Ano, ma sorre Ano?

Lou tèms passo, li jour, li semano, li mes, lis annado e ma sorre Ano, quihado sus soun agachoun, coumenço de prendre racino. A bello d’aluca l’ourizoun, vèi que la route qui poudroie et le soleil qui flamboie pèr l’aveni di lengo de Franço.

Fau dire que lou nouvèu menistre de la culturo se n’en garço pas mau, que lou gouvèr a d’àutri soucit e que, fin finalo, d’eleicioun en eleicioun i’a pas grand causo que boulego dins nosto republico.

Coume? dirés, mai sian marca desenant dins la coustitucioun acò ‘s-ti pas un prougrès?

Segur que ié sian, mai es-ti que i’a uno diferènci à respèt de l’estamen d’avans? La realita es noun! L’anciano menistro de la culturo, qu’avié afourti que lou gouvèr tendrié si proumesso, qu’aurian uno lèi especifico, es estado escoubado. E, partènt d’aqui, li proumesso soun toumbado dins lou demembrié.

Avèn agu que 4 nouvèu titulàri dóu CAPES de Lengo d’O pèr l’annado 2010, alor que l’ensignamen de nòsti parla interèsso 33 despartamen francés!

Sian toujour dins la memo lougico jacoubino, uno lougico que s’espremis sèmpre à bèl èime dins li mitan pouliti e filousoufi naciounau francés, coume se i’avié pas d’àutri menaço pèr l’unita dóu païs que l’aparamen di racino e di lengo regiounalo...

Lou group d’estùdi parlamentàri pèr li lengo regiounalo déurié, se dis, despausa un proujèt de lèi sus lou burèu de l’assemblado naciounalo.

D’un autre las, e aqui sian au pica de la daio, d’ùnis óusservaire afourtisson que rèn se fara sènso un quicha poupulàri (la famouso pression sociale) counsequènt, mouvemen qu’aurié besoun d’un grand envanc unitàri. Veiren bèn.

Pèr aro nous fau alesti e reüssi la rintrado de tóuti nòstis ativeta assouciativo e, proubable, se teni lèst pèr uno moubilisacioun drudo se lou proujèt d’uno counsulto pèr cambia lou noum de PACA crebo l’iòu.

Ramentan à nòsti legèire que, pèr nàutri, Prouvençalo e Prouvençau, i’a pas d’èstre en chancello.

Lou soulet noum que pòu counveni à nosto bello Regioun es Prouvènço.

S’endevèn emé l’Istòri, la geougrafìo, lou climat, l’ecounoumìo e l’aveni.

Es à nous-autre tóuti de nous encagna pèr lou faire triounfla.

signature Roux

barre de fin de page


 
 

1117682