A toumba d’estello sus Grignan

Vaqui un nouvèu recuei de la Vihado Prouvençalo au Païs de Grignan, en Droumo Prouvençalo. Es coume li precedènt de la plumo de nosto gènto Martoun Peyrol, que parlo coume sa rèire-grand e davans elo, despièi l’an 1553.

S’agis de nouvello e de raconte autoubiougrafi escri emé filousoufìo - n’en fau bèn pèr manteni la lengo nostro e la grafìo mistralenco... - e tambèn emé imour.

Es un pau coume un agach sus la vido, après uno longo draio arpentado. Souveni de jouinesso, la famiho, li coumpan, lis ami...tout acò se debano à Grignan e dins soun relarg. N’i’a pas mens de 49 d’aquéli tèste drud, plen de finesso, d’esmougudo, que s’ameriton d’èstre legi e travaia dins li cous de prouvençau. I’a li neissènço, li que s’en van pèr toujour coume Charlot, lou maquisard de 43-44, e pièi coume d’eslùssi dins un cèu negre, de refleissioun que van liuen coume : Pèr n’en fini fau segre la saviesso di mounge de l'Indo, fau manda luen li causo d’aqueste mounde pèr ana de-vers la vìo esperitualo, manda luen li cadeno fisico pèr deveni un esperit pur, pèr fin d’ana de-vers la sagesso universalo. Nosto Martoun pantaio, à moumen, de la Moungoulìo, mai sa Plueio d’Estello a bèn toumba sus Grignan. E lou Troubaire, asseta i pèd de la Damo dóu castèu, ié fai canta La cansoun de l’agnèu blanc.