Leoun de Berluc-Perussis
ispiraire de Mistral

Leoun de Berluc-Perussis neisseguè en Ate lou 14 de jun de 1835 e mouriguè lou 2 de desèmbre de 1902 au castèu dóu Plan de Pourchiero, proche Fourcauquié. Es enterra dins la Tourre de Pourchiero, adounc de soun tenamen peirau i counfigno de Sant-Michèu e de Mano dins li Bàssis-Aup.

Li Berluc-Perussis tiravon d’uno noblo famiho loumbardo, li Berlucchi, establido à Fourcauquié au mens vers 1440, e d’uno famiho flourentino, li Peruzzi, aliado i Medicis. Sus soun escut d’armo trelusissié, sus champ d’azur, un perùssi d’or, valènt-à-dire uno pichoto pero fèro.

Pèr ié baia d’estrucioun, si gènt lou fisèron d’abord au pichot semenàri de Fourcauquié. Partiguè pièi à z-Ais pèr faire sis estùdi de dre. En 1856, se faguè marca au barrèu d’aquesto vilo. Coume èro pas trop gaiard, pousquè pas mena sa carriero d’avoucat coume l’aurié vougu e s’entournè à Pourchiero ounte, tout en faturant soun bèn, s’óucupè de questioun culturalo e de journalisme. Uno de si terro i’avié ispira soun escais-noum favouri : A. de Gagnaud. En foro de sis ativeta prouvençalo, èro ounoura d’un fube de cargo que l’óubligavon de faire lou tiro-veni entre z-Ais e Pourchiero. Èro sòci de l’Acadèmi de z-Ais em’ Ispeitour divisiounàri de la Soucieta Franceso d’Arqueoulougìo.

Lou militant prouvençau

Avié 18 an quouro, dins Le Mercure aptésien, faguè lou rendu-comte dóu Roumavage di Troubaire que se debanè à-z-Ais lou 21 d’Avoust de 1853, darrier acamp literàri prouvençau avans la foundacioun dóu Felibrige. Lou 15 de mai de 1855 publiquè dins Lo Gay saber, journau efemèro, uno noutiço sus li Canson dau carrateyron, obro satirico escricho pèr d’estudiant sestian au siècle XVIen.

Si proumié vers prouvençau (1) fuguèron publica en 1858, pèr Marius Feraud dins L’Abeilho prouvençalo. En 1872 baiè soun proumié tèste en proso à L’Armana prouvençau. En 1874, dins l’encastre di fèsto dóu 5en centenàri de la mort de Petrarco, fuguè foundado à soun aflat l’Académie du sonnet, soucieta duberto i lengo franceso e prouvençalo.

Es dins aquesto escasènço que se nousèron de liame d’estimo reciproco e d’amista entre Berluc- Perussis e Mistral. Un Almanach du sonnet que ié caup dedins d’obro de Mistral e de quàuqui felibre, fuguè publica à-z-Ais de 1874 à 1877. A coumta de 1860, li dous ome escambièron uno courrespoundènci que durè enjusquo la mort dóu Fourcauqueiren. A la longo dóu tèms, lou toun se faguè de mai en mai calourènt. En 1890, Mistral tratè Berluc-Perussis de caloge (2), titre que se dounavon antan li catau di counfrarié de penitènt. D’aqueste biais, Mistral fasié à soun ami l’ounour de l’enaura à soun nivèu.

En 1876, après la refoundo dóu mouvemen felibren, Leoun de Berluc-Perussis fuguè de la tiero di majourau. Baiè à sa cigalo un noum que i’èro mai que mai escari : Pourchiero. Sèmpre afana, bon ourganisaire, se pòu dire que fuguè un vertadié felibre de l’acioun. Entre-veguè tout d’uno que Pèire Devoluy èro de la memo traco qu’éu :"Devoluy, es éu l’espèro de la generacioun venènto, lou capoulié dóu cicle que s’apreparo…" (letro à Mistral dóu 25 d’abriéu de 1899).

La nauto poulitico

Se Mistral e Berluc faguèron pas de poulitico de partit, se pòu dire pamens que faguèron de geoupoulitico. Lou Fourcauqueiren, amor de l’óurigino cisaupino de sa famiho, èro lou miés plaça pèr jouga un role de raprouchamen emé l’Itàli em’ esvarta la sorre latino de l’alianço emé lis empèri centrau.

Aquélis esfors debutèron emé li Fèsto de Petrarco en 1874, à Vaucluso, e se perseguiguèron en 1890 emé li fèsto dóu 6en centenàri de Beatris à Flourènço. Dins uno letro, dis au Maianen :

-" Voudrien que lou magistre e quàuqui cepoun dóu Felibrige anèsson assista, vers lou mitan de mai, à la clouturo de l’Esposizione Beatrice, pèr afirma, à la fàci de l’Itàli e de la Franço, la fraternita di nacioun bessouno. Proumeton uno receipcioun triounfalo. La dato d’aquelo entre-visto marcarié dins l’istòri de l’alianço roumano…E se pèr cas, vous èro à l’impoussible, fau que bouleguès Rouma, e li jouine, e li de Paris, pèr fin que vagon, noumbrous e afeciouna, à-n-aquelo acampado amistouso e grandarasso, ounte l’obro dóu Bismarck sara belèu abouseirado, Diéu ajudant."

Coume Mistral, cercavo de plaça la persouno umano dins lou juste mitan, qu’es pas un clot mai uno auturo.

En 1886, pèr l’acampado qu’avié alestido à Ganagòbi, prenguè la paraulo pèr fin de despassa lis óupousicioun entre blanc e rouge :

-" O, lou Felibrige vouo fa uno revoulucien…la revoulucien se fara sènso dinamita…Eici l’esperit s’enauro pus aut que lei masquinarié d’eilavau debas. Lou chamatan dei lucho, la cridadisso dei discussien mouonton pas jusqu’à nautre. An bel mena de brut lei bramaire aperalin dins la baisso; ousen eissamount que la vouai majestuouso de la Durènço e lou cansouneja dei bouscarlo…Car messiés, es uno obro de raço, de religien filialo, de respèt naciounau l’obro qu’eici sian de segre. L’ambicien dei felibre es d’ensigna ou pople l’orguei dóu sang que raio dins se, de li aprene la glòri de soun passat, de sei tradicien, de sei mounumen, de sa lengo, de tout ço que l’universita an óublida de metre dins lou prougramo deis escolo e dei coulegi…mai te parlon pas de ce que te toco enca de pu pròchi, lei souveni de toun vilà gi, les belles acien de tes paire, l’istòri santo e amirablo de la Prouvènço…Vaqui la revoulucien qu’avèn jura de faire : èi de prouclama cènt an après Vuetanto nòu, la liberta de la parladuro, l’eigalita dei douei lengo naciounalo de la Franço".

Lou teourician dóu regiounalisme

Dins la Reneisènço Prouvençalo, i’aguè dous grand teourician : Mistral e Berluc-Perussis. Au segound ié sian devènt de l’idèio latino.

Après li Fèsto de Petrarco de 1874, que n’en fuguè lou cepoun, Leoun de Berluc-Perussis ourganisè, en 1882, li Fèsto Latino de Fourcauquié. Lou renouvaire de la lengo roumanesco, Vasile Alecsandri, èro presènt en coumpagno de Guihèn Bonaparte-Wyse (1826-1892) (3) e dóu comte de Toulouso-Lautrec (1820-1888) (4).

Se pausè la proumiero pèiro d’uno obro belamen simboulico : Lou viadu di latin destina d’encamba lou vabre dóu Viou. Pèr aquesto inaguracioun, li representant de cade pople de lengo latino aduguèron un message de freiresso declina en latin, francés, prouvençau, italian, espagnòu, catalan, roumanesc…

Berluc-Perussis fuguè tambèn un arderous federalisto (5) e Frederi Amouretti (1863-1903) (6), un di dous redatour dóu Manifèste di jóuini felibre federalisto de 1892, a jamai escoundu que, pouliticamen, devié tout à la pensado dóu Fourcauqueiren. Es tambèn Berluc que mandè lou councèt de regiounalisme desvouloupa un pau mai tard pèr Jan-Carle Brun (1870-1946) foundadou de la Federacioun Regiounalisto Franceso (FRF).

De soun èime fegound sourtiguè peréu lou mot de matrìo (7) que devié péu-tira enfin li Prouvençau de la dialeitico grando patrìo/pichoto patrìo ounte lis avien enfanga. D’efèt dins noste amour civi poudèn pas destria ço que i’a de grand o de pichot. I’a parage de bon entre l’endré ounte sian esta bressa pèr nosto maire e, lou drapèu di paire, qu’avèn d’apara, se lou fau, sus lou prat bataié. Sus lou plan literàri, Berluc-Perussis es counsidera coume un prousatour de trìo. Si Conte prouvençau fuguèron estampa dins un soulet voulume en 1920, parié pèr si Sonnets. Sis oubreto e discours soun escampiha dins de noumbróusi publicacioun.

Noto :

- Vers manda à-n-un councours dubert à l’óucasioun de la traslacioun di cèndre dóu pouèto marsihés Pèire Bellot (1782-1856). - Dóu grè kalos geron : bèl ancian. - Guihèn Bonaparte-Wyse : felen, pèr sa maire, de Lucien, fraire de Napouleoun-Bonaparte. Arderous proumoutour de l’Idèio Latino emé Carle de Tourtouloun e Anfos de Roque-Ferrier. Enfluenciè Mistral dins l’ourganisacioun de soun mouvamen. - Toulouso-Lautrec (Ramoun de) : prouprietàri, membre de l’Acadèmi di Jo Flourau à Toulouso. - Ispira pèr la pensado de Frederi Le Play (1806- 1882), un di foundadou de la soucioulougìo, partisan de la decentralisacioun. - Frederi Amouretti : nascu en 1863, mouriguè jouine en 1903. Èro journalisto. - Lou councèt de matrìo sarié esta emplega dins l’Antiqueta pèr Plutarco.