Vaqui l’an nouvèu, amigo e ami que legissès Li Nouvello. Nasquè dins un countèste que coungreiavo pas l’óutimisme, emé la criso ecounoumico e la guerro en Palestino óucupado.

Aurés remarca, segur, que nòsti proublèmo soun pèr aro dins lis escoundudo. Se devié descouti un proujèt de lèi, à la fin de 2008, pèr revèire l’estatut e l’stamen di lengo regiounalo e minouritàri de Franço.

- Ano, ma sorre Ano, veses rèn veni?...

- E noun ma bello vese rèn veni! Èro pas aièr, s’es pas vuei, sara belèu deman...

Alor, de que faire? Vous l’avèn deja di e redi : fau recampa lou mounde nostre dins si vilage e si quartié, empura lou besoun qu’an li gènt d’agué de racino e sousteni, se lou poudèn, tóuti lis iniciativo que se fan jour pèr la recounquisto culturalo e lenguistico de l’identita prouvençalo.

L’afaire, dirés, es pas eisa.

N’en sian perfetamen counsciènt nàutri que mantenèn à bout de bras uno revisto que perd de longo de legèire parti i Camp d’Alis e que n’en gagno mau-grat tout, e toujour, de nouvèu que vènon tapa li trau dins li rèng. Es coume la tapissarié de Penelopo : se desfai e se refai!

Fin finalo, es la coumunauta prouvençalo que fau, de mai en mai, rassembla, en ié prepausant d’acioun, d’espetacle, de lucho, d’idèio nouvello.

Proumié : Prouvènço a d’èstre representado, dins chasco vilo, chasque vilage, pèr au mens uno assouciacioun culturalo prouvençalo.

Segound : lis assouciacioun pièi dèvon, d’un biais o d’un autre, promòure lis artisto qu’avèn, encouraja li creacioun, favourisa l’espelido de nouvèu group de musicaire, cantaire e troupo de tiatre prouvençau, e pas agué pòu de demanda d’ajudo i couleitiveta terradourenco (coumuno, counsèu generau, counsèu regiounau etc).

Tresen : lis assouciacioun e si sòci dèvon faire siéu li nouvèu mejan de coumunicacioun, doumaine ounte lou publi prouvençau es encaro trop en retard emai lou trafé di mèl mostre bèn que lou mouvamen s’embandis.

Quatren : avèn tóuti, enfin, de privilegia l’emplé de la Lengo Prouvençalo dins lou mounde de vuei. Es uno lengo que pòu espremi tóuti lis idèio, tóuti li proublèmo, en lou fasènt à soun biais e emé soun èime. Se de-cop, avès pas li mot (li nouvèu que faudrié soun pas toujour dins li diciounàri), basto! de lis enventa à parti di racino latino e de lis emplega dins lou parla e lis escri.

Vesès qu’en intrant dins l’annado 2009 avèn un pau chifra sus l’aveni. Fau countunia tout ço que fasèn e s’encagna. Se regardan un pau lou camin fa despièi vint à trento an, avès-ti pas nouta coume soun bèn presènt, li Prouvençau, dins l’edicioun prouvençalo, li disque, la creacioun artistico? N’en faudrié mai. Adounc, emé li cous de prouvençau, es un publi nouvèu de counsumaire de nòsti prouducioun que fau faire greia.

Que 2009 siegue un brave ome, pèr vous, vosto famiho e pèr Prouvènço, sa Lengo e sa Gèsto.