufinen de la lengo nostro. Douno tout un fube d’entre-signe prati, remèdi tradiciounau, recèto de nòsti grand, biougrafìo, noto sus la fauno e la floro, etc. Avèn pas, vertadieramen d’equivalènt en Prouvènço. 130 pajo, costo 5,80 €. Ed. Almanach Dauphinois BP 235 - 74942 Annecy-le-Vieux Cedex.

L’Armanac de Lousèro. Es uno publicacioun bi-lengo, francés/giboudanés de Les Amis de Lou Païs et L’Escolo Gabalo. Es un librihoun requist, clafi de pouèmo, raconte, cascareleto, galejado. Li tèste soun dins la grafìo mistralenco dóu Givaudan. Aquest Armanac de Lousèro pareiguè pèr lou cop proumié en 1899. Es esta tourna publica à coumta de 1970 pèr la revisto Lou Païs BP 91972, 34000 Montpellier Cedex, qu’es un numerò especiau que caup dins l’abounamen annau (25 €).