ensignadou


Libre-disque-nouvèuta
L’Almanach des Provençaux.

Ensignadou

Nòstis emissioun
Prouvèrbi pèr l’ivèr que banejo.

La bono draio

Editouriau :
Lou Groënland

Estage de prouvençau à St-Martin de Crau.

L’Evenimen :
Bòni Fèsto de Nouvè!

Nòsti dòu
Jaume Espelly
Reinié Jalabert.

Li Gènt d’eici.
Óublidés pas Charloun!
Serado d’ivèr.

Noste doursié : la Crau.
Li jasso antico de la Crau.
La Crau aièr, vuei e deman.
Lis escrivan e pouèto qu’an canta la Crau.

Espacejado dóu barrulaire à velò.
A la Font de Vau-Cluso.

La sesoun 2008 de la Bouvino
Setanto an de bouvino

Études comtadines
Azalaïs
Lou Cansounié prouvençau

Alegre!..Alegre!..Calèndo vèn!..

L'estello di set rai e li tradicioun de Nouvè.

La Valèio de la Roia, la Valèio di Santoun.

L’óurigino di dessèr de la taulo calendalo.

Nouvè 18.

Li pampaieto d’aur.

Trin di Pastouralo Prouvençalo.

Li Pastouralo Prouvençalo.

Nouvè trufarèu en Leberoun

Louvis Matiéu Verdilhan

Dis Aup i Pirenèu
Li quatre chato de Givaudan e de Prouvènço

Trin di manifestacioun Prouvençalo.

Libre-disque-nouvèuta
L’Almanach dauphinois pèr 2009
Femna mon amor de Sèrgi Bec
Lou Diciounàri de l’Ariege

 









L'estello di set rai
e
li tradicioun de Nouvè

Lou mouvemen de Reneissènço Prouvençalo e di Païs d’Oc embandi pèr Frederi Mistral e sis ami a pres pèr emblèmo uno estello di sèt rai. Simbouliso li sèt primadié que, lou 21 de mai de 1854, s’acampèron (emai fuguèsson que quatre aqueste jour d’aqui) à Font-Segugno, coumuno de Castèu-nòu de Gadagno, en Vaucluso. Fuguè di qu’èro lou jour que se festejavo santo Estello, uno martiro crestiano incouneigudo en Prouvènço, qu’aurié viscu en Santounge e que sarié estado la disciplo d’un sant Estròpi, diferènt dóu patroun d’Aurenjo.

L’impourtant, pamens, es qu’en adóutant l’estello di sèt rai, li primadié, emé Mistral, se counsideravon, peréu, coume lis eiretié d’uno antico tradicioun bèn presènto dins aquéli de Nouvè.

Iéu lou darrié bessai de ti cresèire...

Mistral, éu-meme, lou fiso quouro dins si Memòri e raconte parlo de l’acamp de Font-Segugno :

- Pièi, tout acò regla, l’on s’avisè, ma fisto, que lou 21 de Mai, dato de noste acamp, èro lou jour de santo Estello; e, coume li rèi Mage, recouneissènt aqui l’aflat misterious de quauco auto counjouturo, saluderian l’estello que presidavo au brès de nosto redemcioun.

E encaro, dins Lis óulivado, que lou pouèto i’acabo Moun toumbèu pèr aquesto estrofo :

Enfin, à bord d’esplicacioun,
Diran : «Es lou toumbèu d’un Mage,
Car d’uno estello à sèt raioun
Lou mounumen porto l’image».

Enfin, dins Lou Pouèmo dóu Rose, vesèn, à la remounto dóu flume, Guihèn d’Aurenjo, lou Dra, davans l’autar dóu diéu Mitra, à la Font de Tourno, au Bourg Sant-Andiòu, pensant is :

(...) adouraire dóu souleias bléuge
Mountant o descendènt lou flume
Pèr faire en devoucioun soun roumavage
Au diéu Mitra, «lou soulet invincible».
E se disié : - Soulèu de la Prouvènço,
O diéu que ié coungreies lis angloro,
Que fas sourti d’en terro li cigalo,
Que dins mi veno marfo e palinouso
Reviéudes lou sang rouge de mi rèire,
Diéu roudanen que lou Dra dins si vòuto
Agouloupo, à Lioun, au Bourg, en Arle,
E que dóu negre tau dins lis Areno
Encaro vuei t’es fa lou sacrifice
Incounsciènt, diéu qu’escavartes l’oumbro
Galoi, qu’en uno ribo incouneigudo
Vuei es desert toun autar - e toun rite
Abandouna dins l’óublit, iéu barbare,
Iéu, lou darrié bessai de ti cresèire,
Vole sus toun autar óufri, premiço
De ma felicita, ma niue de noço!

Lou culte di mistèri de Mitra

Li rèi Mage, l’estello di sèt rai, lou diéu Mitra, coume vai que?... D’ùni pènson que Mistral èro esta inicia en d’ensignamen secrèt vo escoundu; belèu avié-ti agu de liame, à-z-Ais, emé de disciple dóu teousofe Fabre d’Olivet? D’acò n’avèn ges de provo, leva de tros de soun obro, coume aquésti que venèn de nouta, mounte se vèi clar que couneissié d’anciàni tradicioun e que, de bon, ié restacavo uno part de sa filiacioun esperitalo.

Fau ramenta eici lou mot de Renan, à prepaus de Mitra : - Si le Christianisme avait été atteint d’une maladie mortelle, le monde eût été mitraïque. Lou culte di mistèri de Mitra èro deja vièi de 2.000 an quouro lou Crist coumencè de predica. Mitra èro un diéu soulàri indou-iranian, un diéu de la lumiero. L’arqueoulougìo, au nostre, atèsto que soun culte ié fuguè pratica : sèmblo meme que, dins un tèms, fuguè Mitra lou diéu maje dóu païs roudanen, sus li dos man dóu Rose!

À si prèire ié disien li magoi, es de dire li mage. Magoi, mage, mège, tout acò ‘s parié. E, dins la religioun di mistèri de Mitra, li rèi Mage, qu’èron si grand prèire, èron li pontifex dóu culte. La grando fèsto de la neissènço de Mitra toumbavo lou...25 de desèmbre. À Roumo, la coulino vuei dicho vaticano, èro la capitalo dóu culte di mistèri de Mitra. Ié disien, antan, la coulino de Mithra-Pétréo»; i’avié ‘qui un tèmple vouda à la divesso Cibèlo (la memo que figuravo à la Fèsto-Diéu de z-Ais). Se ié faguè lis iniciacioun i mistèri de Mitra enjusquo la fin dóu siècle 4en de nosto èro. Enfin, e ié sian, l’un di simbole dóu culte èro uno estello di sèt rai - helios heptaktis - que simboulisavo lou soulèu.

Uno estello de verita

L’estello de Mitra es pariero à l’estello chausido pèr Mistral coume emblèmo de la Reneissènço Prouvençalo e di Païs d’Oc.

Es un simbole de verita que councèntro en éu l’essenciau de la couneissènço dis Ancian, en particulié de sa cousmougounìo. Lis Ancian couneissien 7 planeto boulegadisso, vesiblo de la terro, lou soulèu (qu’es uno estello) estènt counsidera coume l’uno d’entre éli. Plaçavon aquéli 7 planeto sus un ciéucle, lou soulèu e la luno estènt avers. Pièi, li religavon entre éli, en partènt de la luno, traçant ansin uno estello di sèt rai perfèto.

Pèr li Grè, l’estello ansin dessinado representavo l’ordre dóu mounde cousmi, tau que sa sciènci lou definissié. Pèr lis Indou-iranian, fidèu di mistèri de Mitra, lou traça di sèt rai simboulisavo lou camin iniciati dis amo, viajant de la luno au soulèu, adounc de l’escur vers la lus!

Ansin, dins li dos tradicioun, l’estello di sèt rai èro l’essènci di couneissènço, uno essènci que, d’aiours, utilisan despièi 300 après J.C. dins nosto vido vidanto. Coume? Eh bèn, vaqui...

De l’estello à la semano...

illustration

Lou biais de coumta li jour en semano, es de dire pèr 7, nous vèn di Caldean e dis Iranian. Li vièi Rouman, lis Egician, li ancian Grè, li Chinés emplegavon, éli, la decado. Pièi, en Éuropo, souto l’enfluènci de la sciènci grèco e di mistèri de Mitra, se prenguè l’abitudo d’utilisa la semano.

Dins la semano, coume dins la coustrucioun de l’estello di sèt rai, chasque jour, coume chasco pouncho d’aquelo estello, es vouda à-n-uno planeto boulegadisso. E se capito que nòsti jour e si planeto soun arrengueira dins lou meme ordre, la memo prougressioun que pèr l’estello de Mitra :

  • Luno Dilun (Lunae dies)
  • Mars Dimars (Martis dies)
  • Mercùri Dimècre (Mercurii dies)
  • Jòu Dijòu (Jovis dies)
  • Venus Divèndre (Veneris dies)
  • Saturne Dissate (Saturnii pièi Sabbati dies)
  • Soulèu Dimenche (dies Domenica)

...e i Fèsto de Nouvè

À Roumo, i’avié vers lou siècle tresen, uno centeno de santuàri de Mitra, li Mithreum. N’i’avié 20 à Oustìo. Li Rouman avien, dóu 17 de desèmbre i Calèndo de Janvié (premié jour dóu mes), de fèsto apelado Saturnalia. Ié caupié, dedins, au jour dóu soulstice d’ivèr que lou calendié julian plaçavo lou 25 de desèmbre, la fèsto dóu Dies Natalis Solis Invicti (fèsto dóu soulèu-diéu invincu) en l’ounour de la neissènço de Mitra dins uno croto.

La councurrènci entre li dos religioun, crestianisme e mitracisme, fuguè fèro. Es emé la counversioun de l’emperaire Coustantin en 312 que lou crestianisme coumencè de l’empourta, impausant sa vesioun dóu mounde au poudé rouman.

En 374 l’emperaire Gracian refusè lou titre mitriaque de pontifex maximus (pountife soubeiran). Es emé l’emperaire Teoudòsi, en 391, que li culte diferènt dóu crestianisme fuguèron definitivamen enebi.

Pamens lou mitracisme èro talamen enracina que la glèiso catoulico deguè, pèr l’empourta, encourpoura d’elemen de la religioun mitriaco dins soun ideioulougìo e dins si rite.

Lou jour dóu soulèu - li darnié pople crestianisa n’en garda lou souveni (1) -, qu’èro lou jour dóu Segnour Mitra, devenguè lou dies Domenica. Lou jour de Saturne devenguè lou dies Sabbati.

Pièi, lou papo Libère, en 354, decidè que la neissènço dóu Crist sarié celebrado lou 25 de desèmbre, en liò e plaço de la fèsto soulsticialo dóu Dies Natalis Solis Invicti counsacrado à Mitra, decisioun counfiermado en 376.

Un diéu despareissié. Un autre anavo faire l’empèri dins lou mounde óucidentau.

Vàutri, li gènt jouine...

Ansin Mistral, en prenènt uno estello di sèt rai pèr simbole de soun acioun, la restaquè en de tras qu’anciàni tradicioun. Avès remarca, coume nautre, l’impourtanço de la chifro 7, l’impourtanço dis astre, l’entendamen (2) de l’ordre simbouli dóu mounde... Mistral, dins soun obro, nous amountagno pèr de draio mounte li flour dóu camin soun culido de couneissènço.

E sabié ço que fasié, noste magoi, lou proufèto de Maiano! Ramentas-vous : veici Guihèn, Guihèn-Mistral, que remounto lou grand Rose, à bord dóu Caburle. Fàci la Font de Tourno, éu, lou magoi, s’adrèisso à Mitra, lou diéu roudanen :

- Iéu lou darrié bessai de ti cresèire...

Pièi, à Maiano, sus soun toumbèu, es bèn pèr que pousquessian nous restaca i tradicioun li mai anciano, de dela l’istòri legendàri de la santo crestiano, que ié faguè escrincela l’estello di sèt rai.

E nous diguè encaro mai :

- Vàutri, li gènt jouine que sabès lou secrèt, fau que noun s’arrouino lou mounumen escrèt.

En Prouvènço, dins lou Païs Roudanen, lou pople gardo encaro vuei la fe di biòu, liuenchen souveni di rite de Mitra.

E dins si belèn, li magoi arrivon toujour pèr se clina davans l’enfant, sèmpre bloundin, que vèn de naisse, guida que soun pèr soun estello.

Vièi souveni de l’anciano Roumo, avèn Nouvè (dóu latin Nouellus sol coume dóu grè Neos Helios = jouine soulèu) coume maje fèsto. Ié disèn tambèn Nadau (dóu latin natalis) e subre-tout Calèndo, estènt que Nouvè (se dis tambèn Nouè) ramplaço li Saturnalia que se debanavon avans Kalendae, noum de tóuti li premié jour di mes, adounc dóu premié de janvié (3).

Mistral, encaro, e coume l’a nouta Carle Galtier, a ramenta qu’en Prouvènço, antan, l’annado coumençavo e finissié à Nouvè.

Nouvè es la nouvello annado que se duerb : es uno annado soulàri, que vai se debana de soulèu en soulèu, de reneissènço en reneissènço, marcant ansin l’anamen cousmi de noste mounde.

signrou

Noto :

(1) - Eisèmple : Sunday, Sontag, Zontag.
(2) - Dins lou sèns de coumprenesoun, lis ancian Catare, li «bon crestian», disien qu’avien «l’entendomen dau bèn».
(3) - Li quinge o sege darnié jour d’un mes, apela li Kalendae pèr li Rouman, se decoumtavon de-requiéuloun, à respèt dóu premié jour dóu mes seguènt apela Pridie Kalendas (lou mot calendié n’en vèn), aquéli quinge jour, fasien la pountannado calendalo mounte se debanavon li Saturnalia e la fèsto dóu Dies Natalis Solis Invicti.



deco de bas de page

1 081