Frédéric Mistral ilustre e descouneigu

Pèr la Fe di Biòu e l’Amour de la lengo

Ensignadou.

Prouvèrbi pèr l’estiéu qu’arribo.

Green Peace

Editouriau :
Me dison laguiole.

Estage de Lengo e de Culturo Prouvençalo.

L’Evenimen :
I’a 70 an, la crido dóu 18 de Jun.

Cochabamba : Lou Pache di Pople .

Bilenguisme dins li liò publi.

De voues se soun amoussado.

La Ciéutat en fèsto.

Councours di Jouine de Prouvènço

23en Troufèu de la Mirèio d’Or

Santo-Estello au païs di bastido.

Li gènt d’eici.

Trin di Fèsto e Manifestacioun Prouvençalo.

34en Festenau Prouvençau.

Federacioun di Carreto Ramado.

Carreto Ramado

Targo Prouvençalo.

Espacejado dóu barrulaire à velò.
Lou prougrès...

Leoun de Berluc-Perussis.

Me dison Ventour.

Mistral e lou plantun.

Mot e biais de dire prouvençau.

Trilougìo prouvençalo n° 2 de Roubert Aprin

Nivous et esclargidos






Lou prougrès...


Fin d’Abriéu, ère encaro un cop de mai dins lou garage de pedala sus lou velò d’oustau raport au marrit tèms que n’en finissié plus : mistralas, plueio e fre à pas bouta ’n chin deforo. Mai mounte n’en soun dóu rescaufage de la planeto? Pamens, me fasiéu pas de marrit sang, qu’ère segur qu’au mes de Jun, lou tèms sarié proun bèu - o alor, que lou quiéu me pèle - pèr faire uno bello escourregudo sus nòsti pichòti routo de Prouvènço.

Mai aqui, ma fisto e dins moun garage, me passavo coume souvènt proun de souveni dins la tèsto e vaqui que me boutère à pensa dóu prougrès!

Vaqui ’n tèmo que se poudrié n’en parla d’ouro e d’ouro e n’en mascara milanto pajo! Proubable que chasco generacioun despièi que l’ome es sus terro a pouscu dire qu’a viscu uno pountannado de prougrès à respèt de la generacioun d’avans. Anaren pas cerca trop liuen à rèire e s’acountentaren de coumença pèr lou siècle 19en que se pòu qualifica de siècle di gràndis envencioun toucant un mouloun de doumaine coume l’endustrìo, li trasport (naciounau e internaciounau), l’eleitricita, la medecino, l’educacioun e d’autre encaro.

Au siècle passa, lou 20en dounc, que se pòu dire qu’es esta lou nostre bord que sian tóuti nascu dins aquéu d’aqui, li prougrès an countunia emé l’aviacioun, li mejan de coumunicacioun (televisioun, internet, telefounet), l’ome dins l’espàci, lou premié pas sus la Luno e majamen dins la medecino, que si prougrès espetaclous an permés d’alounga l’esperanço de vido. Lou prougrès se vèi pièi chasque jour dins la vido vidanto e l’on pòu dire que vivèn miés que nòsti grand e meme que nòsti gènt. Mai sian-ti pèr acò mai urous?

Dins Lou Pouèmo dóu Rose

Pèr un pau chifra, vaqui ’n escapouloun dóu Pouèmo dóu Rose, darriero grando obro de Mistral espelido en 1897, lou pouèto manjavo alor dins si 67 an. Es un pouèmo proun coumplèisse. A 12 cant, coume Mirèio e aperaqui 4.000 vers sènso rimo. L’istòri se debano vers 1830 e councernis l’anciano batelarié dóu Rose que fasié la remounto di batèu emé de chivau de tiro caminant sus lou camin d’alage en ribo dóu grand flume. Sian dins la pountannado que la batelarié à vapour (lou prougrès) vai descassa la batelarié d’alage. Se pòu legi dins lou Cant I :

"…Li Coundriéulen! Lou Rose, gràci à-n-éli, Èro un grand brusc plen de vounvoun e d’obro. Tout acò vuei es mort e mut e vaste…."

Lou Cant XII retrais la fin de tout aquéu mounde. Lou Caburle - qu’es lou noum d’un batèu que remountavo lou flume emé si barco tira pèr de chivau - se fai turta pèr un batèu à vapour, lou Croucoudile, e que Mistral n’en fai uno descripcioun moustrouso. Vaqui :

"…Apareiguè subran, fendènt lou Rose,
Un long batèu à fiò. Se rebrassèron
Tóuti li marinié, gueirant lou moustre.
En poupo, Mèste Apian, devengu pale,
Arregardavo mè la nau magico,
La nau qu’arpatejavo emé si rodo
E remouvié d’oundado espetaclouso
E fourmidablamen ié venié subre.
Arrasso ! ié cridè lou capitàni,
E tóuti dóu batèu ié fasien signe
De se gara davans. Mai tau qu’un roure,
Imbrandable à la barro, lou vièi mèstre
Respoundeguè : - Mandrin! que lou Caburle
S’escarte davans tu? Lou Rose es nostre…
E fa tira la maio, milo-diéune!...."

Mai, pas pus lèu Patroun Apian, lou mèstre dóu Caburle, acabo si paraulo que lou Croucoudile se rounso dre davans e arrapo la premiero barco de la remounto. Tout lou trin de batèu, vai èstre butassa, li chivau, tóuti religa i barco pèr la maio, recuelon e van faire un cabussado espetaclouso dins lou Rose souto lis iue espaventa dóu capitàni e li cridadisso desesperado di carretié.

La fin di meissoun tradiciounalo

Un autre coumentàri proun significatiéu sus lou prougrès se pòu legi de sa plumo dins Memòri e Raconte (1906), au chapitre IX. Mistral, aqui, ensisto sus lou caratère irreversible d’aquesto evoulucioun :

…" Aro, li meissoun vengudo, vesès d’espèci d’aragnasso de cranc gigantesc apela meissouniero, qu’arpatejon ourrible à travès de la plano, que rèsson lis espigo emé de coutelas, que ligon li gavello emé de fiéu d’aran! pièi, li meissoun toumbado, d’àutri moustre à vapour, d’espèci de tarasco, li baterello, arribon, que dins sis entremueio engoulisson li garbo, n’en frison lis espigo, n’en chapouton la paio, n’en cernihon li gran. Tout acò à l’americano, tristamen, couchousamen, sènso cansoun ni alegresso (…). Es lou prougrès, es l’èrpi terriblamen fatalo, que i’a rèn à faire contro e rèn nimai à dire : fru amar de la sciènci dóu bèn emai dóu mau…. "

Lou prougrès dins la vido vidanto

Bèn segur que noun fau èstre autant pessimisto que Mistral. Despièi bèn lèu un siècle que lou pouèto a defunta, s’es proun vist e viscu lis avantage que nous a adu lou prougrès; acò noun se pòu nega. Mai, dins aquesto pountannado de vuei que poudrié perdura proun tèms, ounte lou tristun fai rasclet à l’estrambord, avèn bèn besoun d’un pau galeja. Adounc veici quàuquis eisèmple, d’ùni viscu, d’autre de ficioun, toucant lou marrit coustat dóu prougrès e de l’evoulun de la soucieta dins la vido vidanto.

L’amenistracioun

As besoun d’entre-signe amenistratiéu (EDF, Impost, SNCF…), fas lou numerò de telefono que coumenço pèr 08. Après ta sounarié, te vèn dins l’auriho uno musico que n’en finis plus, espères…, finalamen uno voues feminino se fai pièi ausi que te barjaco d’un trin d’infèr de paraulo que podes pas segui e que s’acabon toujour pèr picas 1, picas 2, picas 3, picas 4, picas 5…. As rèn coumprés e rèstes mè. Aqui, un long silènci e la voues, tourna mai, te dis à raisso la memo causo. As pas mai coumprés que lou premié cop, acò t’enfeto, piques uno chifro à l’asard e, bèn segur, toumbes sus un service que vouliés pas. Coume siés bèn educa, t’escuses avans de racrouca en disènt que te siés engana. Recoumences l’óuperacioun un cop de mai e un cop de mai fas chi. T’arrèstes, remandes ta telefounado au lendeman e vas pissa au founs dóu jardin pèr apasima toun iro…

Dins l’avioun

Sian en 1980, vouiages dins un avioun d’Air France, te baion à manja e te counvidon à béure ço que vos. Toun sèti es talamen large que se poudrié se i’asseta à dous.

30 an après, sian en 2010, rintres dins l’avioun en countuniant d’estaca ta centuro qu’à la douano t’an fa leva pèr passa lou countourrole. T’assetes sus toun sèti que, se boufes trop fort, empegues un cop de couide dins li coustello de toun vesin. S’as set, l’assistaire de vòu te presènto la carto que li pres soun pas de crèire e, quand siés arriba, dises rèn se te menon à la douano e t’empegon un det dins lou quiéu pèr saupre se i’as pas escoundu de drogo!

Quàuqui sceno escoulàri

Jan jogo dins la court de recreacioun, fai la courso em’ un coumpan , s’embrounco e se garço pèr sòu. Soun ensignarello s’acampo lèu, lou pren à la brasseto pèr l’assoula.

- 1980 : en dos minuto, Jan vai miés e countùnio de jouga.

- 2010 : l’ensignarello es acusado de perversioun sus minour, se retrobo à la chaumo e aganto tres an de presoun.

La vitro petado

Gastoun peto la vitro d’uno veituro dóu quartié. Soun paire sort la centuro e ié fai coumprendre li causo!

- 1980 : Gastoun fara mèfi lou cop venènt; trachis nourmalamen, fai de bons estùdi e vèn un ome d’afaire de trìo.

- 2010 : lou paire se fai arresta pèr mau-tratanço sus minour e aganto sièis mes de presoun. Gastoun s’amigo em’ uno chourmo de jóuini maufatan, fai bestiso sus bestiso que lou paire i’èi plus pèr lou surviha e se retrobo tambèn en presoun...

La fin di coungié

1980 : après agué passa 15 jour en famiho sus la Coustiero d’Azur, dins uno caravano tirassado pèr uno 403 Peugeot, li vacanço s’acabon. L’endeman reprenes lou travai e se passo rèn.

2010 : li vacanço acabado, de retour di Seichello, vouiage ourganisa tóuti fres coumprés, li gènt sóufrisson de desvèi e de depressioun. Lou mège ié marco uno semano d’arrèst de travai...

E pèr clava

Bèn segur qu’ai douna çai-subre uno interpretacioun un pau divagado de la soucieta de vuei mai sarés tóuti d’acord, me pènse, pèr dire que li causo an bèn cambia toucant la soucieta, l’educacioun e lou biais d’èstre di gènt, aquéli trento darriéris annado, parai?

Dau! Fau resta óutimisto, mai pamens em’ un brisoun de vigilànci…

SIGNATURE



barre de fin de page


 
 

1122089