Sivèstre Clap au Palais dóu Roure



Après la despartido pèr li Camp d’Alis de nosto regretado Sabino Barnicaud, es Sivèstre Clap, direitour dis Archivo Municipalo d’Avignoun, qu’es esta nouma Counservadou dóu Palais dóu Roure, en Avignoun, l’ancian palais di Baroncelli.

Sivèstre Clap a de racino en Cesarenco. Couneissèn bèn soun paire, Mèste Vincèns Clap, egrègi autour prouvençau em’ especialisto de Daudet.

Sivèstre Clap a realisa, is Archivo Municipalo, un pres-fa qu’es pas de dire, emé la numerisacioun dóu founs tant drud de la Vilo d’Avignoun qu’es, desenant acessible pèr la telaragno (internet) i cercaire, istourian em’ i curious.

Sivèstre Clap, au Palais dóu Roure, vai entamena uno obro de meme nivèu emé la reourganisacioun dis archivo e founs doucumentàri barouncelian, mistralen e mieterran. Se dis que i‘aurié, belèu, quaucarèn coume 200.000 à 500.000 doucumen óuriginau à tria, classa, numerisa e metre à dispousicioun dóu publi.

I’a ‘qui de tablèu ancian, letro, foutò, aficho, couleicioun de revisto e de journau, de founs venènt de dounacioun, de libre, disque etc, toucant majamen touto la pountannado de la Reneissènço Prouvençalo e Miejournalo di dos man dóu Rose (fin dóu siècle 19en e siècle 20en). I’a meme, un founs Esperandieu, emé lis archivo d’aquéu d’aqui sus l’afaire de Glozel. E encaro mai un founs italianisant, coume un autre founs sus lis Indian d’Americo, que Folcò de Baroncelli counsideravo coume si fraire, e Joe Hamman que filmè, en Camargo, li proumié...western.

Valerìo Siaud, Francés Feraud, Sivèstre ClapLou 5 de Mai, au Roure, en présenci di membre dóu counsèu d’amenistacioun de la Foundacioun Flandreysy-Esperandieu, dóu persounèu dóu Palais, e de Valerìo Siaud, ajoun au deputa-conse d’Avignoun, Francés Feraud, conse-ajoun dóu quartié dóu Pounènt e delega pèr la Culturo e li Tradicioun Pouvençalo de la Vilo d’Avignoun, a presenta Sivèstre Clap is assouciacioun prouvençalo : Oustau de la Culturo Prouvençalo d’Avignoun, Escolo dóu Flourege, Parlaren Païs d’Avignoun, Parlaren en Vaucluso, Li Nouvello de Prouvènço, Estello d’Avignoun, Riban de Prouvènço, Escandihado de Mount-Favet, Assouciacioun Baroncelli.

Francés Feraud n’en proufichè pèr counfierma la voucacioun dóu Roure de fougau internaciounau de Culturo Prouvençalo, Miejournalo e Mieterrano, e diguè que la Vilo d’Avignoun metrié li mejan uman e materiau que faran mestié.

Souvetan à Sivèstre Clap de faire dóu vièi oustau di Baroncelli un liò mai que mai astra, en lou fasènt intra, de plan pèd, dins lou siècle 21en. N’a la voio e li coumpetènci necito.

Pòu èstre assegura, pèr acò, dóu soustèn de tóuti lis assouciacioun prouvençalo d’Avignoun.

sign_jgr




barre de fin de page


 
 

1132139