Balado à l’entour dóu Vis
(Mount Viso)



couvrtr Lou Vis, Monte Viso en Italian, es la mountagno la mai auto dóu relarg aupen miejournau. Aqui se parlo à nosto modo coume l’an di de generacioun d’ùmblis estajan d’aquéli valèio de l’anciano Gaulo Cisaupino, que res i’avié di que parlavon prouvençau.

La formo pounchudo dóu mount, e, segound li poun de visto, piramidalo, fai signau e sèmpre m’a fa pensa à-n-aquéu vers dóu grand pouèto indian R. Tagore : Mountagno, esperfors de la Terro pèr adesa l’inacessible. Segur que la countemplacioun d’un parié brè e de tout lou mountagnage que l’acoumpagno douno envejo de medita.

Sus lou camin que meno à Coumboscuro, me remembrarai sèmpre de Luigi Lombardi (1), óurientalisto de trìo, proubablemen ispira pèr la sublimeta dóu païsage, que s’assetè dins la pousicioun dicho de la ninfèio (2), pendènt uno pauso au còu dóu Viribianc. Lou Vis de segur fai lingueto e quau a pas raiva de l’escala? Aqueste pantai l’ai realisa lou 28 d’Avoust de 1989.

Eilamoundaut (3841m)

Emé d’ami gapencés aviéu fa adeja dous cop lou tour dóu Vis, venènt dóu Queiras, en passant pèr lou Còu de la Traverseto e en s’entournant pèr lou Còu Valanto. Belavian aquesto cimo e se disian : ié faudra mounta. Emé prudènci espererian que i’aguèsse plus ges de nèu pèr tenta l’escalado.

Erian quatre e arriberian la vèio au refuge Quintino Sella (3) quiha à 2640m d’auturo, pèr ié soupa e dourmi. Lou vèspre, fasènt cueisso alentour d’uno taulo, faguerian couneissènço d’un Piemountés de Fossano, Segne Giobergia, qu’esperavo d’ami que venguèron pas. Aqueste brave ome que couneissié bèn l’escarpinado se prepausè coume guide bountous. Vague!

Iéu, aviéu quand meme lou coudoun, bord que d’aupenisme n’aviéu jamai fa. L’endeman fasié encaro negro niue quouro quiterian la michour de la mèiro pèr s’endraia vers l’auturo à la co-dóu-loup. Devinavian lou camin en vesènt la lus di làmpi frountalo pourtado pèr li courdado qu’èron davans nous autre. Fasié pas caud. Avans que de coumença nosto batudo roucassiero pèr de bon, fauguè passa lou Pas di Sagneto e atravessa uno grosso casso.

Arriberian au Biva Andreotti, recate reserva is aupenisto en dificulta. A coumta d’aqui, pèr mounta, fauguè noun soulamen se servi di cambo mai tambèn di man. Urousamen noste menoun qu’èro passa darnié, nous encourajavo :" Agués pas pòu!." Nous dounavo tambèn d’endico : "Arrapas un pau mai aut! I’a un benc, aqui, pèr voste pèd...!".

Nosto atencioun èro en plen moubilisado e aguerian gaire lou tèms d’amira lou païsage. Aguènt passa li dous rode vertadieramen tihous de la mountado, arriberian à la crous de ferre que marco lou soum. Aguerian enfin la recoumpènso de nòsti peno. À nòsti pèd, au levant, s’espandissié majestouso la plano dóu Po.

Noste ami Piemountés emé la man designavo li vilo : "Aqui Cavour, eila la vilasso de Turin...." En alucant à man drecho e senèco veguerian l’esplendour de l’arc aupen que cencho Piemount e Loumbardìo. L’ome de Fossano tirè pièi de soun saquet uno boutiho de vin blanc de Frascàti. Lou chicouloun èro inespera e la bevèndo, quàsi de vin de messo, poudié pas miés s’endeveni em’ aquest istant soulenne e adeja un pau celestiau.

La nauto Ubaio

Li Prouvençau que volon s’avança vers lou Vis podon tambèn remounta de long de l’Ubaio. La valèio ounte raio lou gaudre destrauco au còu dóu Lounget, vertadié badarèu sus la vau Varacho e lou Vis. La nauto Ubaio èro, i’a gaire de tèms, dins l’atualita bord que lou dimenche 26 de Febrié de 2012 lou rode fuguè espóussa pèr un terro-tremo que fuguè ressenti enjusqu’à Niço. Li gènt dóu païs dison qu’an couneigu de mau-parado de touto meno e que, basto d’ana vèire l’iscripcioun escricho sus lou pourtau de la glèiso roumano de Maurin, amèu de la coumuno de Sant-Pau-sus-Ubaio, pèr coumprendre que lou dangié pòu tambèn veni dis avalanco : 1531 lo 14 de febrier svalancha la gleiso.

Lou rode pamens es geoulougicamen forço interessant. Proche Maurin atrouban de peiriero de mabre verd proche la coulour dóu pourfire emplega dins l’Antiqueta. L’esplecho se faguè à coumta dóu siècle 5en de nosto èro enjusqu’à la mita dóu siècle 20en.

Aquesto roco requisto serviguè à basti lou socle dóu toumbèu de l’Emperaire Napouleoun 1ié. Fuguè utilisado tambèn, à Paris, à l’Oupera Garnier. Un pau mai aut dins la valèio se pòu vèire de roucas d’aparènci curiouso que vènon dóu founs de la mar. D’efèt l’enaussamen dis Aup faguè remounta d’escampamen de lavo que gisclèron dins l’aigo di founsour abissalo. En se refrescant prenien uno formo de couissin, de pillow coume dison lis especialisto.

Après agué parla de geougrafìo, fau aro parla d’istòri o pulèu de preïstòri bord que se pòu atrouba dins un caire tengu un pau secrèt pèr aquéli que lou counèisson, de gravaduro de l’estile dóu Mount Bego dins Mercantour. La teinico èi la memo : de picoutage fach em’ un óutis à percussioun lançado, proubablo uno pouncho de peirard. Tout acò remounto à-n-uno periodo coumpresso entre 3.200 e 1.700 an avans J.C., valènt-à-dire procho de 5.000 an.

Sian aqui à l’age de l’aram e fau metre aquéli gravaduro en paralèle emé li de la Vau Camonica en Itàli e, tambèn, emé la descuberto de la moumìo d’un ome dins un counglas dis Aup de l’Ötzal sus li raro d’Austrìo e d’Itàli. Aquéli testimòni fan provo que lis auturo aupenco èron pas un desert. Tout au contro, uno civilisacioun, emé si crèire e soun espressioun artistico, a pouscu ié trachi. E pièi coume me lou disié un ami savouiard qu’esplicavo ansin lou recate aupen :" La mountagno es l’endré ounte lou pèis arribo lou mens fres e l’enemi lou mai alassa".

Li Cèlto

En 1994, emé d’ami de Barcilouneto, trevère la Valèio de Blins. Passerian de la nauto Ubaio à la Valèio de Blins (Bellino en italian) en mountant au Còu de l’Autaret (4). Lou noum meme dóu rode nous remando i Cèlto, bord que Blins vèn dóu noum de l’Apoulon galés Belenos (5) segound lis especialisto de toupounimìo.

A Ruha-la-Guiéso, l’amèu principau, anerian en bousco de mounumen mounte èron representado de tèsto umano, car Jan-Lu Bernard, autour d’uno mounougrafìo sus la valengo de sis aujòu, evoco l’ipoutèsi de l’ispiracioun celtico d’aquélis esculturo. De segur li caro escultado fan pensa i descuberto arqueoulougico facho en Prouvènço en Entremount o à Rocopertuso ounte s’èi atrouba de pourtegue emé de capeleto destinado à reçaupre de cran uman.

Se saup despièi toujour que li Cèlto avien lou culte de la tèsto umano. Tre l’Antiqueta se n’en parlavo. Pèr l’istourian Dioudore de Sicilo li tèsto èron de cran d’enemi : "Embaumon li tèsto de sis enemi li mai celèbre dins l’òli de cèdre e li servon emé siuen dins de cofre. Li fan vèire em’ ourguei is estrangié en fasènt lou raconte qu’un de sis aujòu refusè de douna talo o talo tèsto contro uno grosso soumo d’argènt. D’ùni que i’a se fan glòri d’agué refusa d’escambia l’uno d’aquéli tèsto contro soun pes d’or".

Vuei lis arqueoulogue pènson que li tèsto espausado pèr li Cèlto dins lou relarg prouvençau èron pulèu aquéli de si rèire. Si descendènt i’aurien vouda un culte coume en d’erò. Li cercaire qu’an travaia sus la Tarasco de Novo an vist dins l’espàci entre li pauto dóu moustre uno meno de pausadou qu’aurié aculi siegue un cran, siegue d’óufrèndo.

De tout biais, la segoundo esplico lèvo pas de cassolo aquelo de Dioudore de Sicilo, que poudèn imagina un culte dis erò, meme enemi... Artisticamen lou tèmo s’es esperlounga dins l’art di glèiso roumano que si pourtau, capitèu, moudihoun soun poupla de fàci umano barbassudo o noun.

Lou pertus de la Traverseto

Lou Còu de la Traverseto que s’aubouro à 2947m d’auturo fai coumunica Queiras e Piemount. Destrauco istouricamen sus lou Marquesat de Saluço. Lou segnour d’aqueste fièu s’atroubè, en 1210, féudatàri dóu Dóufin de Vienés. En 1349, Umbert II, darnié Dóufin, cedè soun estat au rèi de Franço, es ansin que li marqués de Saluço devenguèron vassau di Capecian.

Pèr desenclava lou marquesat, qu’èro au mitan di terro savouiardo, e facilita lou coumèrci, Ludovi II, en founcioun de 1475 à 1504, aguè l’idèio de cava un pertus souto lou Còu de la Traverseto. D’efèt, meme se lou camin mounto et davalo soude, li tiero de miòu pourtant la sau di salino d’Ièro gagnavon tres jour sus l’itineràri passant pèr lou còu dóu Mount Genèbre.

La sau, à l’epoco, èro un pau coume lou petròli de vuei. Pèr lou marqués falié subre tout evita d’aquita de dre de douano qu’aurien endrudi lou tresor savouiard. Dins lis escàmbi i’avié pas soulamen la sau, mai un impourtant tiro veni de proudu de touto meno. De Prouvènço venien l’òli, lou fedan, dóu Dóufinat li teissut e li drap d’Espagno. Au contro, venien de la plano cisaupino lou ris, alor cultiva dins lou marquesat, li telo de Carmagnolo, lis ase de Brondello e de Cavour (pèr n’en faire de saussissot).

Adounc, emé lis acord dóu Parlamen de Grenoblo, de Reinié II d’Anjou, darnié comte de Prouvènço e de Louvis XI, rèi de Franço, Ludovi II fisè lou cavamen dóu pertus à dous mèstre d’obro : Martin de Sant Auban e Baldassar de Piasco. Lou chantié coumencè en 1480 à 2.882m d’auturo. Lou pertus es long de 75m, larg de 2,50m, aut de 2m. Li miòu embasta ié poudien passa. Après lou tratat de Lioun de 1601 que cedè lou marquesat de Saluço à l’Oustau de Savoio, lou pertus perdeguè soun impourtanço geoupoulitico e fuguè pau à cha pau abandouna. Pamens l’obro, dificultouso se tenèn comte di mejan teini de l’epoco, restara pèr sèmpre la proumiero traucado aupenco. Acò s’amerito d’èstre serva dins la memòri di Pople d’Éuropo. Alan COSTANTINI
(1) Soun fraire, Frederi Lombardi, es lou porto-paraulo dóu Papo Benezet XVI.
(2) Lotus.
(3) Quintino Sella (1827-1884), engeniaire di mino, menistre di finanço, foundadou du Clube Aupen Italian en 1863, faguè partido de la proumiero espedicioun qu’escalè lou Vis.
(4) Pas aquéu ounte passo lou tour de Franço. L’Autaret es un toupounime coumun dins lis Aup.
(5) Coume Bouleno dins lou despartamen de Vaucluso.

sign_jgr




barre de fin de page


 
 

1076174