Fèsto dóu Pople Prouvençau

Despièi 1987, chasco annado, l’Unioun Prouvençalo counvido lis assouciacioun de faire valé, au mes de Mars, l’èime prouvençau, bono-di de manifestacioun. La toco es de prouva la vitalita encuei de la Lengo e de la Culturo Prouvençalo.

L’aigo en Prouvènço

En 2012, lou tèmo prepausa pèr lou Printèms Prouvençau es L’aigo en Prouvènço. De la mountagno à la mar, l’aigo es un tresor au nostre, sourso de legèndo, de rouman, d’enavans, de lesi, de vido, de recordo...de garrouio de fes que i’a, qu’an ispira mai que d’un autour.

En partènt d’aquéu tèmo, se pòu faire d’espousicioun, de vesito (moulin, centralo idrou-eleitrico), d’espetacle, de pèço de tiatre, d’article, d’intervencioun dins lis escolo...

La Mirèio d’Or

Es ligado au Printèms Prouvençau la remesso dóu Troufèu de la Mirèio d’Or, fisa à l’Unioun Prouvençalo pèr la Regioun Prouvènço-Aup- Costo d’Azur. Aquéu Troufèu recoumpènso lis assouciacioun que participon au Printèms Prouvençau e fan d’obro de-longo pèr Prouvènço. Cado annado l’assouciacioun qu’a reçaupu la Mirèio d’Or l’an d’avans la trasmet à l’assouciacioun guierdounado aquest an.

Uno jurado independènto de l’Unioun Prouvençalo fai la triado di doursié presenta pèr decerni la Mirèio d’Or de l’annado e, tambèn, uno Mirèio d’Argènt, uno Mirèio de Brounze e d’àutri prèmi. La trasmessioun de la Mirèio d’Or se fai pèr la Fèsto dóu Pople Prouvençau, qu’es un grand recampamen dins uno ciéuta de nosto Regioun.

Rendès-vous à La Brigo (06)

E 2012, es lou tour dóu despartamen dis Aup-Marino de reçaupre li Fèsto embessounado di Jouine de Prouvènço e dóu Pople Prouvençau. Li Brigasc, estaca à sa culturo terradourenco, an demanda de lis aculi, ço qu’es esta aceta pèr lou counsèu d’amenistracioun de l’Unioun Prouvençalo.

La Brigo (vo Brigas o Ra Briga en parla brigasc) es la coumuno la mai au levant de la Regioun Prouvènço-Aup-Costo d’Azur. S’atrobo à la jouncioun dis Aup e dis Apenin. Li coumuno de Tèndo e de La Brigo formon lou bacin naut de la ribiero Roio vo Roia.

Presentaren, dins noste numerò 168, un istouri de La Brigo e de soun restacamen à la Franço après lou referendum de 1947.

La Fèsto dóu Pople Prouvençau 2012 se debanara dóu 11 au 13 de Mai à La Brigo. La trasmessioun dóu Troufèu de la Mirèio d’Or se fara lou dimenche 13 de Mai.

Councours di Jouine de Prouvènço de 2012

En 1992, la Regioun Prouvènço-Aup-Costo d’Azur creè lou Councours di Jouine de Prouvènço pièi lou fisè à l’Unioun Prouvençalo en 1997. Sa toco es de :

• * Favourisa l’usage e l’estùdi di Lengo Prouvençalo e Niçardo encò di jouine.
• * Metre en valour l’ensignamen dóu prouvençau e dóu niçard, lengo terradourenco de nosto regioun.
• * Afeciouna la jouvènço prouvençalo à la coumpousicioun de cansoun mouderno en Lengo Prouvençalo o Niçardo.
• * Descurbi de talènt nouvelàri d’interprète en prouvençau o en niçard.
• * Faire ama di jouine lou prouvençau e lou niçard dóumaci lou cant. Es douta de mai de 7.000 € de lot. A gratis, es dubert en tóuti li jouine dóu relarg lenguisti prouvençau e niçard (Prouvènço-Aup-Costo d’Azur, Ardecho, Droumo, Erau, Gard, Valado prouvençalo d’Italìo).

1. Creacioun de tèste

Li candidat podon èstre soulet o en groupe. Dèvon enregistra un tèste court sus CD, de preferènçi parteja pèr li candidat soulet entre un tèste escri pèr éli e un tèste d’autour. La clarta dis enregistramen a d’èstre perfèto. Lis enregistramen de qualita marrido saran rejita pèr la jurado.

En 2012 es apoundudo uno nouvèuta, la creacioun d’uno categourìo permetènt i classo e is assouciacioun de presenta un travai couleitiéu (videò, BD, doucumen powerpoint, doursié papié). Pòu èstre en prouvençau o en francés (emé de referènci à la Lengo Prouvençalo vo à noste francés regiounau).

Lou tèmo de segui es L’aigo en Prouvènço.

Li candidat saran desparti en 3 categourìo :

• * Pichoun : 5 à 12 an
• * Grandet : 13 à 15 an
• * Jouvènt : 16 à 20 an

Uno Jurado independènto de l’Unioun Prouvençalo classara li candidat.

Li candidat prima auran de dire soun tèste o de presenta soun travai sus l’aigo en Prouvènço à La Fèsto di Jouine de Prouvènço à La Brigo.

2. Councours de cansoun

Councernis lis autour-coumpousitour-interprète de15 à 25 an.

La cansoun coumpausado en prouvençau o niçard déura dura pas mai de 3 à 4 minuto. Tóuti lis estile soun aceta.

• * Categourìo cantaire soulisto (acoumpagna o noun) : 15 à 25 an.
• * Categourìo groupe : 5 à 25 an.

La Jurado es independènto de l’Unioun Prouvençalo.

Li candidat an de manda sis enregistramen, sus CD de preferènçi, avans lou 21 d’abriéu de 2012 à Camiho Gassier, Unioun Prouvençalo, Lis Isclo, 04800 Grèus-li-Ban.

Lou reglamen coumplet dóu Councours es de demanda à Annie Sauvat, Les Iscles, 04800 Grèus-li-Ban o sus lou site de l’Unioun Prouvençalo : www.union-prouvencalo.org

3. Fèsto di Jouine de Prouvènço à La Brigo (Aup-Marino)

Nouvèuta : se debanara lou divèndre 11 de Mai de 2012 e noun lou dissate coume lis annado de davans. Acò pèr permetre is escolo primàri, coulège e licèu, de crea de desplaçamen de group pèr lis escoulan de soun establimen. Un aubergamen es previst pèr aquéli que vendran de liuen (Valado dóu Rose, Durènço Nauto) à parti dóu dijòu 10 de mai, dins la limito di plaço dispouniblo.

Entre-signe : Henri Feraud, 6 boulevard Pau Chabas, 84000 Avignoun - tel : 0490 866 022 - feraud.henri@neuf.fr

Demai l’Unioun Prouvençalo prendra en cargo uno part di fres de trasport pèr càrri di candidat que vendran à la remesso di pres.