L’Almanach dauphinois pèr 2009

Es un armana qu’a pres la seguido de l’Almanach du Vieux Dauphinois. N’es à soun numerò 43. Es plasènt, bèn fa e, subre-tout, es un armana coume lis amavon nòsti rèire, coume n’en vendien li marchandot que passavon dins li granjo e dins li mas.

Dins sa proumiero partido, noto li fenoumène astrounoumi (cicle soulàri, luno rousso, cambiamen d’ouro, sesoun, quatre-tèms, sant de glaço, fàsi de la luno), li fèsto de l’annado e li vacanço escoulàri. Avèn pièi, pèr chasque mes, un calendié forço detaia emé li counsèu, tant pèr-çoqu’es dóu tèms de prevèire que dis obro de la terro. Pèr tres vilo, Grenoblo, Valènço e Gap, avèn jour à cha jour pèr 2009, li leva e tremount dóu soulèu.

Dins sa segoundo partido, l’Almanach Dauphinois douno de novo dóu païs, de si gènt, d’entrèvo, de doucumentàri etnougrafi, istouri, e meme un conte de Pau Arène.

Coume chasque an, li patoues dóu Dóufinat soun à l’ounour emé tres conte : Uno vieillo fenno, de Jan Bourboun de la Béliers (Àutis Aup), que mostro bèn lou parentage emé li parla dóu Vivarés; La Mélanie à Paris, de Jan Voterro ( Gresivaudan Aut); Lou Calabert, de Suzanne Sivan, de Saòu. Pièi, dins quàuqui pajo, espepidouno li varieta dóu patoues dóufinen pèr de mot o biais de dire francés coume : recroquevillé, s’endormir, se réveiller, où vas-tu? - le tilleul. L’espressioun où vas-tu? presènto, à-n-elo souleto, 24 variacioun dialeitalo, que d’ùni soun forço procho dóu prouvençau roudanen.

De nouta, encaro, de cansoun cantado antan en Dóufinat, que le Vieux Dauphinois a recoustituïdo e que, pèr l’uno d’entre éli, Farandole du Rhône, sarié tras qu’eisa de metre de paraulo prouvençalo sus li paraulo franceso.