L’encicloupedìo dis Aupiho.
Ensignadou.
Prouvèrbi pèr l’Ivèr qu’es aqui.
Soun bèn coutènt...
Editouriau
Li galino d’Óupedo...
Noum de la Regioun - Parlaren en Vaucluso.
L’Evenimen
Lis eleicioun regiounalo.
Haïti : Èro antan la Perlo dis Antih.
Oudilo Delas e Jan Dionis.
De voues se soun amoussado.
Maiano avans Maiano.
E la nèu toumbè
Candelouso.
Anniversàri 20en di Nouvello.
Trin di Fèsto e Manifestacioun Prouvençalo.
18en Councours di Jouine de Prouvènço
Lou vièsti en Auto-Prouvènço
Gui Bonnet e Eloudìo Minard dins Mirèio.
Micoulau Sabòli.
Lou Bausset à passa tèms
Lis espacejado dóu barrulaire à velò.
Lou generau e lou courpatas ...
Lou camin percoula
Noste tamisié es revengu
La Roco de Dom
Raconte e novo de noste tèms.
La bello journado dóu Fernand
Pèr fadeja emé li muso.
Sus lou camin dis estello.
Lou Coudounié
La roubinsouno prouvençalo
Courié di legèire.
Libre - disque - nouvèuta
Canton li Troubadou...
Racino coumtadino
Lis Armana

Au mes de mars d’aquest an tournaren vouta pèr lis eleicioun regiounalo. Sara belèu la darniero counsulto que sa voutacioun se fara d’aquest biais. Sian aqui pèr tout vèire.

Dounaren pas , coume es nourmau pèr uno revisto d’acioun culturalo, de counsigno à nòsti legèire pèr baia soun sufrage à-n-uno listo vo à uno autro.

Soun proun grand pèr saupre quau nous a soustengu dóu tèms de la mandaturo que s’acabo e pèr espepidouna li prougramo di listo que saran en targo.

Sabon, tambèn, qu’aquesto eleicioun aura, d’abord, valour d’un soundage naciounau à grando escalo.

Pèr nàutri, lis aparaire de la Lengo e de la Culturo Prouvençalo, coume de la Civilisacioun d’Oc, es de noste devé de ramenta en tóuti quéti soun nòsti desiranço :

1. Voulèn que la Regioun Prouvènço-Aup-Coustiero d’Azur retrobe soun noum de PROUVÈNÇO, perfin de plus ausi e legi de longo lou mot de PACA. Sian pas de «pacaian», mai de Prouvençau e acò despièi mai de 2.000 an. Counsequènci : que que siegue la resulto de l’eleicioun regiounalo, lou nouvèu gouvèr de la Regioun déura, pèr moudifica lou noum, siegue i’arriva pèr uno voutacioun dóu nouvèu Counsèu Regiounau, siegue ourganisa un referendum. L’identita regiounalo es pas uno garrouio sus «lou sèisse dis ange», mai uno necessita ecounoumico.

2. Voulèn que la Lengo Prouvençalo siegue ensignado, à coustat dóu franchimand, en tóuti lis enfant escoularisa en Prouvènço. Aquest ensignamen déura èstre previst, coume en Lengadò-Roussihoun, dins uno counvencioun assouciant la Regioun e lis autourita academico. Li manuau e àutri suport d’ensignamen de la Lengo Prouvençalo saran de la coumpetènci di dos istitucioun.

3. Voulèn que li media regiounau publi e priva (NB : li quoutidian, meme priva, beneficion d’avantage de la part de l’Estat) dounon uno plaço di counsequènto à la Lengo e à la Culturo Prouvençalo. Voulèn, en particulié, uno vertadiero televisioun bi-lengo, francés-prouvençau, emé fourmacioun di journalisto e difusioun dis emissioun i bònis ouro d’escouto. Aquesto TV aura pèr messioun d’assegura, en priéureta, la proumoucioun de la prouducioun en prouvençau, que siegue literàri o dins lou doumaine de la cansoun, autambèn que la musico.

4. Voulèn que siegue respetado l’identita founso de la Regioun, que soun istòri e soun èime soun pasta de l’eiretage gregau-latin, de la crestianisacioun e de la recouneissènço de la liberta de counsciènci afourtido pèr la lèi de 1905, que si principe an pas d’èstre fourvia.

5. Voulèn que l’ecounoumìo regiounalo siegue au service de la poupulacioun e que li gràndi decisioun que councernisson l’envirounamen siegon presso après counsultacioun d’aquelo d’aqui. E, tambèn, que de liame estré siegon desvouloupa pèr la Regioun emé lis àutri païs e regioun dóu ribeirés latin de la Mar Nostro.

Vesès, amigo e ami legèire, que i’a de que perpensa à respèt de l’aveni de nosto bello Regioun. Vouta pèr lis eleicioun regiounalo es un dre qu’avèn e, subre-tout, un devé pèr assegura dins de bòni coundicioun l’aveni di generacioun mountanto.