Guingueto e cabanoun Avignoun, vers 1900

Après uno semano de satire, lou travaiadou se sènt d’ana s’espaceja pèr lou champ, à l’oumbro dis aubre, n’en respira l’aire pur, liuen dis escaufèstre de la vilo e de l’óudour enchusclarello di fabrico (1).

D’aqui vèn la bono abitudo presso pèr nòsti rèire de faire uno regalo dins li guingueto d’alentour, i’escoula quàuqui flasquet entre dos partido de boulo, subre-tout quand se charravo pas de la malautié di vigno (2) e que lou pechié coustavo mens tout en estènt meiour.

Lou saussissot, lis óulivo, o, dins sa pountannado, quàuqui lesco de meloun tenien coumpagno i poutarras, franc di jour que, li grand campano estènt à brand, alor se fasié vira l’àsti.

Après lou tantost, s’en revenien de-vers l’oustau gai coume de quinsoun, cantant de refrin prouvençau forço mai agradiéu que d’ùni repertòri d’au-jour-d’uei (3).

Mancho estroupado e l’iue reviha...

La banlègo avignounenco avié si guingueto fasènt flòri, emé de noum remembrant tout un passat boumbancié à vous faire barbela. Pièi, quento óudourouso tubèio en aquelo cousino prouvençalo, souto l’andano, servido à la bono apoustoulico, sènso salamalè pèr de servicialo em’ un coutihoun court, li mancho estroupado e l’iue reviha!

Aro, lou pau que rèsto d’aquélis aubergo de campagno a vougu fignoula, se metre au biais di vilo, e, li couide sus taulo estènt plus de rigour, adiéu mi guingueto emé l’aiòli embausemant o lou boui-abaisso ensafrana!

La Bono Aventuro, qu’a leissa soun noum à-nun quartié rurau, Rocho, de-vers li lavadou de l’Arrousaire (em’ un Sant Michèu pèr ensigno), Redarés, de la Vióuleto an barra boutigo i’a proun tèms; la Coucourdo au camin de Vau-Cluso, lou Cabanoun, au miejour di bàrri, soun plus qu’un souveni e, tout-bèu-just quàuqui vièi roulié vous parlarien encaro dóu Cabaret de Nosto-Damo, qu’èro tengu pèr Bounaud, alin sus la routo de Marsiho, à dous pas d’aquéu de la Boulo d’or; e vuei, de touto la ribambello acampestrido; ço que rescountrarés encaro emé la noto proumierenco, es Moun-Lesi, sus lou camin de Mouriero e qu’a soun gargoutié ié disien lou Generau.

Pèr ramplaça talo simplesso de maniero, lou prougramo s’es coumplica e moudernisa e basto se la joio e lou franc rire valon aquéli d’antan emé sa tencho rustico, soun leissa-ana que li fidèu coumpaire atrovon tout-just encaro dins lis acampado de l’ Embut (4).

Mai, quau nous rendra l’antico guingueto dóu Blanchissage, alin de-vers Champ-Flouri e la Ferigoulo, - gaire pu liuen - e la Pichoto Oustesso souto li gros óume di bord dóu Rose, retrasènt li cabaret di pintre d’en Flandro?

I’avié, de-mai, lou Chaine-Verd, barra i’a pau tèms, après 80 an de glòri vertadiero e, pèr claure ma listo bachico, saludarai li darnié Restaurat d’en Bartalasso, blanquejant encaro dins li bouscas d’aquelo isclo.

Li pavaioun e maset que, de nòsti jour se n’es auboura ‘no tarabastado au Plan d’Avignoun coume sus li colo de Candau e Bello-Visto, an, à cha pau, desvira li gènt di guingueto mounte se ié debito quasimen que de Verdalo (5), aquelo bevèndo alcoulisant la raço umano avans de l’apichouni.

Bèu jour de la Guingueto, se vòstis ouro brusisson plus di galoi revihet, acò s’apren tambèn au lùssi boutant aro soun nas pertout.

La touno (6) emé si rasin roussejant, la lèio d’aubre emé sa ramiho souloumbrouso e soun cledat de cano, n’avien, parèis, pas proun de flafla pèr li moussurot de nosto epoco dicho demoucratico, li farlouquet passa sus la raco, e la pauro guingueto, ai-las, balanço plus au vè nt di biso lou rampau pendoula sus sa porto.

N’en soubro, pamens, quaucuno, liuen dóu tarabast de nòsti vilo, mai aquélis begudo antico, soun plus que pèr assousta un moumen li carretié que passon, e tout acò es bèn clar samena dins la draio dóu siècle vinten, empóussousido pèr l’autòmoubilisme vincèire.

Noto :

• Enri Bouvet defuntè en 1905. Si crounico pareiguèron en libre en 1907. I’a pus de fabrico dins l’Avignoun intra-muros de vuei.
• Filóussera. Malautié de la vigno arribado d’Americo que destruiguè mai de la mita dóu vignarés francés, e que fauguè recoustituï emé d’ensert sus de soucan american que resistavon en aquéu pourridié.
• Acò, mai d’un siècle après, a pas gaire cambia.
• L’Embut, autramen dire lou Bon-Ange, èro uno anciano soucieta de secours mutuau creado en 1842; a longtèms agu soun sèti proche lou Cors-Sant en un oustau lega pèr M. Capèu, un de si sòci; à l’epoco, fin dóu siècle 19en, tenié sesiho proche dóu bàrri Sant-Lazàri.
• Verdalo : absinthe.
• Touno : tonnelle