Aquest an 2010, la Federacioun Aupiho-Durènço festejara soun anniversàri 40en, lou dissate 14 d’avoust.

Aquest evenimen se debanara dins la viloto de Moulegés, ounte s’atrobo lou Mounumen à la glòri dóu chivau de tiro. Anen retrouba li 13 Soucieta e Counfrarié dedicado à sant Aloi, sant Jan e sant Ro, que coumpauson nosto Federacioun.

Anen rèndre óumage à nòstis ancian que se soun regroupa dins l’an 1970, pèr garda e sauva aquesto meravihouso tradicioun di Carreto Ramado.

Tóuti aquéli gènt arderous èron presidènt de Soucieta o de Counfrarié, me permetrés de li nouma : Messiés Arnest Vernet, de Castèu-Reinard, Adrian Simian, de Maiano, Emilo Faure, de Moulegés, Enri Bertrand, de Rougnouna, Louïs Gaffet, d’Irago, Marcèu Pauleau, tambèn de Rougnouna, Pau Gervais, de Sant-Estève dóu Gres, e lou darnié, Ramoun Ayme, de Gravesoun, vue presidènt de valour que, de tout segur, an countribuï à preserva nòsti Carreto Ramado.

Elegiguèron coume presidènt Moussu Arnest Vernet e despièi, tres presidènt se soun sucedi : Messiés Crestian Giraud, de Moulegés, Miquèu Bertrand, de Gravesoun e, voste servidou, Patrice Manchon, de Novo.

Siéu segur qu’anen se retrouba nombrous pèr aqueste jour de remarco, emé soun bèu prougramo, plen d’estrambord, uno messo cantado davans lou Mounumen dóu chivau de tiro, li cavalié, li group fóuclouri, uno proucessioun emé li bandiero, li sant, la benedicioun, li membre di Counfrarié, li damo e li chatouno qu’auran carga lou vèsti, amé 40 chivau de tiro, quaranto an, quaranto chivau, e lou chivau dóu presidènt que fara lou davans, tout acò pèr lou bonur de tóuti.

Fau pas remanda à l’endeman ço que se pòu faire vuei, rendès-vous lou dissate 14 dóu mes d’Avoust, pèr ounoura e festeja nòsti sant patroun, li bon sant Aloi, sant Jan e sant Ro.

Longo mai pèr nosto bello Federacioun e vivo la Tradicioun !