ensignadou


Libre-disque-nouvèuta
L’Almanach des Provençaux.

Ensignadou

Nòstis emissioun
Prouvèrbi pèr l’ivèr que banejo.

La bono draio

Editouriau :
Lou Groënland

Estage de prouvençau à St-Martin de Crau.

L’Evenimen :
Bòni Fèsto de Nouvè!

Nòsti dòu
Jaume Espelly
Reinié Jalabert.

Li Gènt d’eici.
Óublidés pas Charloun!
Serado d’ivèr.

Noste doursié : la Crau.
Li jasso antico de la Crau.
La Crau aièr, vuei e deman.
Lis escrivan e pouèto qu’an canta la Crau.

Espacejado dóu barrulaire à velò.
A la Font de Vau-Cluso.

La sesoun 2008 de la Bouvino
Setanto an de bouvino

Études comtadines
Azalaïs
Lou Cansounié prouvençau

Alegre!..Alegre!..Calèndo vèn!..

L'estello di set rai e li tradicioun de Nouvè.

La Valèio de la Roia, la Valèio di Santoun.

L’óurigino di dessèr de la taulo calendalo.

Nouvè 18.

Li pampaieto d’aur.

Trin di Pastouralo Prouvençalo.

Li Pastouralo Prouvençalo.

Nouvè trufarèu en Leberoun

Louvis Matiéu Verdilhan

Dis Aup i Pirenèu
Li quatre chato de Givaudan e de Prouvènço

Trin di manifestacioun Prouvençalo.

Libre-disque-nouvèuta
L’Almanach dauphinois pèr 2009
Femna mon amor de Sèrgi Bec
Lou Diciounàri de l’Ariege

 




À la Font de Vau-Cluso

Pèr lou cop, en avisant la meteò d’aquésti darrié tèms, poudren pas dire que plòu jamai sus nosto terro de Prouvènço! Mai d’abord, vous vau pamens baia lou relevat di jour de plueio de l’annado sus Sant-Roumié mounte rèste. Veirés qu’es parpello d’agasso à respèt de ço que toumbo sus d’àutri regioun que li citarai pas, mai... seguissès ma lucado!

Janvié : 2 jour de pichoto plueio. Febrié : 1 jour de plueio. Mars : 2 jour de pichoto plueio. Abriéu : 5 jour de plueio. Mai : 6 jour de plueio, dirai proun counsequènto. Jun : quatre degout coume disié ma grand. Juliet : uno chavano e uno pichoto raisso. Avoust : uno chavano. Setèmbre : uno bono plueio de la journado. Óutobre : hoi! 5 jour de plueio. Nouvèmbre : 6 jour de plueio à l’ouro qu’escrive, sian lou 19. Pamens, es egau! 6 jour de plueio quàsi à-de-rèng, pèr un Prouvençau, acò ’s quicon...

Verai que Durènço es proun grosso e que l’aigo a bèn toumba sus lis auturo de Vaucluso (1) e di Bàssis-Aup. D’aqui, un coumpan miéu que rèsto à Cavaioun me diguè i’a quàuqui jour :

- Moun brave Ive, se vos vèire un bèl espetacle d’aigo, te fau enfourca toun velò e tira sus la Font de Vau-Cluso que te n’en dise qu’acò!

Vau-Cluso

Adounc, me vaqui lèst pèr l’óuperacioun Font de Vau-Cluso. Siéu toujour un pau en tramble* quouro tire vers Vaucluso. Es un despartamen que m’agrado forço, anas saupre perqué? Belèu acò vèn de ma neissènço cavaiounenco vo encaro qu’es un despartamen bèn equilibra pèr ço que toco la geougrafìo, li vàsti plano agricolo encenturado pèr lou Rose au pounènt, Durènço e la mountagno de Leberoun à l’adré, lou pendis dis Aup au levant e Ventour gigantas vers l’uba.

Mai basto, anan pas faire un cous de geougrafìo! Me veici sus lou velò. Uno bello journado d’autouno s’anóuncio, lou soulèu es proun palinèu, certo, mai mando si rai à-travès di piboulo quàsi desfuiado que s’esperlongon dins lou cèu clarinèu.

En partènt de Sant-Roumié, endraie toujour li pichòti routo que menon vers lou pont de Cavaioun en passant pèr lou campèstre. Pas tant couioun d’endraia la grand routo drecho, estranglado entre li platano e trevado pèr uno moulounado de camiounas de mai en mai noumbrous.

Mai lou poun lou mai tihous pèr un ciclisto es d’arriba à Durènço sènso auvàri! Lou pichot vilajoun de Plan-d’Ourgoun, pamens dins li Bouco de Rose e en ribo gaucho de Durènço, es devengu despièi quàuqui deseno d’an uno di gràndi zouno endustrialo e coumercialo dóu relarg cavaiounen. Sus la routo, à-n-aquel endré, li velò an pas lou blanc dóu pòrri! Basto, à forço de risca sa vido dins li gràndi routoundo, sus li routo à quatre vìo, entre dous gros camioun, quàuqui veituro sèmpre preissado que vous passon à ras, avès pamens quàuqui màigri chanço d’arriba vivènt sus lou pont que vous fai rintra en Vaucluso. Sian à Cavaioun que, ma fisto, se debano proun bèn. Après un souspir de malancounié en vesènt ço qu’an fa de moun escolo - lou cous coumplementàri, coume se disié alor - e qu’es devengu un pargage pèr li veituro, me rèsto que de tira sus l’Isclo-de-Venisso pèr arriba à Font de Vau Cluso (dóu latin Vallis Clausa) mounte Petrarco se retirè en 1337 pèr ié coumpausa la maje part de si pouësìo.

la descenteÇo que pico l’iue en arribant es que i’a quàsi ges de vesitaire; lou mes de nouvèmbre es lou meiour moumen pèr veni s’espaceja dins aquest endré e, s’en mai d’acò avès la chanço d’agué li gràndis aigo, alor es l’Americo... espressioun que se disié après la guerro de 39-45 e qu’entendiéu proun souvènt dins la bouco di gènt. I’avié meme un cantaire francés que n’avié fa ’n titre de cansoun ! Acò voulié dire pèr resumi qu’erias au païs di raive mounte tout es aboundous, meravihous, basto... lou païs dóu drudige e dóu bonur... Curious pamens que despièi d’annado aquesto espressioun s’entedeguèsse plus! Se n’i’a qu’an uno esplico aqui subre, me la dounaran...

Mai vaqui lou panèu Font de Vau-Cluso, ié sian! En passant sus lou pont, se pòu devina eisa qu’un espetacle grandaras nous espèro amount. D’efèt, l’aigo es auto contro li ribo e tendrié un chivau au galop; uno aigo verdo e lindo que deja formo la Sorgo à mand de s’esparpaia un pau d’en pertout dins lou despartamen que, mounte que passessias, poudès ié remira sis aigo blouso.

L’espelido de la Sorgo

La Sorgo es uno meraviho de la naturo : lou mai pouderous sourgènt de Franço e lou cinquen dins lou mounde.

Aquest sourgènt es prouvesi pèr lis aigo souto-terro di Mount de Vaucluso, de Ventour e de la Mountagno de Lure. Fau eici ramenta que lou poun lou mai founs es à 308 mètre souto la baumo; fuguè ajoun en 1985 pèr un roubot de la soucieta espeleoulougico de Font de Vau-Cluso.

Acò dich e sènso faire d’alòngui, m’endraie d’àpèd, en tenènt la biciéucleto d’uno man, à rebous de ribiero sus lou camin enquitrana. Dóu tèms que camine, ause un bram terrible eilamount. A flour e mesuro que mounte, à rebous dóu courrènt, lou brut vai creissènt e se devino deja darrié lis aubre quàsi desfueia de la ribo, li proumié biòu d’aigo* subroundant li roucas moussu en jitant d’escumo de tout caire dins un bramadis esfraious. Sorton d’endessouto e d’en pertout; sis aigo se mesclon pièi dins de revoulun qu’es pas de crèire : un espetacle pivelant que mis iue se n’en podon pas derraba!

Me fau pamens mounta jusqu’au trau, au garagai. Tout de long, lis aigo boumbissènto soun que mai enferounado. Sèmblo que van escranca li gros roucas tanca ’qui, proubable despièi de siècle.

Me vaqui davans la baumo roucadisso. Curiousamen, l’aigo que remplis lou trau sèmblo noun mouvedisso e pamens, quand reluque li proumié roucas à ras dóu garagai, l’aigo se rounso entre éli e pren subran uno vitesso folo en escumejant e bramant à faire pòu. Rescontro dins sa cabussado despouderado li biòu d’aigo qu’ai vist en mountant e m’avise alor que siéu en trin de viéure un evenimen espetaclous que perduro despièi de siècle e sènso relàmbi : l’espelido de la Sorgo!

A-n-aquelo subito pensado, tout moun èstre se pren d’un tau fernimen que n’en rèste un moumen palafica...

Lou partage dis aigo

le partage des eauxPlan-planet revène sus terro coume après un pantai que t’a bourroula dins la som!

Sus lou camin dóu retour vau m’arresta un moumenet à-n-un endré bèn particulié, un poun simbouli dóu despartamen e que pamens forço mounde counèisson pas. Aqui, à un kiloumètre à l’amount de l’Isclo de Venisso, s’atrobo lou partage dis aigo de la Sorgo. Es aqui que la Sorgo (dicho d’amount) se desseparo pèr deveni Sorgo de Veleroun e Sorgo d’Entre-Aïgo.

Coume se pòu coustata sus la foutò çai-sus, la Sorgo amount es estado barrado pèr l’ome e l’aigo vai desenant s’escoula dins dous besau*, l’un à drecho vers Entre-Aïgo, l’autre à man senèstro vers Veleroun.

De moulounado de Sorgo

Aquéli dous bras maje van pièi se ramifica en uno trenteno de Sorgo qu’an tóuti soun noum e que caminon sus 500 kiloumètre dins un bacin que represènto uno surfaço de 1230 km2 pèr pièi tóuti se rejougne à Bedarrido pèr se jita dins Óuvezo. De nouta que lou canau de Vaucluso qu’eisisto despièi, proubable, au mens milo an, se pren sus la Sorgo d’Entre-Aïgo se jito, éu, dins Óuvezo à Pont de Sorgo. Pamens, uno de si branco dicho d’Avignoun rintro dins la ciéuta papalo pèr la Porto Limbert e passo majamen souto la vilo pèr se perdre dins lou Rose au sud dis Alèio de l’Oulo. L’aigo que vèn prouvesi la carriero di Tenchurié n’en fai partido. Mai charre, charre.. me fau rintra sus Sant-Roumié, que la niue toumbo lèu en d’aquesto sesoun...

topographiePèr clava, retendren que la Font de Vau-Cluso, en dounant neissènço à touto aquelo moulounado de Sorgo, countribuïs despièi de siècle à l’agriculturo dóu despartamen de Vaucluso. Óublidessian pas nimai qu’un fube d’usino de touto meno an marcha bono-di sa forço idroulico de siècle de tèms e qu’anaro passa pèr maio.

Aquelo escourregudo dins lou bacin di Sorgo s’acabo. Prene toco emé vous, amigo e ami legèire pèr uno permenado d’ivèr, à saupre mounte? Belèu dins la nèu... Tenès-vous gaiard!

signaHuma

Leissique
besau : chenal;
biòu d’aigo : masse d’eau qui se précipite dans un ravin; -
en tramble : fébrile.
(1) - S’escriéu Vau-Cluso pèr la Vau mounte sourgènto la Font e Vaucluso pèr lou despartamen francés crea à la Revoulucioun.
deco de bas de page

1118111