En 2010, la Federacioun Fóuclourico Mieterrano, l’Unioun Prouvençalo e d’assouciacioun marsiheso an founda l’Unioun Culturalo Prouvençalo Marsiho 2013, pèr alesti de proujèt de grando amplour pèr aquesto annado que Marsiho sara Capitalo de la Culturo de l’Éuropo. Aquéli proujèt soun esta presenta dins dos reünioun, emé de respounsable d’aquest evenimen de restountimen internaciounau, pièi remés dins li delai pèr èstre labelisa e suvenciouna.

Mai, aguènt reçaupu ges de responso, l’Unioun Culturalo Prouvençalo Marsiho 2013 counvidè lis assouciacioun prouvençalo dóu relarg, lou 19 de Nouvèmbre darnié, au Cèntre Culturau dóu Roudelet Felibren de Castèu-Goumbert, à Marsiho, pèr uno counferènci de prèisso fin d’afourti que la Culturo Prouvençalo, terradourenco dins nosto Regioun, dèu èstre au proumié rèng sus lou pountin dins Marsiho-Prouvènço Capitalo Éuroupenco de la Culturo en 2013.

Jan-Glaude Glaudin pren pousicioun

De Niço à la Valado dóu Rose e is Aup, ùni 200 persouno, respounsable d’assouciacioun pèr la maje part, venguèron dire soun soustèn à l‘Unioun Culturalo Prouvençalo Marsiho 2013. I’avié noutamen dintre éli, Miquéu Benedetto, sendi de la Mantenènço de Prouvènço dóu Felibrige, Jaque Guerin, presidènt de la Federacioun Fóuclourico Mieterrano, Eleno Colin-Deltrieu, presidènto dóu Prouvençau à l’Escolo.

Aquesto counferènci de prèisso aguè pèr resulto, l’endeman, d’article counsequènt dins li dous quoutidian marsihés, La Provence e La Marseillaise, emai uno emessioun sus FR3.

Davans lou resson d’aquesto manifestacioun, tre lou dimenche sero, sus FR3 Prouvènço- Mediterragno, lou senatour-conse de Marsiho, Jan-Glaude Gaudin, diguè que d’ùni cregnien que la Lengo e la Culturo Prouvençalo siguèsson óublidado en 2013, mai que s’enganavon bord qu’es deja previst de ié douna uno plaço di grando. Despièi, li respounsable de l’Unioun Culturalo Prouvençalo Marsiho 13 reçaupon de demando de rendès-vous, de la part di respounsable de Marsiho Capitalo Éuroupenco de la Culturo, en liogo de li soulicita.

Li proujèt principau

Li proujèt principau presenta pèr l’Union Culturalo Prouvençalo Marsiho 2013, soun :

• * Uno fresco istourico sus l’Istòri e lou Mite de Marsiho.
• * Un rescontre de musico e de danso tradiciounalo de la Mediterragno.
• * Un balet founda sus l’obro camarguenco de Jóusè d’Arbaud.
• * Un Coungrès Internaciounau Culturo Regiounalo/ Trachimen Ecounoumi : De ressourso territourialo pèr lis ecounoumìo regiounalo.
• * Li Cant d’Amour de Mirèio, asatamen de l’obro de Frederi Mistral pèr Gui Bonnet.
• * Un oumenage à Óugèni de Mazenod, bastissèire e gardian de la Lengo Prouvençalo.
• * La Fèsto di Jouine de Prouvènço 2013 e la Fèsto dóu Pople Prouvençau 2013.
• * Uno mostro magnifico de crècho.
• * Emai li manifestacioun annalo dis assouciacioun culturalo de Marsiho, coume lou Festenau de Castèu-Goumbert, que ié sara douna mai d’impourtanço.

L’Unioun Culturalo Prouvençalo Marsiho 2013 es de felicita de faire soun proun pèr que la Lengo e la Culturo prouvençalo siegon dins li proumiéri plaço, demié li festiveta que faran vira, dins lou mounde, lis iue sus Marsiho.

Disèn nòsti gramaci à soun presidènt-delega Reinié Tribolo, si souto-presidènt Amat Allies e Louïs Scotto, sa secretairis generalo Berenguiero Mouls, Reinaud Guers, clavaire, e à si sòci que se devouon sènso coumta : Bernat Beaume e Silvìo Salvati de l’Escolo de la Mar e, aquel ome discrèt, mai d’uno eficacita remarcablo, Marius Deleuil, coupresidènt de l’Unioun Prouvençalo e presidènt de Parlaren Gardano.

Nòstis astru, peréu, à Girard Ben de L’Oulivarello, que beilejè li musician qu’animèron la matinado, e à Jan-Marc Gravelat, journalisto que menè la countèsto dóu tantost. E un grand merci à Danis Pantaleo, presidènt dóu Roudelet Felibren de Castèu-Goumbert e si sòci, qu’aculiguèron la manifestacioun.