Dicho e Raconte



En Aigo-Morto, lou Ciéucle Lengo d’O dóu cantoun a un presidènt, Gabriéu Brun, que gaubejo dóu bon biais lou prouvençau. Après Moun pantai, Lesco de Vido, Pèr la fe di biòu e l’Amour de la Lengo, nous a fa teni un nouvèu recuei qu’a pèr titre : Dicho e raconte.

Es un libre qu’evoco emé fidelita aquelo terro de bouvino, uno terro que, emé si chivau, si biòu, si tradicioun, sèmblo, urousamen, coumpletamen en deforo dóu tèms de fadòli que sian, es de dire d’aqueste siècle vint-e-unen.

Au fiéu di pajo, retrouban lis Espelli, Founfono Guilherme, La Damo di Gardian, sujèt dóu filme de Francés Di Luca, li Reinaud, manadié de trìo, la Fèsto vierginenco, Jan Matiéu, rèire-presidènt e presidènt d’ounour de l’Assouciacioun di gardian de mestié, Felipe Chabanoun.

Uno mencioun especialo dèu èstre facho pèr quatre raconte. Gabriéu Brun, d’abord, ramento que la lucho pèr nosto Lengo mespresado dato pas de vuei : es l’óucasioun de reproudurre un doucumen, en prouvençau, espandi pèr li legislativo de 1936. I’es afierma : Voutaren pèr aquéli qu’auran avans tout lou soucit de garda à la Prouvènço tout ço que fai sa glòri e sa bèuta! Voutaren pèr aquéli que nous aduran l’òli d’óulivo de la bono poulitico e noun l’òli de grano de la marrido pouliticaio! Or, la bono poulitico es aquelo que respèto li dre e li liberta di païs vengu, un à un, à tèms o tard, coustituï la Franço.

Pièi, vaqui li tèms d’abrivado en Aigo-Morto, quouro li carreto bluio fasien lou round. E que li gardian fasien passa si biòu dins la gaso dóu Bourgidou, obro de trìo bord que falié pas perdre de bèstio e, qu’es devengudo aro un espetacle. Acabaren emé Sultan, un conte camarguen de Pèire Aubanèu, revira au prouvençau pèr l’ami Brun que, fin finalo, counjugo emé passioun dicho, proso e pouèmo en lengo nostro, uno lengo que tèn de si gènt.

sign_jgr



cuberto

barre de fin de page


 
 

1086869