couvrtr



Lou despartamen dis Aup Marino vèn de counèisse en evenamen de trìo emé l’inaguracioun, lou 22 de Juliet de 2012, dóu Pargue Naturau Regiounau di Pre-Aup dóu Sud, en presènci de Dóufino Batho, nouvello menistre de l’ecoulougìo.

Aquest Pargue es lou 48en crea en Franço e lou 6en en Regioun Prouvènço-Aup-Coustiero d’Azur. S’espandis sus un territòri inmènse de 88.040 eitaro, emé 45 coumuno councernido e si quàuqui 31.270 estajan.

A pèr limito : au levant e à l’uba, la valèio dóu flume Var que, coume se saup, s’atrovo pas dins lou despartamen que porto soun noum; au pounènt, li despartamen dis Aup de Prouvènço Auto e dóu Var e, à l’adré, la Coustiero d’Azur emé soun rèire-païs que s’enfounso de 10 à 20 km dins li terro.

Ié caupon, dins lou nouvèu Pargue, que dos vilo : Grasso (52.019 abitant), capitalo moundialo de la perfumarié, e Vènço (19.198 abitant), forço couneigudo pèr sis ativeta artistico. Li 43 àutri coumuno soun de viloto vo de pichot vilage prouvençau forço pintouresc e agradiéu. Lou sèti dóu Pargue es à Sant-Valié (Saint-Vallier-de-Thiey, 2 av. Gaston de Fontmichel, 06460).

Un riche patrimòni

Lou Pargue Naturau Regiounau di Pre-Aup dóu Sud a un patrimòni forço drud.

D’un poun de visto lenguisti, se ié parlo 3 anciàni lengo d’O (es lou Pargue que lou dis) : li dos varieta de prouvençau que soun lou gavouòt e lou prouvençau maritime, e lou niçard.

D’un poun de visto geougrafi, es entre li mountagno auto dóu Mercantour e la Coustiero d’Azur. Es un vaste de mountagno mejano, emé de gorgo, de séuvo e 1.952 baumo e aven. Es un territòri prouvençau marca pèr lis enfluènci mieterrano e aupino que se mesclon, em’ uno naturo e de vilage encaro engarda, ço que lou rènd eicepciounau.

I’a de bèlli valèio agricolo, uno bioudiversita richo emé 2.000 espèci vegetalo, 40 espèci flouristico endemico e de noumbróusis espèci faunistico d’interès patrimouniau (eisèmple : 23 espèci de rato-penado sus li 30 presènto en Regioun nostro).

Pèr un tourisme de qualita

La toco dóu Pargue Naturau Regiounau sara de manteni uno qualita de vido noun counchado pèr l’urbanisacioun de la Coustiero; metre en valour li saupre-faire presènt dins tóuti li coumuno; desvouloupa e mestreja un tourisme famihau o de pichot group, pèr la descuberto dóu païs, respetuous di païsage, de la floro e de la fauno, à l’óupausa d’un tourisme de masso.

Demié li persounage ilustre que se n’en pòu enourguï lou Pargue, avèn Celestin Freinet (aquéu de la pedagougìo famouso) (1896-1966), l’Amirau de Grasso (1722-1788) e lou grand pintre Jan-Ounourat Fragonard (1732-1806).

Lou Pargue Naturau Regiounau di Pre-Aup dóu Sud vous counvido, desenant, à veni parteja si richesso. Li coumuno e li poupulacioun vous aculiran emé lou gentun calourènt e la bounoumìo que li caraterison.

sgnrx




barre de fin de page


 
 

1131926