Is areno

Ai couneigu mi proumiéri courso de biòu après la guerro de 40, à Castèu-Reinard, en i’anant emé moun grand, un apassiouna de bouvino que fasié partido dóu Club taurin, presida pèr Jóusè Rossi, e i’anavian proun d’ouro...Tant que crousavian li gènt qu’anavon dina! Coume erian li proumié, prenian li clau dis areno encò dóu paire Pastouret que restavo just à coustat.

Au nord dis areno, i’a uno tribuno cuberto, à drecho de la tribuno, dins lou cantoun, uno contro-pisto pintado de jauno. À l’entr’ate, Cachoun, un ancian rasetaire, s’ajassavo dins un pichot lié de fèrri blu, ié bandissien uno vaco emboulado e, éu, s’en aparavo em’ un paro-plueio à mita estrassa.

Pepèi, avans la courso, discutavo emé li manadié, Blatière, Reynaud, Laurent, Thibaud e tout acò en prouvençau. Èro l’epoco di darriéri courso dóu Sarraié, un biòu gris e blanc, d’autre prenien la relevo : Vergesois, Clan-clan, pièi an pareigu li grand coucardié de renoum : Evèsque, Régisseur, l’espetaclous Vovo, que remplissié lis areno e que lis ome en blanc n’avien tant pòu, e venguè Goya, que se i’aubourè uno estatuo de soun vivènt! Li rasetaire se disien : Volle, li fraire Doulaud, Canto (pèr tua un biòu), Soler, Pascal, Sant-Juan, Falomir...Dins li barricado, dos renguiero de badaire (li biòu sautavon mens que aro) aplaudissien li dous rasetaire castèu-reinarden : Coeur e Ginoux.

Sus li gradin

À l’entour dóu round s’ausissié pas mau de refleissioun :

* Pendènt la courso d’un coucardié qu’èro pas dins soun bon jour, un badaire disié à-n-un coulègo :

- Aquéu biòu, crese que vendra bon! o encaro :

- Lou mai que pòu èstre bon es à l’adobo!

* D’un biòu que manco de vivacita : - Mai es pas un biòu! Es uno cabro! - Vas vèire que se vai jaire pèr faire un penequet!

* Arrivo quàuqui fes que la bèsti se tanco au mitan dóu round, sènso respondre i rasetaire e que se countènto de balança la tèsto d’un coustat e de l’autre, mai toujour aplanta, souto un mouloun de siblet, ço que fai dire à-n-un regardadou : - Éu, de segur, se dèu crèire au tenis à Rouland Garros...

* Lou Petassa, un biòu de Jo Durand, avié la particularita d’èstre negre e blanc, ço que devié veni d’uno ascendènci espagnolo. Sus li gradin, un parèu es asseta, e la femo dèu pas veni souvènt bada la courso à la coucardo : - Digo-me, Leoun, perdequé aquéu biòu es di dos coulour? E Leoun, éu, qu’es un afeciouna qu’amo proun galeja :- Li biòu, quouro soun de vedèu, li pinton, la proumiero coucho de blanc, pièi la segoundo de negre!.. Aquéu, à la repasso, an degu manca de pinturo!...

* En principe, li feissello que tènon li gland dèvon faire sièis tour de la bano mai, bèn de cop, aquéu qu’encoucardo n’i’en fai faire que tres o quatre s’es un biòu que lou vòu espargna, mai quouro es un coucardié que vòu faire briha, subre-tout s’es un «barricadié», aqui lou manadié fai uno trenteno de tour, bèn sarra, e quàuqui cop bagno la feissello pèr que fugue mau-eisado à desmarmaia, ço que fai dire à-n-un regardadou : - Meme se fai fre, la bèsti se jalara pas li bano!...

* La recoumpènso à-n-un coucardié o un barricadié qu’a fa vibra lis amatour es de ié jouga Carmen. Mai de cop, la musico es jougado sènso resoun, e en abounde. Roustan, qu’es un couneissèire dis :

- Aqueste cop lou disque a degu s’enraia!...

E vivo li courso!

À la sourtido dis areno, après la courso, dous ami discuton : Jan l’envela e Roumié lou renaire. Jan, la courso i’a plasegu, mai Roumié, qu’es delongo mau-countènt, a rèn trouba à soun goust. La Direicioun a mau prima, li biòu trop mouligas, li rasetaire maufaras, e que fasié trop caud!

- Pode te dire que m’agantaran plus de veni i biòu, jamai plus!..S’es ansin, anarai à la pesco, à la casso vo restarai au mas!...

- Vos plus veni?..Iéu qu’ai pres li plaço pèr dimenche que vèn, la tiéuno la vau revèndre!...

E Roumié qu’a roumiéuteja enjusqu’à la veituro :

- Digo-me, pèr ana à-n-Irago, dimenche, vèire la finalo de la Bano d’or, à queto ouro partèn?...

Sara ansin tant que i’aura de courso de biòu! De gènt saran countènt, e d’autre pas! Poudèn pas tóuti agué li mémi goust! E vivo li courso e que perduron nòsti bèlli Tradicioun!...

dóu Mas de Grichaud