I’a 70 an, la crido dóu 18 de Jun

I’a 70 an d’acò, à Loundro, un ome s’aubourè acoumpagna d’uno pougnadeto de fidèu, pèr refusa lou mau-destin de l’armistiço. Franço èro d’àginoui, em’ uno armado en desbrando mau-grat que se siguèsse batudo, e de milioun de gènt sus li routo que fugissien davans lis Alemand.

Aquest ome èro lou generau de Gaulle, un militàri que faguè pièi de poulitico après la Liberacioun e que demessiounè, en 1969, bord qu’uno majourita avié rejita soun referendum sus la regiounalisacioun.

Dins tout acò, nautre, avèn de reteni l’eisèmple de l’ome refusant la desfacho e decidant de countunia de lucha.

Es en acò que vous counvidan, amigo e ami legèire di Nouvello.

Vesèn dins nòsti vilo, nòsti vilage, nòsti quartié, l’avalimen d’uno soucieta qu’a perdu sis amiro, saup plus mounte vai e queto sara sa destinado.

I’a la questioun de la lengo - prouvençalo - mai tambèn la questioun dóu pople qu’a crea aquesto lengo, l’endrudissènt generacioun à cha generacioun, mai que vèi de longo l’arribado de poupulacioun nouvello, de culturo forço diferènto, e qu’es pas eisa d’assimila au moudèle prouvençau.

I’a l’envirouno, menaçado pèr lis ativeta umano, emé li flume, ribiero e napo freatico empouisouna, coume aquelo de l’urbanisacioun dessenado que rousigo e councho li terro agricolo.

I’a la questioun de nosto agriculturo emé lis ermas qu’envahisson li campagno, bord que nòsti prouducioun soun en councurrènço emé d’impourtacioun que soun pas encadrado.

I’a l’arrarimen de nòstis ativeta endustrialo, souvènt desloucalisado dins lou fourestié, emé coume counsequènci la chaumo d’uno bono part de la poupulacioun.

I’a la questioun de l’Éuropo, qu’es pas uno Éuropo di Pople, qu’adounc es pas aquelo qu’avèn vougudo e que faudra bèn faire un jour.

I’a, en Franço, la menaço d’un desequilibre entre l’estat centralisa, is ordre de Brussèlo, e li couleitiveta terradourenco (coumuno, païs, gràndis agloumeracioun, despartamen, regioun) procho de la poupulacioun e que déurien agué mai de poudé.

I’a la questioun de la liberta de counsciènci, garantido pèr la lèi de 1905, mai que fuguè facho pèr nosto soucieta eissido de la civilisacioun gregaulatino e pastado d’èime judeò-crestian

Tout acò fai que la toco majo que se devino èi de RESISTA, pèr tóuti li mejan poussible, à la desparicioun dóu Pople de Prouvènço, à la destrucioun de nosto identita founso, pèr assegura la sauvogàrdi dóu pais nostre qu’avèn de lega i generacioun mountanto.

Es pèr acò, amigo e ami legèire, que vous demandan de vous groupa en coustituïssènt de nouvèllis assouciacioun prouvençalo e de li durbi, dóu mai que poudrés, à l’analiso e à la recerco de la mestrìo di proublèmo que desvarion noste soucieta.

Utilisas, pèr acò, li dispousicioun de la lèi de 1901 sus lis assouciacioun e nousas, sus lou terren, de liame emé lis àutris assouciacioun prouvençalo.

En aquest 18 de jun de 2010, es uno crido de RESISTÈNCI que mandan.