Frederi Mistral
ilustre e descouneigu

Vaqui uno nouvello biougrafìo de Mistral, uno bio qu’es drudo d’un mouloun de foutougrafìo, reprouducioun de doucumen, retra, aficho acoulourido etc. La devèn à noste ami Girard Baudin, lou foundadou dóu Counservatòri doucumentàri e culturau Frederi Mistral e, de la chanudo revisto Echos de Provence. I’atrouvan tout ço que fau saupre sus la genealougìo dóu Mèstre de Maiano, lou Mas dóu Juge, sis estùdi, lou bandimen de la Reneissènço Prouvençalo, Mirèio, soun proumié cap-d’obro, e li noumbróusis amour mistralenco. Mistral, d’efèt, fuguè un grand sedutour (e belèu tambèn un pau après...) avans que de s’amouiera.

Aquesto novo biougrafìo a pèr titre : Frédéric Mistral, illustre et méconnu. Mèste Baudin, pèr acò, a furna dins tóuti si tresor. Avèn pas coumta, mai, dins 150 pajo grand fourmat, i’a belèu mai de 250 ilustracioun óuriginalo, ço que n’en fai uno soumo icounougrafico d’uno riquesso eicepciounalo. Lou mai esmouvènt es belèu aquest dessin de Léo Lelée retrasènt la mèro dóu pouèto.

Es uno obro que fau recoumanda en tóuti li que volon counèisse Mistral, li siéu, soun obro, sis amour e sis amista, tant coume la glòri qu’agouloupè l’autour de Mirèio e de Calendau sus la fin de sa vido.

Mèste Baudin ramento ço que lou Mèstre faguè marca sus soun toumbèu : E pièi un jour diran : - Èro un que l’avien fa rèi de Prouvènço...Mai de soun noum li grihet brun canton soulet la survivènço!. Emé lou libre que vèn d’espeli e l’obro que se fai de pertout à soun eisèmple, se vèi que i’a un mouloun de grihet di dos pauto que seguisson soun ensignamen.