Pèr la Fe di Biòu e l’Amour de la lengo

Es un recuei de crounico qu’espeliguè, en Abriéu, en Aigo-Morto. A pèr autour Gabriéu Brun, qu’es desenant lou presidènt dóu Ciéucle Lengo d’O dóu cantoun d’Aigo-Morto. Es un gardian, un escrivan, un pouèto, un ome qu’a la Fe di Biòu e l’Amour de la Lengo Nostro. Es lou drole d’un cavalié valènt qu’a sachu, sa vido touto, èstre un fidèu de la Manado Lafont.

Nous debano, dins soun libre, l’istòri dóu chivau, de pouèmo (coume Pèr la Fe di Biòu), de souveni de passejado e d’espacejado emé la Nacioun Gardiano, que siegue en Arle, Eimargue o Avignoun.

La bouvino, segur, es sèmpre presènto dins aquéli tèste escri pèr un ome qu’es mai que souvènt d’à chivau. Ai nouta la crounico L’autouno en bouvino que fai lou dedu de l’obro di manado, emé lou voucabulàri especiau qu’es defini emé precisioun. Ai bèn ama lou raconte Nouvè l’enfant soulet. Es uno legèndo sourtido de l’imaginàri de Mèste Brun, que met en sceno Folcò, lou Marqués, e un pichot ermitan de dès an en quau se dounè un seden coume jouguet de Nouvè.

Lou prouvençau gardés de Gabriéu Brun es clar, linde, es la lengo de la Camargo, que saup parla de si vaste, de sis ome, de Fonfonne, di biòu, di chivau e di becarut. Darniero noto : fau legi aquest Councous de couscoussejado davans li rampar emé li 24 cavalié qu’èron tóuti de gardian de trìo, e que semblavon pas de santoun!