Priéureta i marcat loucau!

Lou journau Les Echos, lou 28 de Desèmbre de 2011, a signala qu’en 3 an (2009-2011), 900 fabrico an barra si porto en Franço, dóu tèms que 494 soun estado creado. Lou diferenciau entre li perdo e li creacioun d’emplé es esta chifra : desparicioun de 1.000.000 emplé endustriau, que fau i’apoundre li barraduro di PME, soucieta de service, mesteirau, que n’en vivien.

D’un autre las, Quartier d’Affaires, journau d’enfourmacion ecounoumico de Vaucluso espandi dins nòstis entre-presso, a douna, en Nouvèmbre darnié, uno analiso courajouso dóu CAPEC (Crises, Analyses, Propositions, Expérimentations, Communications) sus l’óurigino de la criso ecounoumico. Se dis : Une mondialisation idéologique Made in New York.

Quartier d’Affaires e lou CAPEC militon pèr la messo en valour de l’ecounoumìo loucalo, crearello de drudeso, d’emplé e d’enracinamen dis ome. Vaqui un pichot resumit de sa sintèsi :

• 1. La supressioun dóu countourrole dis escàmbi en Franço e en Éuropo dato de 1986 (gouvèr Mauroy) e de 1992 (Tratat de Maastricht). Respond à l’ideioulougìo de desreglementacioun e de mens d’Estat. Counsequènci : lou capitau es dessepara de l’ecounoumìo vertadiero, noutamen aquelo dóu Travai. Es un desmarida entre lis interès dóu Capitau - qu’es lou fru dóu travai serva souto formoo d’espargno - e lou Travai.
•  
• 2. Aquesto supressioun a permés la libro circulacioun en Éuropo di service e di capitau de l’Unioun Éuroupenco e de l’Ourganisacioun Moundialo dóu Negòci. Counsequènci : lou Marcat Unique Éuroupen vougu pèr li paire foundadou de l’Éuropo (>Adenauer, de Gasperi, Schuman e de Gaulle) eisisto plus. Aqueste marcat devié èstre, à l’interiour di raro éuroupenco, un marcat alarga de prouducioun (carboun, acié, proudu agricolo etc) emé de règlo bèn establido. Vuei, emé la supressioun dóu countourrole dis escàmbi, lou marcat éuroupen èi moundialisto. Lou Capitau éuroupen circulo libramen e moundialamen, sènso coustrencho à respèt dóu Travai éuroupen. I’a pu ges de preferènci éuroupenco e, tambèn, pus ges d’esperit d’assouciacioun e mutualisto - Capitau-Travai - qu’èro à l’óurigino de la coustrucioun éuroupenco.
•  
• 3. Es un cambiamen radicau, un abandoun dóu proujèt pouliti éuroupen. Nosto ecounoumìo es liéurado i fantasié d’un marcat moundiau generalisa qu’a coume souleto règlo lou laissa faire e la lèi dóu mai fort, pus ges de coustrencho soucialo, fiscalo, poulitico, pus ges de prouteicioun di marcat loucau.
•  
• 4. L’Éuropo a, ansin, abandouna touto vertadiero poulitico ecounoumico e endustrialo bord que lou marcat moundiau adus de nouvèlli règlo : fau proudurre, à cost mendre, dins li païs ounte lou travai es pau paga, ounte i’a ges de prouteicioun soucialo e vèndre, lou mai carivènd, dins nòsti païs que soun encaro riche, fin de realisa de proufié massimon. L’Éuropo, ansin, sacrifico soun marcat interiour, tout en suvenciounant de regime noun demoucrati e en endrudissènt uno ouligarquìo de decidaire... e de nouvèu riche. Pamens, sènso lou desvouloupamen d’un marcat interiour, i’a ges de desvouloupamen vertadié poussible.
•  
• 5. E lou CAPEC de counclure (vous baiant la citacioun en francés) : Les nouvelles règles européennes favorisent ainsi, sous couvert de l’Europe, un projet qui oblige à abandonner notre identité sociale (protection du Travail, Travail-Capital coopératifs, concurrence organisée, réglementation des échanges financiers). Tandis que la perte de nos savoir-faire industriels conduit à la perte de notre indépendance économique et risque de nous conduire à la perte de notre indépendance politique. In fine, c’est notre démocratie qui est en danger car elle ne peut se conjuguer avec la servilité. En fait, aujoud’hui, sous couvert d’Europe, les institutions européennes détruisent l’Europe. (Quartier d’Affaires, www.quartier- d-affaires.com).

Partejan aquesto analiso. Tout nous mostro que i’a uno voulounta de destrucioun o de coulounisacioun de nòsti marcat loucau.

Voulèn uno Éuropo di Pople e noun uno Éuropo di teinoucrate. Voulèn d’ecounoumìo loucalo au service di gènt, emé de prouducioun de proussimeta.

Guihèn Borel, redatour en chèfe de Quartier d’Affaires, nous porge aqui la counclusioun :

"Li gestioun decentralisado, lis óutis de beileja loucau, lis ajudo e soustèn ecounoumi dirèit aqui ounte soun utile, vaqui de que faire reparti uno ecounoumìo. Ansin siegue en Franço e en Prouvènço!"