l’Almanach des Provençaux 2009

Coume chasque an, l’Almanach des Provençaux a baneja vers li marchand de prèisso. La tinado 2009 èi drudo d’un mouloun de recèto, pichot tèste, conte e raconte, ditoun e reprouvèrbi. Fai un pau de plaço à la lengo nostro, mai pas proun de noste avejaire. Pamens, fai lou laus de noste ami lou countaire dóu Leberoun, lou regreta Jan-Glaude Rey, qu’avié forço countribuï is armana dis annado d’avans. Ié trouvan pièi li signaturo de :

• Girard Bardon que, dins un lindau, ramento l’óurigino pagano de nòsti tradicioun de Nouvè coume lis emprunt à la mitoulougìo egiciano anciano (auriolo soulàri di sant, Vierge à l’enfant que retipo Isis alachant soun nouvèu-na).
•  
• Arvé Berteaux (Marseille Pagnol - Le mur de la peste etc.); Verounico Herman (Dans l’enfer de la Tour de Constance - Les farots de Provence contre les barbaresques - Sur les pas des compagnons de la Sainte-Beaume - Une ' cavalcade ' bien provençale : la Carreto Ramado - etc.); P.J. Brassac (Magali de Peypin - Qui connaît Richerenches, voit sa chance etc. - pièi de prouvèrbi en prouvençau).
•  
• Francés Pons, tambèn, que signo li raconte seguènt en prouvençau : Coundutour de vuei, coundutour d’aièr e La rodo de la daiarello.
•  
• Inès de Villeneuve, enfin, nous porge un raconte en prouvençau de la mar , que i’es esta fisa pèr uno amigo : Moun proumié viage à Paris.

L’Almanach des Provençaux es ilustra d’un fube de carto poustalo anciano, de dessin, de pichòti biougrafìo de gènt celèbre de Prouvènço e, bèn segur, de semanié que se ié podon nouta rendèsvous em’ evenimen impourtant.

Signalaren, touto-fes, que definis Prouvènço d’un biais un pau curious : uno part dis Aup de Prouvènço-Auto e lis Àutis-Aup n’en fan pas partido! Pèr lou mounde prouvençau d’eila, ié fau croumpa un autre armana que vai enjusqu’i raro de Lioun e que ié caupon, dedins, de territòri franco-prouvençau.

Bonur pamens pèr lou mounde de Droumo e d’Ardecho qu’an un armana pèr éli soulet. Mai n’en vai pas parié pèr la Prouvènço gardounenco que s’atrovo, coupado de la ribo d’empi, dins l’armana dóu Lengadò. Èi de souveta que l’Almanach des Provençaux pèr 2010 siegue un pau mai drud e cuerbe l’ensèn di territòri prouvençaloufone.

Saludaren, quand meme, lou pres-fa dis Edicioun CPE que prepauson uno tiero de 41 armana qu’interèsson tóuti li terraire de Franço metroupoulitano. Lou fau faire!