Nivous et esclargidos

Vaqui un libretoun de pouèmo, un de mai dirés? Noun. Es de pouèmo que nous arribon d’en Ceveno e qu’un ome, tras que couneigu dóu tèms qu’èro courrespoundènt loucau dóu quoutidian marsihés Le Provençal, avié escri dins la lengo de soun brès : lou cevenòu. Ié disien Paul Deleuze, es de dire Pau de l’Éuse (1911-1994). Èro nascu à Porto, avié fa carriero dins l‘ensignamen e èro devengu lou direitour dóu coulège de Ginoulha. Escriguè de pouèmo en cevenòu, dins la grafìo mistralenco asatado à soun parla. Es Ive Gourgaud, lou Raïoulet de Sant-Martin de Valgalgo, que lis a recampa. Se n’en voulès un escapouloun, vaqui la debuto de Iéu! parlé patoues...! : - Ero fièro ‘n Chambourigau - De Bello Pouïlo à Pont de Rastel - Campejavé moun troupéu - E vers dets ouros fasié cau! Avièi set! Tiravé ‘no lengo séco - Coumo ‘n luser souto ‘n léco! Lou recuei porge 27 pouèmo en lengo raïolo emé coume titre, en respetant l’autour, Nivous et esclargidos. Es lou testimòni d’un tèms, pas trop liuenchen, que la lengo nostro èro bèn vivènto dins li serre cevenòu, d’un tèms que lou mounde travaiavon si castagnié e se regalavon de clinton. Se parlavo naturalamen e noun coume dins li libre di nouvèu gramatician. Fai mestié, pèr tóuti, de tasta e de saboura aquest parla tant proche dóu prouvençau roudanen.