ensignadou

156


L’encicloupedìo dis Aupiho.
Ensignadou.
Prouvèrbi pèr l’Ivèr qu’es aqui.
Soun bèn coutènt...
Editouriau
Li galino d’Óupedo...
Noum de la Regioun - Parlaren en Vaucluso.
L’Evenimen
Lis eleicioun regiounalo.
Haïti : Èro antan la Perlo dis Antih.
Oudilo Delas e Jan Dionis.
De voues se soun amoussado.
Maiano avans Maiano.
E la nèu toumbè
Candelouso.
Anniversàri 20en di Nouvello.
Trin di Fèsto e Manifestacioun Prouvençalo.
18en Councours di Jouine de Prouvènço
Lou vièsti en Auto-Prouvènço
Gui Bonnet e Eloudìo Minard dins Mirèio.
Micoulau Sabòli.
Lou Bausset à passa tèms
Lis espacejado dóu barrulaire à velò.
Lou generau e lou courpatas ...
Lou camin percoula
Noste tamisié es revengu
La Roco de Dom
Raconte e novo de noste tèms.
La bello journado dóu Fernand
Pèr fadeja emé li muso.
Sus lou camin dis estello.
Lou Coudounié
La roubinsouno prouvençalo
Courié di legèire.
Libre - disque - nouvèuta
Canton li Troubadou...
Racino coumtadino
Lis Armana






titre Haïti
Souvetan que deman Haïti siegue plus un païs de misèri

L’annado 2010 a coumença dins la doulour emé lou terro-tremo terrible que saquejè, lou 12 de janvié, Haïti, l’uno di Gràndis Antiho.

Es Cristòu Colomb que, lou 6 de desèmbre de 1492, fuguè lou premier Éuroupen de trepeja lou sòu d’uno islo que lis Indian ié disien Ayiti, e qu’éu batejè dóu noum d’Hispaniola bord que ié ramentavo li campagno de Castiho, e que fuguè pièi couneigudo coume estènt Santo Domingo en espagnòu, Sant-Domingue en franchimand e Sant- Doumenge en prouvençau.

L’islo vuei es partejado entre dous païs independènt : la Republico Doumenicano (2/3 de la surfàci de l’islo, 9,5 milioun d’abitant) e la Republico d’Haïti (1/3 de l’islo, mai de 10 milioun d’abitant).

Un païs fragile

Lou terro-tremo de 2010 aura fa 150.000 mort e belèu mai, ansin que de centeno de milo de sènso-abri. Lou relarg lou mai saqueja es esta la megapòli de Port-au-Prince, capitalo d’Haïti, forto en 2008 de 3.812.000 persouno. Antan, Port-au-Prince fuguè deja forço daumaja pèr de terro-tremo; en 1750 e 1770 fuguè destrui; en 1860, 1918, 1922, 1956 e 1962, lou gast fuguè mens impourtant.

La resoun? Es que lou ribeirés pounentés de Haïti, ounte s’atrovo sa capitalo, es dins uno zouno sismico tras qu’ativo de la crousto terrèstro. I’a, vers l’uba, la placo nord-americano e, à l’adré, la placo sud-caraïbo. Es li mouvamen d’aquéli placo que dounon li terro-tremo, bono-di la fendasclasso de la Caraïbo.

S’apoundèn à-n-acò que Haïti es sus lou passage d’auristre, se vèi qu’es un païs fragile, d’autant que soun istòri i’a pas douna lou blanc dóu pòrri. D’efèt, la terro haïciano n’a vist passa de terrìblis evenimen

La set de l’or

D’abord, e avans lis Espagnòu, es li migracioun indiano qu’avien fa coula de sang. De guerrié arawak, arriva en pirogo, avien estermina lis ome di tribu que vivien eila, gardant que li femo pèr s’amouiera em’ éli. D’aqui la souspresso dis Espagnòu qu’avien trouba uno poupulacioun que parlavo dos lengo diferènto : uno pèr li femo, l’autro pèr lis ome.

Lis Espagnòu, acò se saup, avien la set de l’or. Pèr n’en trouba, assajèron de faire travaia lis Indian dins li mino, mai de bado! Aquéli d’aqui supourtèron pas acò, d’autant que lis epidemìo aducho pèr lis Éuroupen e li massacre coumés pèr li cassaire d’esclau e si chin redusien la poupulacioun. Dins l’afaire d’uno generacioun, lis Indian, qu’èron belèu 100.000 en 1492, despareiguèron. Es aqui que, coume li counquistador se poudien pas leva la set de l’or, decidèron de faire veni de Negre african coume esclau, pensant que patirien mens dóu travai dins li mino. Coume aquéli d’aqui s’atrouvavon que dins la partido vuei óucupado pèr la Republico Douminicano, lis Espagnòu leissèron lou territòri qu’es aro lou de la Republico d’Haïti, quasimen desert.

Felibustié e Boucanié

Mai se saup que la naturo a ourrour dóu vuege. De vaco e de biòu, escapa di coulounìo castihano, tournèron sóuvage e si troupèu coumencèron de treva li bos e li mountagno. Entre-vau, sian vers 1620-1630, d’àutris Éuroupen (Francés, Anglés, Óulandés etc), que ié diguèron li Felibustié, s’èron avisa que i’avié d’islo au large de Sant-Doumenge que pourrien faire de bon recàti pèr la piratarié, l’Islo de la Tartugo e l’Islo-à-Vaco. Ié plantèron caviho bord qu’èro l’epoco que se poudié faire fourtuno en atacant li galioun espagnòu que carrejavon li tresor de la Nouvello Espagno (Meissique, Perou, Sant-Doumenge etc) enjusqu’à si port éuroupen.

D’un autre las, d’aventurié que se riscavon pas sus mar, li Boucanié, se meteguèron à cassa li biòu sóuvage d’Haïti fin d’avitaia li batèu di Felibustié.

Tout acò durè bèn d’annado, pièi l’idèio venguè is autourita franceso que proufitavon de la presènci di Felibustié e di Boucanié e de la mau-parado que fasien is Espagnòu, de coulounisa l’interiour de la partido deserto de Sant-Doumenge.

Lou mouvamen s’acelerè en 1697 emé lou Tratat de Ryswick, entre li reiaume de Franço e d’Espagno, que recouneiguè la douminacioun franceso sus la partido pounenteso d’Hispaniola en escàmbi de la fin dis ataco di Felibustié sus li galioun espagnòu e li vilo de la Nouvello Espagno.

Es partènt d’aquesto dato, e pendènt un siècle, que Sant-Doumenge fuguè d’à cha pau coulounisa pèr li Francés. De Coumpagnié apareiguèron, emé d’aciounàri, qu’encourajèron la creacioun de plantacioun de cano à sucre, de coutoun e de cafè. Pèr li besoun di plantaire fuguè istituï lou sistèmo de l’engagisme : d’ome, de Franço s’engajavon pèr servi un plantaire d’Haïti pendènt 36 mes; à la fin d’aquelo periodo poudien s’istala éli tambèn sus lou territòri.

Lou sistèmo, pamens, couneiguè pas un grand sucès : lis engaja èron trata coume d’esclau, mourien lèu, n’i’a que s’enfugissien dins li séuvo ounte devenien marron. Alor, e coume l’avien fa deja lis Espagnòu, li Francés se prouvesiguèron en esclau fourni pèr la tracho di Negre african, pèr li faire travaia dins li plantacioun.
 

Harta la Haïti

La Perlo dis Antiho

La resulto de tout acò fuguè espetaclouso!

À la fin dóu siècle 18en, lou Sant-Doumenge francés èro devengu la Perlo dis Antiho. Proudusié mai de sucre que tóuti lis islo angleso dis Antiho. Pourgissié en demai à la counsumacioun moundialo 50 % de si besoun en coutoun e cafè. Lou negòci emé la metroupòli desvouloupavo uno zouno d’espourtacioun pèr li proudu francés. De fourtuno se fasien rapidamen.

Mai tout acò èro degu à-n-un equilibre fragile. En 1789, i’avié, à Sant-Doumenge, 7.900 prouprietàri de plantacioun e 1.500 prouprietàri d’àutris inmoble (destilarié etc). Lou recensamen de 1788 a douna 27.717 blanc, 21.808 mulatre afranqui e 405.464 esclau negre. La Perlo dis Antiho, tant drudo, tant abelano, dourmié, en realita, sus un voulcan. D’autant que li plantaire, pèr aumenta si proufié, avien seleiciouna sus li marcat dis esclau antihés li Negre li mai fort qu’avien fa, coume d’animau, se reproudurre dins si doumaine.

Revoulucioun à Sant-Doumenge

Arrivè, en Franço, la Revoulucioun de 1789. Pèrfaire simple, noutaren que lis idèio nouvello gagnèron lèu lis Antiho. Uno lucho ideioulougico s’engajè entre lis esclavagisto e lis anti-esclavagisto. Li couloun, en generau, èron contro la Revoulucioun e lis esclau èron pèr elo. Uno proumiero revòuto d’esclau espetè lou 22 d’avoust de 1791 : 1.000 «blanc» fuguèron tua. Apareiguè un chèfe pèr coumanda li revòuta : Toussaint Louverture. La guerro civilo s’empurè entre li revouluciounàri negre e mulatre e li couloun soustengu pèr lis Anglés. À Paris, que reçaupié pus ges de sucre de Sant-Doumenge, li pres s’escaufon que mai. Finalamen, lou 29 d’avoust de 1793, Lóugié-Felicita Sonthonax e Estève Polverel, coumissàri civil de Sant-Doumenge, prouclamèron l’egalita e la liberta generalo dis esclau.

Lou 4 de febrié de 1794, la Counvencioun, à Paris, voutè à l’unanimeta l’aboulicioun de l’esclavitudo e counfiermè la Declaracioun di Dre de l’Ome de 1789. Pèr li revouluciounàri negre, la guerro, pamens, se perseguiguè, de 1794 à 1801, que siegue contro li blanc reialisto (1.000 fuguèron massacra à Fort-Dóufin), lis Espagnòu o lis Anglés. La persounalita e lou poudé de Toussaint Louverture s’afiermèron. L’assemblado centralo de Sant-Doumenge adóutè uno coustitucioun : la coulounìo devenié autounomo, mai demouravo franceso.

Toussaint-LaverdureL’espedicioun de Leclerc

Napouleon Bonaparte, premié conse, èro desenant au poudé. Voulié pas perdre Sant-Doumenge e si richesso. Après de negouciacioun sènso sucès emé Toussaint Louverture, decidè de manda uno floto em’ uno armado pèr recounquista la coulounìo. Es soun cougnat, lou generau Carle Leclerc, l’ome de sa sorre Paulino Bonaparte, que fuguè lou chèfe de l’espedicioun. Après soun desbarcamen (febrié de 1802), l’armado franceso forto de 30.000 ome óutenguè un premié sucès contro aquelo de Louverture, que fuguè fa presounié e manda en Franço ounte mouriguè. Mai, lis ome èron pas abitua au climat e la fèbre jauno escoufiguè li troupo.

Li Francés, finalamen, fuguèron vincu, èro un desastre. Leclerc mouriguè lou 1ié de nouvèmbre de 1802. Sa femo, Paulino, que l’avié acoumpagna à Sant-Doumenge raduguè soun cors embauma en Franço. Counsequènci : li revouluciounàri negre e mulatre prouclamèron lou 1ié de janvié de 1804 l’independènci de soun païs, que ié redounèron soun noum indian d’Haïti e tuèron li darnié «blanc» encaro presènt dins l’anciano coulounìo. Après quinge annado de treboulèri, Haïti avié perdu touto sa poupulacioun blanco, la mita de sa poupulacioun negro e degun, dins lou Mounde, recouneissié soun independènci.

Lou pres de l’independènci

Li couloun francés, pamens, avien pas tóuti peri. Coume avien antan soustengu li revouluciounàri american, forço èron parti (20.000 belèu), en plusiours enmigracioun, avans 1804, siegue pèr Cuba, siegue pèr la Louisiano o lis Estat Uni. Reprenguèron, eila, soun mestié de plantaire e participèron à la Counquisto dóu Pounènt. Noun óublidaran, pamens, si prouprieta de Sant-Doumenge, que n’avien serva li titre e, de cop, li recouneissènço de dèute envers li banco franceso.

Es dins lis annado 1820 que lou gouvèr negre de Haïti, emé soun presidènt Pétion, prepausè au rèi de Franço, Carle Dès, toujour prouprietàri de la partido ancianamen franceso de Sant-Doumenge en dre internaciounau, de recounèisse l’independènci de soun païs contro uno indannita evaluado à 10 % de la valour di bèn qu’avien apartengu i couloun francés.

La soumo fuguè negouciado pèr un mountant de 150 milioun de franc or (siegue 379,5 milioun d’éurò), reducho pièi à 90 milioun en 1838. Pèr la paga, lou gouvèr haïcian empruntara sus lou marcat financié american e anglés, e tambèn 24 milioun i banco franceso.

L’indannita finira pèr èstre pagado en toutalita à la Franço qu’en 1886, mai lis interès di soumo empruntado saran amoussa qu’en 1938. Lou gouvèr francés indannisara en seguido 11.000 ancian couloun.

Un crèis mal-eisa

La jouino republico negro, lou soulet estat francoufone dis Antiho, aura forço peno pèr s’establi e se desvouloupa. D’abord, avié eireta d’un païs saqueja pèr li guerro, em’ uno poupulacioun reducho de mita e privado de l’encadramen «blanc» qu’avié crea soun ecounoumìo. Pièi, a jamai agu de gouvèr demoucrati duradis, soumés en de ditaturo élimemo souto la joto d’interès fourestié. Enfin, dins soun countèste geoulougi (li terro-tremo) e climati (lis auristre), a vist crèisse sa poupulacioun d’un biais espounenciau : es estado multiplicado pèr 40 en dous siècle, ço qu’a entrina la defourestacioun (i’a plus que 2% de séuvo en Haïti) pèr li besoun de l’agriculturo e li necessita doumestico, emé, en demai, uno forto rousigaduro di sòu.

Rebasti Haïti

Quouro lou terro-tremo de janvié de 2010 escranquè Port-au-Prince, la capitalo, lou dèute de Haïti èro de 1,1 miliard de doular. Adounc es pas lis evenimen que vènon de viéure que permetran de lou ramboursa. Haïti es un païs à la desbrando e se pòu cregne que tourna devenguèsse, coume lou fuguè de 1915 à 1934, uno nouvello coulounìo americano. Se lis American avien óucupa Haïti, en 1915, èro, precisamen, pèr assegura lou ramboursamen à si banco dis emprunt fa pèr paga lou dèute de l’independènci.

Enfin, li counsequènci destrùssi dóu terro-tremo de janvié de 2010, soun ligado à-n-un autre fenoumène : despièi 1980, lou Founs Mounetàri Internaciounau (FMI) e la Banco Moundialo an impausa de poulitico qu’an desagrega la païsanarié e fourça lou mounde à-n-uno enmigracioun massiso dins li bagatóuni di vilo.

Haïti

Sabès-ti que li barriero douaniero e li suvencioun que proutegissien la prouducioun naciounalo haïciano soun estado liquidado à la demando de la Banco Moundialo e dóu FMI? Li païsan, qu’en majourita fasien de ris, soun devengu de mendicant e Haïti fai veni desenant tout soun ris dis Esta Uni ounte...barriero naciounalo e suvencioun proutegisson la prouducioun americano.

Faudra rebasti Haïti, vai segur sus d’àutri baso, autramen li desastre geoulougi e climati, autambèn que la subre-poupulacioun e la destrucioun de soun envirounamen, n’en faran, pèr toujour, un quàsi desert e uno terro d’enmigracioun.

Pèr aro, aculissèn en Franço, d’ourfanèu d’aquest païs de misèri qu’es devengudo la Perlo dis Antiho. Aquélis enfant soun pas li nostre, soun li pichot d’un pople libre, fièr de soun identita, de sa culturo, de soun istòri.

Souvetan que perdeguèsson pas si racino e qu’un jour pousquèsson countribuï, fort de l’educacioun e de l’amour que i’auren pourgi, à l’edificacioun de soun païs d’óurigino, fin que siegue un jour urous e prouspère.

signat



barre de fin de page


1076023