La chobrèto dóu Peirigord

La revisto peirigourdino Lo Bornat vèn de publica un numerò especiau entieramen counsacra à la carlamuso, estrumen de musico que ié disèn museto en Prouvènço. Eilabas se dis la chobrèto (o encaro chabreta), alor qu’en Auvergno avèn la cabreto, la boha en Gascougno e la crabo vo boudego (o bodega) en Lengadò. Jouga de la chobrèto, coume l’espauso Eri Montbel, es uno tradicioun dóu Peirigord Negre. Lou Museon de Perigus n’en servo uno fabrejado avans 1840. Lou numerò dóu Bornat es enlusi de foutò e reprouducioun de carto poustalo presentant de chobrétaïré vers lis annado 1900. De nouta, encaro, qu’aquéli d’aqui, coume sis estrumen, figuron dins d’esculturo peirigourdino di siècle 15en e 16en. Joan Rigosta coumplèto l’estùdi pèr li prouvèrbi e biais de dire couneigu à respèt de la chobrèto, qu’emai siguèsson gaire noumbrous soun tóuti sabourous. Jaque Baudoin, de soun coustat, evoco la sampougno (o zambougno), qu’es la carlamuso poulifounico di Pirenèu franceso e qu’en Aragoun apelon la Gaïta de boto. Vaqui dounc un numerò dóu Bornat que nòsti musician tradiciounau prouvençau dèvon pas manca.