L’annado 2008 s’acabo e 2009 s’avanço.

Pèr nàutri, gènt dóu Miejour, enfant de Prouvènço e de tóuti li Païs d’Oc, 2009 sara uno annado boulegarello.

D’efèt li gràndi manobro an coumença pèr tourna davala pèr carriero fin de faire recounèisse li dre de nòsti parla d’Oc.

En Prouvènço - e coume Marsiho vai èstre capitalo éuroupenco de la Culture en 2013 - uno manifestacioun naciounalo prouvençalo pourrié se debana à la primo de 2009, lou mounde nostre estènt counvida à bèl èime d’espaceja bandeirolo, bandiero e eslougan sus la Canebiero, lou Port-Vièi, davans l’Oustau de Regioun e la Coumuno Fouceiano.

De l’autro man dóu Rose - e coume 2009 marcara l’anniversàri 800en dóu saqueja, de l’encèndi e de la destrucioun de Beziés pèr li sacamand de la Crousado contro lis Albigés - es dins la ciéuta di Trencavel que, vengu de tóuti li Païs d’Oc, adounc tambèn de Prouvènço, de deseno de milié de manifestant van proubable s’acampa dins uno apouteòsi de bandiero, de reven­dicacioun e de musico.

Vai soulet que vaudrié miéus, pèr lou cop, uno grand manifestacioun unitàri pulèu que dos, chascun leissant un pau de caire si redour ideioulougico. Vo, alor, e perqué pas? de manifestacioun dins chascuno di capitalo regiounalo d’Oc : Marsiho, Mount-Pelié, Toulouso, Bourdèus, Limoge, Clarmount d’Auvergno, sènso leissa de caire li capitalo dis encountrado d’Oc que soun en foro di regioun councernido, Privas (en Vivarés), Valènço (en Droumo) e de vilo coume Perigus e Niço pèr li relarg que tènon li raro dóu doumaine lenguisti d’Oc.

Vosto revisto sara presènto dins li manifestacioun chasque cop que lou faudra.

Demandaren, peravans, à nòsti legèire de jouga la carto de l’unita à respèt, bèn segur, de sis afineta.

Vivèn uno pountannado douminado pèr la criso dóu sistèmo financié moundiau. Mai es aqui que fau se ramenta de la paraulo de Frederi Mistral : Quau tèn sa lengo tèn la clau que di cadeno lou deliéuro.

E d’aquesto autro : Dis Aup i Pirenèu, troubaire, aubouren lou vièi parla rouman, acò’ s lou signe de famiho....