Li felibre en soun tèms e la Reneissènço d’O



Felipe Martel
Que li libre sus la Reneissènço Prouvençalo e d’O au siècle 19 se poscon trouva à mouloun, es un bèn pèr tóuti lis afouga de la culturo nostro. Demié d’autre, avèn leva de Reinié Jouveau, Histoire du Félibrige (1876-1914) e de Simoun Calamel e Doumenique Javel, La langue d’Oc pour étendard, Toulouse, Privat, 2002. Mai, vuei, avèn de parla d’un que vèn tout bèu just de creba l’iòu, bord qu’aquest estùdi, à despart, es vertadieramen necite pèr tóuti li que volon avança mai liuen dins la coumprenènço de l’istòri nostro, s’agis de Les Félibres et leur temps - Renaissance d’Oc et Opinion - 1850/1914, de Felipe Martel.

Lou reviéuda de la lengo d’O

La valour majo d’aquel oubrage, que lou desseparo de tóuti lis autre, tèn dins sa naturo : es un pres-fa scientifi, bord que s’agis de la publicacioun d’uno tèsi d’Estat d’istòri, aléujado pèr èstre à la pourtado d’un publi mai larg que lou dis especialisto dis Universita.

Aléuja qu’aléuja, rèsto pamens un libre drud de 690 pajo. Felipe Martel fuguè carga de recerco au C.N.R.S. (Cèntre Naciounau de la Recerco Scientifico) e, aro, es proufessour à l’Universita Pau-Valéry de Mount-Pelié. Sa tèsi la preparè, d’annado à-de-rèng, souto l’empento de Maurise Agulhon, lou mèstre de l’istòri countempourano qu’acabè, pièi, sa carriero en Sourbouno.

Aquéu travai d’aqui mostro coume lis escrivan recampa darrié Frederi Mistral assajèron de tourna faire, de la lengo d’O, la lengo de la creacioun literàri la mai nauto, ço qu’èro estado dóu tèms di Troubadou. Se vèi coume li gènt de soun epoco lis an percebu, ço que n’an di, autambèn dins soun endré coume à Paris, capitalo dóu sistèmo culturau francés.

Mai lou proujèt d’aquélis escrivan a trepassa l’aventuro literàri pèr se trouba dins lou camp pouliti e istouri. Frederi Mistral e sis ami, dins uno Franço que ié segnourejo l’idèio de l’indivisibleta, fan lume sus lou proublèmo de la diversita di lengo de Franço. Pièi, l’estùdi douno à vèire si demando pèr lou prouvençau, la lengo d’O, mai, autambèn, pèr la decentralisacioun coume pèr lou federalisme.

De Diouloufet à Mistral

Dis annado 1850 à 1914, l’oubrage seguis li piado de la Reneissènço literàri nostro e li reacioun qu’aquelo d’aqui coungreio dins l’oupinioun. Gafo emé li dato! S’agis, aqui, d’un estùdi sus la chourmo d’escrivan acampado à l’entour de Mistral e que ié disien Felibrige. Es pèr acò que lou titre entameno l’estùdi en 1850. Mai Felipe Martel esplico proun, dins lou chapitre Naissance de la Renaissance que la Reneissènço vertadiero dis escri dins la lengo nostro a coumença bèn avans. Lou Sestian Diouloufet alargo si Magnans en 1819, Lou Troubadour natiounaou dóu Tarascounen Desanat parèis en 1830, Las Papilhotos de Jasmin d’Agen soun de 1835, lis escrivan marsihés s’atrobon à mouloun e dintre éli, la proumiero edicioun dóu cap d’obro de Vitour Gelu, si Cansoun, es de 1840. E parié pèr la prèisso, la debuto dóu journau semanié marsihés de Desanat, Lou Bouil-abaisso se fai en 1841.

Maiano-Paris-Maiano, Terminus

Felipe Martel acabo si recerco emai soun libre sus l’annado 1914. Pèr acò, vesèn dos causo : la proumiero, es que, pèr lis especialisto universitàri de l’istòri countempourano, lou siècle 19en s’acabo aquesto annado, pèr fa plaço au siècle 20en, la segoundo tèn dins la despartido de Frederi Mistral, lou 25 de mars de 1914. Uno epoco diferènto pèr lis aparaire de la Culturo Prouvençalo coumenço. La tèsi bastido pèr Felipe Martel se partis en quatre. Chasco partido, à la grosso, seguis uno perioudisacioun e soun titre n’en pourgis lou sujèt. Rescountren, à-de-rèng : Le décor et les acteurs, À la conquête de Paris, Paris et le joujou Félibrige , Paris-Maillane, Terminus.

La bibliougrafìo de 27 pajo es interessanto pèr tóuti li que volon cava mai founs dins l’istòri de la Reneissènço prouvençalo. Se ié podon trouva autambèn la B.N.F. (Biblioutèco naciounalo de Franço) (Paris) coume lis Archiéu despartamentau dis Àutis-Aup, di Bouco-de-Rose, de Droumo, de Gard, d’Erau, de Vaucluso, lou Museon Arlaten, la Mediatèco Ceccano (Avignoun), lou Palais dóu Roure, lou Museon Mistral de Maiano, emé, chasque cop, li referènci coumplèto dis article emplega.

Dins aquesto bibliougrafìo s’atrobon, tambèn, tóuti li courrespoundènci publicado de Mistral e un moulounas de libre à soun prepaus coume tóuti lis article de prèisso publica à Paris, en prouvinço emai à l’Estrangié sus Mistral e lou Felibrige entre 1850 e 1914.

L’ensèn di partido dóu libre pourgis 10 chapitre apassiounant pèr lis afouga di Letro Prouvençalo. D’aquéu tresor de sciènci, se n’en pòu pas faire de resumit bord qu’es trop drud. Aquéu libre s’amerito d’èstre legi e tourna-legi, adounc, n’en vaqui quàuquis escapouloun.

Opération Mirèio

Vincèns e MirèioDe la dousenco partido de l’estùdi, À la conquête de Paris, ai resumi un tros dóu chapitre proumié que ié dison Opération Mirèio (p.170 à 210). D’ùni que i’a se creson que lou sucès de Mirèio es vengu tout soulet, coume pèr cop d’astre, d’autre, un pau mai assabenta, sabon que Lamartine e soun 40en Entretien de Littérature, pareigu à la mita dóu mes de mai de 1859, i’es pèr quaucarèn.

Lou passage Opération Mirèio retrais de qualita de Mistral , pas gaire couneigudo. D’efèt, en mai d’èstre noste plus grand escrivan (tres epoupèio reüssido), Mistral es un grand coumunicant, un grand ourganisaire. Felipe Martel enrego si piado : bèn avans la sour-tido de Mirèio de l’estamparié Seguin en Avignoun, Mistral s’es emplega de coungreia tout un fube de manobro goustouso.

Lamartine e lou Vergèli de la Prouvènço

Tre febrié de 1856, avans meme lou clava de soun cap d’obro, n’en fai legi un tros à-n-Adòufe Dumas, un Prouvençau tourna-manda en Prouvènço pèr soun ami, lou Menistre Fourtoul, pèr fin de se cura - qu’èro un gros malaut - tout en travaiant pèr recampa de cant poupulàri prouvençau. En avoust de 1858, Mistral decido d’ana à Paris pèr ié trouba un prefacié à sa Mirèio : Quelque gros personnage de la littérature.

Lou qu’es vengu soun ami, Adòufe Dumas, fa parèisse, dins lou journau naciounau La Gazette de France, un article anounciant la mountado à Paris de Mistral, la vengudo dóu Virgile de la Provence. Buta pèr Mistral, Dumas se met en bousco d’un prefacié d’impourtanço pèr Mirèio, emé l’ajudo de l’escrivan nimesen, Jan Reboul. Se pènso, un moumen, à George Sand o Aleissandre Dumas, mai aquéu d’aqui es bounapartisto trop marca. D’un autre biais, Lamartine, éu, mens marca dins si chausido poulitico (mau-grat soun acioun dins la Revoulucioun de Febrié de 1848) gardo un gros prestige literàri. Reboul e Dumas, chascun de soun coustat, prenon lengo emé Lamartine.

Lamartine voudra-ti bèn sousteni l’obro de Mistral? Lou Maianen, après agué fa uno campagno de proumoucioun pèr soun libre à Nime e à Marsiho, arribo à Paris lou 20 de mars de 1859. Fara la virado de tóuti li criti impourtant coume l’escriéu, tre arriba, à Roumanille : Je ferai peu à peu connaissance de tous les illustres […] il s’agit de faire lire Mirèio et d’obtenir des articles de fond.

E l’Opération Mirèio marcho! Sus l’obro mistralenco, 54 article soun publica en 1859, 20 pèr la prèisso prouvençalo, 3 à l’Estrangié, 31 pèr la prèisso parisenco que douno lou la à la critico. Es bèn mai que d’ùnis oubrage francés à sa sourtido : Leconte de Lisle, Poèmes antiques (1852) a pas mai de tres article, coume Baudelaire, Les Fleurs du Mal (1857), quouro Flaubert, emé Madame Bovary (1857) a pas mai de vint article. La prèisso parisenco de gaucho coume la de drecho fai d’article ditirambi sus Mirèio.

Avans tout acò, Adòufe Dumas avié mena Mistral vers Lamartine…La resulto n’en fuguè un cop de tron emé lou 40en Entretien du Cours familier de littérature de Lamartine em’ uno critico estraourdinàri coumparant Mirèio is epoupèio d’Oumero. L’ouperacioun Mirèio a capita bèn. Mai, pèr n’en saupre mai que ço que n’a pourgi ‘quéu resumit, fau se coungousta di 40 pajo que ié soun counsacrado pèr Felipe Martel.

Durbès-nous la caisso!

Dins la partido tresenco, fuguère forço interessa pèr lou chapitre quatren, quouro trato dóu federalisme, dóu regiounalisme e de la decentralisacioun. Es tóuti li premiço de l’óufensivo di Jouine Felibre Federalisto que se vèi d’en proumié, tóuti lis assai, d’annado à-de-rèng, que fuguèron fa, bèn avans lou Manifèste Federalisto legi pèr Amouretti lou 22 de febrié de 1892, davans li felibre parisen acampa.

Lou founs de l’afaire, que d’aiours desseparara li mistralen en dous camp, sènso meme parla di proublèmo de coulouracioun poulitico franceso dis un emai dis autre, es de saupre se se dèvon batre d’en proumié pèr la lengo o pèr lou païs e lou pople que saran li sauvadou de la lengo.

Pèr quant à iéu, me bastara de douna lou quicho-clau de Felipe Martel pèr faire lingueto à nòsti legèire : Le Félibrige ne triomphe pas, mais il ne s’évanouit pas davantage dans le néant. […] Car il y a toutes ces foules. Parmi tous ceux qui suivent les manifestations félibréennes, il y a certes les simples curieux, les goguenards, les malveillants, les passants. Mais il y a aussi ceux qui ont entendu l’appel de la langue […] et qui vont suivre […] près à retrouver à leur tour les rêves et les ambitions de leurs aînés […] Toute la foule de ceux qui de génération en génération participent à l’interminable veillée funèbre de leur langue, qui frappe inlassablement aux parois de son cercueil - POUR QU’ON LUI OUVRE.

signat Dionis


couverture

barre de fin de page


 
 

1 433