Arqueoulougìo en Vaucluso

Lou numerò 63 di Carnets du Ventoux es counsacra, aquesto fes, à 25 an d’arqueoulougìo en Vaucluso. Rènd comte dóu travai dóu Group Arqueoulougi de Carpentas beileja pèr Glaude Ayme. Fau nouta qu’eici li trobo mancon pas e que, chasque cop que se cavo uno trencado dins uno de nòsti ciéuta, i’a de descuberto d’espera. Ansin, d’à cha pau, es un patrimòni tras que riche qu’aparèis. Pièi, emé la rigour di cavage e li datacioun preciso, es tambèn poussible de torse lou còu en d’idèio fausso. Ansin n’en vai di bàrri de Venasco, couneigu generalamen dins la memòri poupulàri legendàri coume estènt de tourre sarrasino e, qu’en realita, soun lou testimòni de fourtificacioun qu’eisistavon tre lou siècle 4en, coume lou mostron de gerlo antico, que ié caupon li soubro d’enfant mort bèn jouine, de tros de tegulae, lou souveni de Lucernus, un evesque dóu siècle 5en... Li Carnets, en demai, fan plaço dins aqueste numerò à la lengo nostro, em’ uno countribucioun di counsequènto, en prouvençau, de Vierginìo Bigonnet-Balet, proufessour de prouvençau dins li coulège de Perno, Mazan e Mountèu, e qu’a pèr titre 80 escoulan de la Coumtat à la Fèsto dóu Patrimòni de Perno. 80 escoulan galoi, sourrisènt, dins si vièsti coumtadin acoulouri!