ensignadou

156


L’encicloupedìo dis Aupiho.
Ensignadou.
Prouvèrbi pèr l’Ivèr qu’es aqui.
Soun bèn coutènt...
Editouriau
Li galino d’Óupedo...
Noum de la Regioun - Parlaren en Vaucluso.
L’Evenimen
Lis eleicioun regiounalo.
Haïti : Èro antan la Perlo dis Antih.
Oudilo Delas e Jan Dionis.
De voues se soun amoussado.
Maiano avans Maiano.
E la nèu toumbè
Candelouso.
Anniversàri 20en di Nouvello.
Trin di Fèsto e Manifestacioun Prouvençalo.
18en Councours di Jouine de Prouvènço
Lou vièsti en Auto-Prouvènço
Gui Bonnet e Eloudìo Minard dins Mirèio.
Micoulau Sabòli.
Lou Bausset à passa tèms
Lis espacejado dóu barrulaire à velò.
Lou generau e lou courpatas ...
Lou camin percoula
Noste tamisié es revengu
La Roco de Dom
Raconte e novo de noste tèms.
La bello journado dóu Fernand
Pèr fadeja emé li muso.
Sus lou camin dis estello.
Lou Coudounié
La roubinsouno prouvençalo
Courié di legèire.
Libre - disque - nouvèuta
Canton li Troubadou...
Racino coumtadino
Lis Armana






Lou tamisié (vóutour faurèu) es revengu

Li quatre espèci de vóutour que vivien antan en Franço avien quàsi despareigu di Barounié. Pamens, dins lis annado 90, uno chourmo de naturalisto aguè l’idèio de faire reveni de vóutour faurèu, noste tamisié, dins li gorgo de l’Èigo. Anen faire un pau d’istòri pèr coumprendre la genèsi d’aquéu plan.

Quau soun aquéli vóutour?

Li vóutour soun d’arpian de grando amplitudo, que fan ges de mau à la sóuvagino.

Manjon soulamen de bèsti morto, que sabon pas ploumba sus sa predo coume lou fan li rùssi o lis aiglo : aquéli carougnié soun li ramasso-bourdiho de la naturo. En digerissènt, avalisson li baterìo e li virus di carcasso e ansin lis empachon de s’esparpaia dins l’èr, lou sòu e l’aigo.

Se destrio encò di quatre espèci éuroupenco de vóutour li mémis eisigènci biougeougrafico. Vivon ensèn e se coumplèton : lou vóutour faurèu o tamisié dóu bè trencant, duerb li carcasso e se nourris de viando e de courado; lou vóutour mounge, dóu bè pouderous, manjo ço qu’es tihous, la pèu e li tendoun; lou capoun-fèr, dóu bè fin, recoubro li degaiadis que rèston e l’aiglo-àrpio manjo lis os.

An besoun de barro pèr nisa, se pausa e s’envoula. Emé li courrènt que mounton, tamison dins lou cèu e jogon em’ aquéli que davalon pèr ribeja li barro. Soun istint gregàri li fai viéure en coulounìo sus li cengle di mountago mejano dóu bassin mieterran.

Li vóutour e l’ome

l_eigoFin qu’au siècle 19en, emé la pastriho, lou noumbre di vóutour a aumenta. Seguissien l’amountagnage dis abeié e manjavon li bèsti morto. Lis archiéu nous dison qu’en Franço i’avié de vóutour di Pirenèu dóu pounènt fin qu’is Aup de l’uba. Èron mant un milié. Mai tre 1850 lou cèu di vóutour s’ennegriguè. Au siècle 20en n’en restavo que dins li Pirenèu, mounte se mantènon coume podon. Lou capusage di bèsti morto fai qu’an plus rèn à manja. S’èi jita la saussisso i loup e i reinard. Enfin li cassaire, pèr crudelita, o pèr cresènço, soun tambèn respounsable de l’avalimen di vóutour.

Dins la naturo, li vóutour a ges de rapinaire. Se l’ome èro pas vengu li faire peri, belèu que se sarien pas avali. Despièi 1976, soun devengu d’espèci aparado.

Lou vóutour faurèu o tamisié en Barounié

Se pènso que i’a mai de 100 an que lou vóutour faurèu a despareigu di Barounié, mai ges de tèste lou provon.

Lou soulet doucumen escri dato de 1848. D’efèt parlo d’un vóutour mounge trouva mort e mes en mostro sus la plaço dóu marcat de Nioun. En 1975, la FRAPNA (Federacioun Rose-Aup de Proutecioun de la Naturo) decidè de faire la drèisso d’un enventàri tras que coumplèt dis aucèu di Barounié.

En 1976 Rougié Mathieu, un naturalisto de la regioun, identifiquè dins li gorgo de l’Èigo, à Sahuno, un couble de capoun-fèr, de-segur lou darrié en Droumo. Mai en 1981 despareiguè.

Vincèns Boutonnet e Crestian Tessier, dous ournitoulogue, e Rougié Mathieu asseguron qu’à passa tèms, li vóutour vivien dins li barro roucassouso que ribejon l’Èigo. Bord qu’en 1981 s’èro entroudu tourna mai de vóutour dins lou Mountagnage Centrau, perqué pas lou faire en Barounié?

Li proumié saran li tamisié

Mai un plan scientifi ansin se fai tout soulet.

En 1993, se coungreio l’assouciacioun «Vautours en Baronnies», à Remusat, que sara lou mèstre d’obro dóu prougramo. Li barro escalabrouso dóu roucas dóu Caire saran lou rode de reentrouducioun. Lou Menistèri de l’Envirounamen acèto lou plan scientifi e teini.

La FRAPNA, lou Sendicat d’abalissèire de fedo e de cabro, la Federacioun di cassaire de Droumo ajudon l’assouciacioun Vautours en Baronnies. La LPO (Ligo de Proutecioun dis Aucèu) ei lou counseié teini. Li service veterinàri soun engaja. Fau tambèn li bon founsié pèr utilisa li barro e fabrica d’auceliero. E li dardèno? Vendran dóu Counséu Generau, dóu Menistèri de l’Envirounamen, de l’Unioun Éuroupenco e d’ourganisme priva.

En 1994 se croumpo li proumié vóutour faurèu devers li centre de siuen francés o espagnòu : aqui li tamisié, souvènti-fes magagna vo anequeli, soun sougna e après bandi dins la naturo. Saran engabia 2 o 3 an, perfin qu’aguèsson lou tèms de mira e metre en memòri lou païsage, que li naturalisto comton bèn que restaran e que sagatejaran.

Dins li gàbio, lis aucèu aprenon à viéure ensèn, qu’es necite à la vido agregarello. Soun anela, em’ un numerò e carga d’un emetèire que chasque aucèu a sa frequènci, pèr li segui dins la naturo. Es au mes de desèmbre de 1996 que fuguèron bandi li proumié vóutour faurèu o tamisié adulte. Èro lou moumen dis apariage. Li mascle pensèron pas de s’enana bord que cercavon de femello e plantèron caviho sus li barro dóu Caire. Se bandiguè de vóutour fin qu’is annado 2000. Se ié douno à manja à coustat di gàbio.

Tout l’an li naturalisto s’interèsson à la vido d’aquélis aucèu. Li proumiés iòu espeliguèron en 1999. En 2000, 5 jouine soun anela e prenon soun vòu, en 2001 n’i’a 7 e en 2002 14. Li vóutour soun de grand vouiajaire. De fes, d’ùni laisson la coulounìo pèr ana dins d’àutri mountagno de Franço o d’Éuropo. Au contro, d’autre, nascu forço liuen (Espagno, Causse…) vènon s’istala en Barounié.

La coulounìo di gorgo de l’Èigo trachis bèn : i’a de nis en deforo dóu roucas dóu Caire e i’a mant un rode mounte podon ana manja, que li païsan i’aduson li bèsti crebado.

L’impourtanço de la coulounìo es ligado à la quantita de mangiho (80% de cadabre d’abalimen, 20% de cadabre dóu ferun). En 2004 se comto 150 vóutour faurèu o tamisié en Barounié, que 45 couble ié racejon. En 2007, se noumbro 64 couble que racejon e 42 pipiéu qu’espelisson. Quant de centenau trouvaran proun de mangiho pèr se manteni en Barounié?

Quente benefice pèr li Barounié?

En mai d’un efèt pousitiéu sus la bioudiversita, lou tourna di vóutour es forço interessant pèr l’envirounamen : i’a plus besoun d’espeio-rosso e soun uno barriero epidemioulougico eficaço contro l’espandimen di malautié animalo.

Pèr la sciènci, lis ouro passado à l’óusservacioun di vóutour se comton à milié. Aquéu plan a fa se rescountra de gènt que belèu se sarien jamai vist.

E pièi, à Remusat, la duberturo de La maison des vautours, mounte se pòu agué d’entre-signe, vèire d’espousicioun (15.000 vesitaire dins l’annado), fai un emplé sus la coumuno. 2 persouno soun emplegado pèr «Vautours en Baronnies»

E lis autris souto-espèci de vóutour?

En 1999, un couble de capoun-fèr venguè s’istala sus lou roucas dóu Caire, e l’an d’après i’aguè de pipiéu. Fuguè meravihous de vèire li capoun-fèr tourna mai tout soulet dins li gorgo de l’Èigo. En 2004, s’es remés en gàbio de vóutour mounge avans de li bandi. La revengudo de l’aiglo-àrpio se fai pèr lou moumen dins lis Aup.

Coume faire pèr vèire li vóutour?

Souvènti-fes se pòu agacha dins lou cèu, meme liuen di gorgo de l’Èigo, lou vòu majestous d’aquéli gigant dis èr. Sarés encaro mai espanta s’anas à Remusat. Cargas de soulié pèr marcha e, soulet o em’ un guide, endraias-vous de-vers lou roucas dóu Caire. Que siegue l’estiéu o l’ivèr, l’espetacle es meravihous.

Óublidés pas de passa à La maison des vautours pèr ié faire assaupre ço qu’avès vist o remarca dóu tèms de vosto escourregudo.

Gramaci à Óulivié Schmitt que m’a permés d’escriéure aquest article.

signat



barre de fin de page

1 909