Andriéu Degioanni.
Ensignadou.
Prouvèrbi pèr l’ivèr qu’es aqui.
E la nèu toumbè...
Editouriau :
Au Tor volon pas dis OGM
Novo - Assabé - Estage.
L’Evenimen :
Nòsti vot pèr 2009.
L’Annado «Mirèio».
Trin di Fèsto e Manifestacioun Prouvençalo.
Nòsti dòu
Marcèu Petit - Jan-Lu Malacarne - Jan Markale - Emilo Bonnel.
Li Gènt d’eici
Descuberto de Tarascoun.
L'edicioun De Mirèio pèr lou Creddo.
Au cor de la bouvino e la bouvino au cor.
Tablèu d’Ounour 2008
Encicloupedìo dóu Var..
Espacejado dóu barrulaire à velò.
Lou sautadou de Droumo.
Lou tarot de Marsiho.
Novo de la man dóu reiaume dóu Rose.
Li loup pèr Jan-Marc Moriceau
Darnié resson de Calèndo
Lemouzy
Conte
Nouvè en Alsaço
Li Pastouralo Prouvençalo.
Trèvo de la niue e Èsse imaginàri.
Armana de Lousèro.
Semanié 2009.
Andriéu Degioanni
Soun dos revisto, dins aquéu darnié trimestre de 2008, de rèndre óumage à l’escrivan varés de lengo prouvençalo, Andriéu Degioanni, defunta lou 4 de nouvèmbre de 2005, e de publica lis ate dóu coulòqui que ié fuguè counsacra en Arle, i’a un an d’acò, lou 13 de janvié de 2008.
La revisto de l’AVEP (Assouciacioun Vareso pèr l’Ensignamen dóu Prouvençau) douno, en prouvençau, li countribucioun de Jan-Lu Domenge, Jan- Miquéu Turc, Reinié e Enri Moucadel e Glaude Mauron. La revisto d’estùdi d’Oc, La France Latine, douno, elo, li mémi tèste en francés, aleva lou de Jan-Miquéu Turc, qu’a pas publica, mai emé li citacioun en prouvençau e un apoundoun de doucumen suplementàri. Rougié Gensollen, d’un coustat, e Glaude Mauron, de l’autre, baion d’elemen biougrafi de l’escrivan.
Fau ramenta que l’obro literàri d’Andriéu Degioanni es drudo, de proso subre-tout. Fuguè guierdounado dóu Grand Pres Literàri de Prouvènço (1992) e, à titre poustume, en 2007, dóu Pres Mistral. Pamens, se l’escrivan es vuei pas proun couneigu, es que soun obro, lou fau dire, rèsto enca trop counfidencialo. Dins uno tiero de 31 tèste, escri entre 1969 e 2005, 15 soun toujour inedit, e 9 soun esta publica gramaci la voulounta de l’AVEP, dins sa revisto, mai que toco un publi restren.
Soulet an pouscu èstre publica «nourmalamen»: L’an pebre (edicioun La Poterne,1985), L’Angrimoueno (edicioun de l’Astrado Prouvençalo, 1994), Lou Tourteiròu (edita pèr l’AVEP en 2003). La grando saga Lou Bouan Limerò (uno centeno d’eisemplàri, en 1976), A la bello estello (1987), Lou Tò (1988) soun esta edita d’un biais mai limita.
Nascu à Cabasso en 1930, dins uno famiho de pastre e de pacan, Andriéu Degioanni gaubejo un prouvençau varés di chanu, d’un interès lenguisti vertadié. De soun mestié, travaiè à Brignolo, dins la soucieta di baussito. Soun obro viro à l’entour di gènt de soun païs de Brignolo, lou couar prouvençau, coume disié.
Descubert en 1975 e soustengu pèr lou grand pouèto Mas-Felipe Delavouët, Andriéu Degioanni, escrivan prouvençau maje de noste tèms, a panca ’gu la recouneissènço que s’amerito. Es adounc de descurbi - l’AVEP e La France Latine vous i’ajudaran - en esperant uno publicacioun mai larjo de sis obro.
