Femna mon amor
de Sèrgi Bec

Sabèn tóuti lou dòu qu’a maca noste ami Sèrgi Bec, lou pouèto d’Ate, emé la perdo de sa femo escarido Aneto. Vuei, en souveni d’elo, Sèrgi nous porge un recuei de dès-evue pouèmo dedica, chascun, en de femo nostro coume Silvìo Ariés, Miquèla Bramerie, Carina Istre, Glaudeto Occelli, Luciana Porte-Marrou, Maria Rouanet, Maria-Joana Verny, Oumbelino e bèn d’autro.

Lou recuei es adourna de dessin de Bernat Manciet e Caròl Poirson. Es esta publica bonodi lou Counsèu Regiounau d’Aquitàni.

Ié retrouvan lou grand lirisme amourous de Sèrgi Bec, aquesto lengo que fai desbounda lis image, li sentimen, dins un rajòu de mot que s’embandisson dins uno pouësìo libro.

Li pouèmo soun escri en grafìo óucitano, estènt que Sèrgi pratico voulountié l’ecumenisme di biais d’escriéure, em’ en regard la reviraduro franceso. Citarai, en particulié, tres pouèmo que Sèrgi i’esprimo soun questiounamen sus la femo, li femo, e soun engajamen contro la guerro :

• Lo matin saluda ton nom (Lou matin saludo toun noum).
• Femnas de totei lei colors (Femo de tóuti li coulour).
• Balada per Lili Fòng (Balado pèr Lili Fong).

E pièi n’i’a un encaro que lou pouèto i’a bouta touto soun amo, touto sa noustalgìo, es La Dòna deis Aucèus (La Dono deis Aucèu), que s’acabo pèr un plang :

Ma vida se mesura pus au temps
E lo temps crema ma poësia.