Sus li piado d’Annibau


L’epoupèio d’Annibau a toustèms pivela lou mounde que se demandon coume l’armado dóu grand capitàni cartaginés, emé sis elefant, avié fa pèr mestreja dous embàrri naturau : li passage dóu Rose e dis Aup. Lou noumbre de cercaire afeciouna pèr la questioun a jamai demeni e se pòu meme parla d’atualita bord que lou Museon Dóufinen de Grenoble aculis, enjusqu’au 2 de juliet 2011, uno mostro sus la travessado dis Aup pèr Annibau. Aquelo espausado, bèn segur, pourgis ges de responso definitivo e laisso la countèsto duberto.

Li guerro punico

Pèr bèn coumprendre lou proublèmo lou fau mai plaça dins soun countèste geoupouliti qu’es aquéu di guerro punico. Annibau nais en 247 avans lou Criste pendènt la proumiero guerro qu’óupauso li dous grands empèri de l’epoco : un poudé à voucacioun countinentalo, Roumo, e sa rivalo, la talassoucracìo de Cartage, en Africo (Tunisìo de vuei). Ambedous s’afronton pèr countourroula lou cor de la Mieterrano : la Sicilo.

Annibau es lou fiéu einat d’Amilcar Barca, lou vincu de la proumiero guerro. Tre l’age de nòuv an a vouda uno ahiranço eterno à Roumo. Devèn capo de l’armado cartagineso à 26 an. Es éu qu’esbrando la dousenco guerro punico. A soun plan : vòu plus ataca li Rouman sus mar emé de galèro coume lou fasié soun paire, mai pulèu pourta la guerro en Itàli en passant pèr li terro. Venènt d’Espagno ié fau travessa lou miejour di Gaulo.

Lou courounèu Marquion

La travessado dis Aup

Un di grands especialisto de l’itineràri d’Annibau es de-segur lou courounèu Marquion (1902- 1982), de Cadarousso, en Vaucluso, bèn couneigu au nostre bono-di soun obro tiatralo e sa chourmo cadaroussiero dóu Bastardèu que faguè estrassa dóu rire li Prouvençau enjusquo 1962, annado que li gènt coumencèron de s’encafourna dins sis oustau pèr aluca la televisioun.

Lou galejaire Marquion èro serious tre que parlavo d’istòri. Avié fa sis umanita e poudié legi lou latin e lou grè dins lou tèste, valènt-à-dire legi li dous istourian de l’Antiqueta qu’an parla d’Annibau : lou Grè Poulibe qu’a publica si tèste entre 167 e 146 avans JC e lou Latin Titus-Livius, mai tardié bord que 200 an lou separon dis evenimen que n’en parlo. D’un autre las soun esperiènci d’óuficié permetié à Marquion de juja de moulon de paramètre qu’an gaire evouluna mau-grat lou debana di siècle.

Pèr Marquion, es clar qu’Annibau èro un engèni militàri. Poussedissié en meme tèms la sciènci e l’art de la guerro, lou sèn e la sentido. Mena uno armado d’Espagno en Itàli es un pur proublèmo de lougistico. Adounc fau ametre qu’avans de se traire dins talo aventuro avié cerca de metre tóutis lis atous de soun caire e qu’avié retengu li soulucioun li mai simplo, li mai eisado e li mens dangeirouso. Sèmblo poussible, se poudèn pas restituï just e just soun itineràri, d’elimina pamens li draio li mai escalabrouso en se coutant sus de dounado que li coumentatour an pas toujour pres en counsideracioun.

L’armado punico

Demié lis elemen que fuguèron gaire eisamina n’i’a un, determinant, es la masso e lou voulume de l’armado punico. : 41.000 fantassin, 9 000 cavalié e 37 elefant de guerro, sènso coumta lis equipage. Aquelo armado en coulouno pèr tres fourmarié uno veto de de 35 km sus uno routo. Pèr lou campamen ié faudrié un espàci d’aperaqui 300 eitaro dins un rode relativamen plan. Uno armado coume acò a besoun de manja e de béure. Fau, coume se dis, que l’intendènci seguigue e meme pulèu que precedigue, en cubant lou tounage de viéure pèr lis ome e de fourrage pèr li bèsti.

Tout d’uno la soulucioun que se presènto à l’esperit es que pèr mòure e abali aquesto inmènso armado Annibau a chausi lou camin que presentavo lou mai de facileta de desplaçamen e li meióuri poussibleta de ravitaiamen. Amor d’acò se pòu esvarta lis itineràri qu’óufrisson pas de tàli coundicioun : li valado de l’Egue, de l’Óuvezo e de la Droumo que, en d’endré que i’a, fan d’estrechoun ounte soulet passo lou riéu, ounte, de mai, l’enemi pòu s’embousca.

Aquéli relarg tambèn soun pas trop drud. Sis estajan an sèmpre pouscu ié derraba sa vido, mai se pòu pas imagina coume lou terraire aurié pouscu nourri 50.000 ome e 10.000 chivau suplementàri (1). De tout biais Annibau, coume tout bon generau, avié fa recounèisse soun itineràri. Acò, la maje part di coumentatour l’an pas bèn masanta.

Lou passage dóu Rose

L’entencioun d’Annibau èi de pas trop tirassa dins lou miejour di Gaulo. Soun amiro es de passa lis Aup avans li gros toumba de nèu, d’arriva lèu dins la plano dóu Po ounte li Galés cisaupin, revòuta contro Roumo, l’espèron.

Avans lis Aup, la souleto dificulta que rescontro Annibau èi lou passage dóu Rose. D’efèt fau de tèms pèr passa un flume e, es sèmpre un moumen criti se l’enemi vous pòu agarri. S’es parla d’uno travessado en Arle. Acò sèmblo gaire serious. Arrivo de la regioun de Nime e tiro vers Remoulin. Pèr i’ana aurié faugu que s’esvartèsse de sa draio e que perdeguèsse 50 km e dous jour de caminado. Pièi lis Arlaten soun à la devoucioun di Marsihés, alia de Roumo. De mai Annibau saup que l’armado roumano de Scipioun vèn de desbarca dins lou Gou de Fos qu’es soulamen à 40 km d’Arle.

Annibau a tout interés à passa lou flume lou mai liuen poussible dóu litourau. Scipioun, qu’es un pau en chancello, bord que reçaup d’entre-signe que soun gaire fisable, part à l’après dóu Cartaginés mai arrivo tres jour trop tard, Annibau es adeja liuen. L’armado cartagineso passo proubable lou Rose dóu coustat de Sant-Geniés-de-Coumoulas e de l’autro man dóu flume, sus la plano de Cadarousso, espóutis uno chourmaio barbaro quevoulié empacha soun enançamen. Poulibe e Titus-Livius soun d’acord sus un poun : Annibau a passa lou Rose aperaqui à quatre jour de caminado de soun emboucaduro. Apoundon subre-tout que sus l’autro ribo remounton encaro quatre jour avans d’arriba à-n-un riéu qu’es facile d’identifica à l’Isero.

Titus-Livius la noumo escassamen, que marcavo li raro miejournalo dóu païs dis Aloubroge. Pèr Marquion l’endré lou mai geougraficamen proupice, en acord lougi em’aquélis entresigne, es la plano de Cadarousso-Aurenjo. Lou courounèu pèr douna un pau mai de pes à son resounamen ajusto que Napouleoun 1ié, avans éu, pensavo parié.

La travessado dis Aup

La travessado dis Aup

A coumta d’aqui, lou raconte de Titus-Livius s’endevèn plus em’ aquéu de Poulibe. L’istourian latin nous dis d’efèt qu’arriva dins lou païs dis Aloubroge, Annibau countùnio son camin pèr lou Païs di Tricastin, di Vouconce e di Tricourian pèr arriva en Durènço. Dins aquesto escasènço ,aurié tira dins li valèio siegue de Droumo, siegue d’Egue, siegue d’Óuvezo que podon mena en Durènço.

Aquélis itineràri destraucon lougicamen siegue au Còu dou Mount-Genèbre, en remountant la Nauto- Durènço, siegue au Còu de la Traverseto, pèr lou Queiras, siegue au Còu de Larcho, pèr l’Ubaio.

Sucamen aquélis itineràri fan supausa qu’Annibau, que s’es avança enjusqu’au païs dis Aloubroge, sarié revengu sus si pas. Poulibe douno pas aquésti precisioun geougrafico : se countènto d’endica li distànci e, de soun raconte se pòu dedurre qu’Annibau arriva sus l’Isero, atravèsso la Savoio, regioun, nous dis Poulibe (lou detai es impourtant) richo en blad e en ome.

Sus aqueste camin facile, Annibau passo dóu caire di vilo que soun aro La-Tourre-dóu-Pin e Mount-Melian. S’adraio pièi dins la valèio de la Mauriano pèr ajougne un còu d’ounte, Poulibe l’afourtissié, se vesié li plano d’Itàli. Se retenèn aqueste detai, fau elimina tóuti li còu que respondon pas àn- aquesto coundicioun (e soun noumbrous!). Un cop l’escoubo passado rèsto plus qu’un còu que posque de bon revendica lou passage : aquéu dóu Clapié (2).

Fau segui Poulibe e Napouleoun

L’avèn vist, Titus-Livius escriéu dous cents an après l’esplé dóu Cartaginés. Avouo, e se n’estouno, qu’à soun epoco se couneissié plus lou poun precis ounte Annibau avié passa lis Aup.

Adounc a assaja de recoustituï l’itineràri en baiant d’endico toupougrafico que, liuen de faire lume sus lou proublèmo, l’an rendu encaro mai escur.

Poulibe, pèr quant à-n-éu, es mai proche dis evenimen (50 an). A treva lis Aup e mena uno enquisto proche lis estajan pèr establi la verita. En counclusioun de si recerco, Marquion disié que, meme se lis istourian saran jamai segur de tóuti li detai, sèmblo poussible quand meme d’elimina quàuquis itineràri coundana pèr lou bon sèn e l’istòri.

Marquion envoucavo enfin l’autorita de Napouleoun (2) que pensavo que la caminado d’Annibau èro estado touto simplo e qu’avié pres la draio la mai courto… la mai coumodo e la mens dangeirouso, apoundié lou Cadaroussié.

sign. Costantini




Ndlr :
Lou generau Edouard Bremond, dins soun libre Berbères et Arabes (Payot 1942), relativiso lis efeitiéu douna pèr lis istourian de l’Antiqueta, bord qu’èro impoussible de faire viéure de gròssis armado, meme en Gaulo. Evoco la marcho d’Annibau en citant Poulibe : Dóu tèms qu’Annibau voulié passa emé soun armado d’Espagno en Itàli, se troubè forço enquequina pèr lou sujèt di viéure e di prouvesioun à fourni i sóudard pèr un trajèt que, pèr sa loungour, e pèr lou noumbre di nacioun barbaro plaçado sus lou camin, semblavo èstre quàsi impoussible; se parlè souvènt d’aquesto dificulta au counsèu; e enfin, Annibau Monomaque, counvida de dire soun vejaire, diguè que i’avié un soulet mejan pèr arriva en Itàli. Annibau lou butant de ié dire, Monomaque ié respoundeguè que falié aprene i troupo de manja de la car umano, e lis acoustuma, d’à cha pau, en aquesto nourrituro. Annibau e sis óuficié aguèron pas lou fege de l’eisecuta. Bremond preciso que l’armado d’Annibau, quouro arivè en Itàli, après 600 km sucamen, èro demenido de la mita, meme se, entre Pirenèu e Rose, li tribu galeso i’èron estado favourablo.
Lou Còu dóu Clapié es countesta pèr aquéli que dison que, dóu tems d’Annibau, èro óucupa pèr un counglas e, soustengu pèr li qu’afourtisson que nòsti couneissènço climatico de vuei nous permeton pas d’afourti sa presènci

barre de fin de page


 
 

1081229