ensignadou




Diciounàri dis autour de Lengo d’O.

Ensignadou.

Prouvèrbi de la primo que flouris.

Es la soulucioun?

Editouriau :

Lou tèms dis anniversàri.

Estage de Lengo e de Culturo Prouvençalo.

L’Evenimen :

Lou numerò 150 vèn d’espeli.

L’Annado «Mirèio».

Souscripcioun : Sus li piado de Mirèio

. Trin di Fèsto e Manifestacioun Prouvençalo.

Councours 17en di Jouine de Prouvènço.

Camin crousa.

Troubadour de vuei.
Jan-Bernat Plantevin
Frederi Vouland
Gui Bonnet.

«Lou Tèms dóu Coustume

Armand Meffre - Enri Charmasson.

Li Gènt d’eici.
Dounzero
Lou patrimòni de Caumount
Jùli Coupier
Memòri de Caroun
la Ditado de Parlaren Bedarrido
Li courduriero de Parlaren Païs

Li papo en Avignoun.

10en Coungrès de Parlaren en Vaucluso.

Lou bon rèi Reinié.

Li blasoun dóu rèi Reinié.

Lou pont rouman de Nioun.

Espacejado dóu barrulaire à velò.

Velò d'oustau.

La cigalo e la fournigo

La chifro 4

Antoulougìo dis autour coumtadin (I).

Journado dóu libre de Sablet

Tradicioun.

Un belèn sènso termino

Quàuqui remèdi de la medicino poupulàri prouvençalo

Au cor de la bouvino

Lou Cleiroun.

Dins lis Aupiho de Sant-Roumié.

Noum d’oustau de Vaucluso.

Arqueoulougìo en Vaucluso.






Lou bon rèi Reinié
comte de Prouvènço e de Fourcauquié

A-z-Ais, à Tarascoun, en Angié, festejaran aquest an li 600 an de Reinié d’Anjou, lou bon rèi Reinié. Anjou e Prouvènço se partejon d’efèt sa legèndo, mai s’èi toujour presènt vuei dins li memòri, quau saup veraiamen quau fuguè e la vido pleno e boulegadisso que fuguè siéuno?

Li racino

illustration

Reinié d’Anjou nasquè lou 14 de janvié de 1409 dins lou castèu d’Angié, fiéu segound de Louïs II, du d’Anjou, rèi de Naplo e de Sicilo, rèi de Jerusalèn e comte de Prouvènço, e de Vióulando d’Aragoun.

Pèr li mascle, Reiniéèro un Capecian. Avié pèr aujòu direit tóuti li rèi de Franço, d’Ugue Capet à Felipe III l’Ardit, pièi, pèr la branco di Valois, li rèi Felipe VI e Jan II lou Bon, soun rèire-grand, que d’éu espeliguè la branco cadeto dóu segound oustau d’Anjou.

Dins si rèire, Reinié avié lou rèi Louïs IX, pèr lou jo dis alianço, Margarido e Beatris, dos di chato dóu darnié comte catalan de Prouvènço Ramoun-Berenguié V, Blanco de Castiho, Alienor d’Aquitàni e, pèr elo, li proumié Plantagenet, rèi d’Anglo-Terro.

Soun grand, Louis Ier d’Anjou, fiéu de Jan II lou Bon, èro esta adóuta pèr la rèino Jano de Naplo, coumtesso de Prouvènço, eissido dóu proumier oustau d’Anjou, que i’avié douna soun eiretage.

Soun paire, Louïs II, nascu à Toulouso en 1377, èro esta courouna en Avignoun, à Nosto-Damo de Dom, lou 2 de nouvèmbre de 1389, en presènci dóu rèi de Franço Carle VI, soun pichot cousin, felen de Jan II lou Bon. S’èro amouiera en Arle, lou 2 de desèmbre de 1400, emé Vióulando d’Aragoun, chato unico dóu rèi Jan 1ié d’Aragoun marida, éu, à Vióulando de Bar.

Reinié avié dounc, pèr sa maire, de sang aragounés e lou rèi Jan èro soun grand.

Lou coumpan dóu futur Carle VII

Lou 18 de desèmbre de 1413, Reinié, pichot enfant, assistè à Paris, au Louvre, i fianço de sa sorre Marìo (10 an) emé lou dóufin e futur rèi de Franço Carle VII (9 an). Tóuti tres revenguèron pièi en Anjou, mounte fuguèron abali ensèn. N’en neissira entre Reinié e Carle uno amista di soulido que durara touto sa vido e marcara sa destinado. Reinié, tout de long dóu reinage de Carle, sara di persounage impourtant de la court de Franço. Erian, d’aqueste tèms, dins la guerro de cènt an, Franço e Anjou afrountavon Anglo-Terro e Bourgougno, uno autro branco eissido de Jan II lou Bon.

Mau-grat sa genealougìo, Reinié, estènt cadet, èro un prince na sènso terro ni titre. Avans que de mouri, en Angié, lou 29 d’abriéu de 1417, soun paire lou faguè, à 8 an, comte de Guise, mai leissè à soun einat, Louïs III (13 an), tóuti si titre e doumaine.

Bar e Lourreno

La maire de Reinié, Vióulando d’Aragoun, cargado desenant dóu gouvèr di terro de soun ome defunta, èro forço estacado à l’Oustau de Franço. Chifrè de plaça un pioun, soun cadet, vers Lourreno e lou ducat de Bar, alia di Bourguignoun, adounc dis Anglés. Se capitavo que lou du de Bar, lou cardinau Louïs de Bar, èro lou fraire de la maire de Reinié. De soun estat, aqueste èro sènso eiretié. Acetè d’adóuta Reinié coume soun fiéu e de lou fourma pèr ié sucedi.

Arrenjè meme soun maridage em’ Eisabello, la chato de Carle II, du de Lourreno. Aqueste se faguè à Nanci, lou 14 d’óutobre de 1420. Li dous enfant avien tout just 11 e 10 an. Aquesto alianço entre oustau enemi pòu sembla curiouso, mai esperavon ansin d’apasima li divisioun qu’eisistavon en Lourreno e dins lou Païs de Bar. E l’Oustau de Lourreno esperavo belèu de desavia Reinié vers sa causo.

Es dins aquesto idèio que fuguè abali à la court de Nanci. Desmancipa à l’age de 15 an (1424) e mes en poussessioun de si terro, aguè de mau de s’impausa. Perdeguè en 1424 soun coumtat de Guise, pres pèr d’alia dis Anglés. Soun bèu-paire, éu, passavo soun tèms de lou coumproumetre en ié fasènt signa o signant éu-meme en soun noum d’ate óuficiau favourable is anglò-bourguignoun. En mai d’acò, aura de lucha contro lou nebout dóu du de Lourreno, Antòni, comte de Vaudemount, que se counsideravo l’eiretié naturau de soun ouncle. Reinié faguè lou sèti de soun fièu, Vezeliso, 3 an de tèms.

Dins li piado de Jano d’Arc

illustration

Mau-grat tout, Reinié istè fidèu à soun ami, lou futur Carle VII. Es pièi un de si sujèt, Jano d’Arc, que ié permetra de prendre uno plaço di requisto à la court de Franço. Reinié fuguè lou temouin, à Nanci, dóu rescontre, en abriéu de 1429, de Jano e dóu du de Lourreno. Mai aqueste noun acourdè à soun fihat d’acoumpagna la piéucello à Chinoun, souto escampo qu’avié besoun d’éu pèr faire la guerro à Metz. Prevengudo pèr soun fiéu, es Vióulando d’Aragoun qu’aculiguè Jano e respoundeguè d’elo davans lou futur Carle VII.

Ourleans fuguè deliéurado lou 8 de mai de 1429 e Carle VII sacra rèi de Franço à Reims, lou 17 de juliet, Reinié e si fraire Louïs e Carle, à soun coustat. Es de nouta que sa sorre Marìo, rèino de Franço, noun èro vengudo, que s’entendié plus ‘mé soun ome.

Reinié n’aproufichè éu pèr manda au rèi d’Angloterro uno desavouacioun fourmalo de tóuti lis ate qu’avié pouscu signa, buta pèr soun bèu-paire de Lourreno.

Seguiguè pièi la campagno de l’armado reialo enjusquo lou sèti de Paris, aqui mounte Jano fuguè plagado d’uno sageto à la cueisso. Es Reinié e lou comte de Clar-Mount que la raduguèron à la sousto. Lou sèti durant trop, partiguè pièi, de soun coustat, ‘mé de coumpan, coumbatre li Bourguignoun e deliéura la Champagno (desèmbre de 1429, avié 20 an). Bateguè encaro, à-n-Antoun, en Dóufinat, lou 11 de jun de 1430, lou prince d’Aurenjo.

Reinié presounié

Lou 23 de jun de 1430 defuntavo lou cardinau de Bar. Lou 14 de janvié de 1431, Carle II de Lourreno lou seguissié, Reinié venié mèstre soulet de Bar e de Lourreno, mai em’ un Antòni de Vaudemount que toujour refusavo de lou recounèisse. Chascun levè uno armado e fuguè la batèsto de Bulgnevilo, lou 2 de juliet de 1431. Pèr Reinié, fuguè la desbrando. Aguè 2.000 tua, éu-meme, plaga e desmesoula, deguè crida sebo. Presounié, fuguè fisa à Felipe, du de Bourgougno. Un assai d’evasioun faguè chi, fuguè alor engabioula au castèu de Dijoun, dins uno tourre, que prenguè lou noum de tourre de Bar.

Forço mounde assajèron de lou faire libera, de coumença pèr l’emperaire d’Alemagno Sigismound, qu’èro lou fiéu d’uno sorre de Louïs Iié d’Anjou, lou grand de Reinié. Felipe jamai cedè, enjusquo lou 1ié d’abriéu de 1432, qu’acourdè au presounié de sourti pèr uno annado, i coundicioun seguènto : $* Reinié devié tourna dins sa presoun au bout d’un an; $* dounavo en oustage si fiéu Jan (nascu à Toul en 1426) e Louïs (nascu vers 1430); *$ dounavo 4 castèu e uno rançoun de 20.000 salut d’or (mounedo dóu siècle 15en en Franço e Anglo-Terro) e 18 000 flourin; $* sa chato Vióulando (nascudo à Bar en 1427) èro proumesso en maridage à Fèrri de Lourreno- Vaudemount, lou fiéu d’Antòni.

En 1433, vendeguè pièi à Jan de Lissembourg soun coumtat de Guise, pèr 20.000 liéuro. Mau-grat tout, l’emperaire Sigismound, qu’èro lou segnour maje, lou counfiermè du de Lourreno (24 d’abriéu de 1434).

Prouvènço e Naplo

Lou 15 de nouvèmbre de 1434, defuntè lou fraire einat de Reinié, Louïs III d’Anjou. Avié pas d’enfant. Dins lou meme tèms, la rèino de Naplo, Jano II de Duras, pèr testamen, lou designavo soun eiretié. Reinié se capitè subran e tout au cop, du de Lourreno, du de Bar, du d’Anjou, rèi de Naplo e de Sicilo, rèi de Jerusalèn e comte de Prouvènço. Avié 25 an.

Trop urous d’agué un rèi en soun poudé, Felipe de Bourgougno ié ramentè, lou 25 de desèmbre de 1434 - bèu presènt - qu’avié de teni sa paraulo e que devié retrouva sa presoun à Dijoun, ço que faguè. Ié restara dous an de mai. Es aqui, dins sa gabiolo, que reçaupra li deputa napoulitan e prouvençau, estouna, vengu ié rèndre óumage.

Pèr ramplaça Reinié, sa femo, Eisabello de Lourreno fuguè noumado Liò-tenènt Generau lou 4 de jun de 1435 e subran partiguè pèr Prouvènço e Naplo, mounte deguè, coume pousquè, afrounta lou partit dis Aragounés, en esperant l’arrivado de soun ome que, fin finalo, fuguè libera lou 28 de janvié de 1437 contro : $- uno rançoun de 200.000 flourin d’or e dos segnourié; $- sa néutralita dins lou counflit francés / anglòbourguignoun; $- lou maridage de sa chato Vióulando emé Fèrri de Lourreno-Vaudemount; $- li fianço de soun fiéu Jan emé Marìo de Bourboun (10 an), neboudo de Felipe de Bourgougno.

Arriva à Naplo lou 9 de mai de 1438, Reinié rebutè li troupo d’Aragoun vers la Calabro e assajè pièi se manteni dins soun nouvèu reiaume. Mai mancant de sòu, sis alia, d’à cha pau l’abandounèron, e, en nouvèmbre de 1441, Anfos d’Aragoun pousquè metre lou sèti davans Naplo. La vilo toumbè lou 3 de jun de 1442, Reinié deguè fugi, soun reiaume perdu, gardara plus que lou titre de rèi de Naplo e de Sicilo. Pèr amenistra li terro que ié soubravon, Anjou, Prouvènço, Bar e Lourreno, mounte Antòni de Vaudemount fasié toujour lou destrùssi, s’istalè en Angié. Aquesto annado 1442 (a 33 an), fuguè ‘nca entristesido de la mort de sa maire, Vióulando d’Aragoun, lou 14 de nouvèmbre, e la de soun fiéu Louïs, à l’age de 12 an.

Li sànti Marìo de la Mar

illustration

La pountannado seguènto sara mai siavo. D’abord, sa chato Margarido, maridado au rèi Enri VI, es courounado à 15 an, rèino d’Anglo-Terro, lou 30 de mai de 1445. Lou maridage èro esta celebra à Nanci, en meme tèms que lou de sa sorre Vióulando emé Fèrri de Lourreno-Vaudemount. Reinié voulié pas de Fèrri, mai, pèr un cop, li dous jouine èron vertadieramen amourous, e deguè se resouna. Lou regretara pas. La pas revenguè en Lourreno e Fèrri sara pèr soun bèu-paire un alia precious. Reinié tambèn, ista proche la court de Franço, ajudè, noutamen Carle VII reourganisa l’armado.

En febrié de 1447, partié pèr sis estat de Prouvènço, mounte passara mai de dos annado. Restè dins soun palais de-z-Ais, au castèu de Tarascoun, dins sa bastido de Pertus, dins soun oustau de Marsiho.

En mai de 1447, reçaupeguè la vesito de soun nebout, lou dóufin, lou futur Louïs XI, lou fiéu de sa sorre Marìo e dóu rèi Carle VII. Louïs deja coumploutavo e cerquè, mai de-bado, d’amiga soun ouncle emé Bourgougno e Savoìo contro soun paire. Es éu tambèn, qu’en passant à-z-Ais, entendeguè li doumenican parla di soubro di sànti Marìo, à Nosto-Damo de la Mar, e que butè soun ouncle de faire de recerco. Reinié seguira, e sabèn ço qu’arrivara : la descuberto di celèbri relicle à la fin de l’an 1448. Aquesto urouso pountannado sara marcado tambèn pèr l’art, la literaturo, li plesi e li jo. Es lou grand tourné de Tarascoun en jun de 1449 e, au mes d’avoust, la creacioun de l’ordre religious e militàri dóu «Croissant» (que sara supremi pèr lou papo en 1461).

En poulitico, ajudè metre fin, en 1449, au famous councile de Bale, qu’èro favourable à Amadiéu VIII de Savoio, que voulié èstre papo en plaço dóu papo (Micoulau V).

D’aventuro encaro e de malur

En óutobre de 1449 (a 40 an), Reinié retrobo Carle VII e l’armado franceso pèr tourna mai faire la guerro is Anglés. Participo à la preso de Rouen (11/11/1449) e la de Caen (15/07/1450), ‘mé la liberacioun de la Nourmandìo.

Fai pièi un retour en Prouvènço, mounte i’a la pèsto, mai dèu remounta en Anjou, que sa femo Eisabello malautejo e defuntara, lou 28 de febrié de 1453. Fuguè pèr Reinié uno grand doulour, tant èron proche li dous espous, meme s’éu noun èro fuguè pas toujour fidèu. Lou rèi avié noutamen uno chato naturalo, Blanco de Beauvau, nascudo vers 1436, que fuguè abalido à Bèu-Caire.

Se counsoulara pièi en s’amouierant tourna-mai, lou 9 de setèmbre de 1455, en Angié, emé Jano de Laval, 22 an. Éu n’avié 46. Es lou cardinau-legat d’Avignoun, Pèire de Fouis, que li maridè. Reinié faguè douno à Jano de la barounié di Baus. Mai, em’ acò, óublidavo pas nimai si dre sus Naplo. Veguè uno óupourtuneta, en 1453, dins la guerro que se fasien Milan e Flourènço contro Veniso, Savoio et lou Naplo d’Anfos d’Aragoun. Reinié s’assouciè à Milan e Flourènço, ajuda de Carle VII, mai lis alianço se desfaguèron, li republico s’amiguèron tourna-mai e noste rèi, soulet davans Naplo, abandounè.

Un autre espèr nasquè en 1458, à la mort d’Anfos d’Aragoun. Reinié reclamè soun reiaume au papo, mai de-bado. Assajè alor la forço. En juliet de 1461, soun fiéu Jan bateguè la floto napoulitano, mai éu sachè pas prendre li decisioun que falié e perdeguè la partido. Maucoura, rintrè au siéu en avoust de 1461. Jan abandounara definitivamen l’assai de recounquisto de Naplo en 1463.

A soun retour, Reinié aprenguè la mort dóu rèi Carle VII, lou 22 de juliet de 1461. Èro desenant lou reinage de Louïs XI e li dous ome s’amavon gaire.

Lou pes de Louïs XI

Mau-grat tout, Reinié chanjo pas. Rèsto fidèu à l’Oustau de Franço. Acò, dins un proumié tèms, apasimo li causo, mai li relacioun, dins un tèms segound, vendran mai dificilo.

En 1468, li Catalan vènon cerca Reinié pèr ié pourgi lou trone de soun païs. I’a dre, sèmblo, pèr sa maire Vióulando d’Aragoun. Reinié dis de vo e fiso à soun fiéu Jan l’espedicioun contro l’autre pretendènt, Jan de Pourtugau. Jan s’istalo à Girona en 1470, mai ié mor en juliet d’uno malautié soudo, belèu empouisouna. Soun fiéu Micoulau pren la seguido, mai a l’èime lourren, Catalougno l’interèsso pas e la perd tre 1471.

Aquesto annado 1471 es marrido encaro. Reinié vèi mouri Blanco, sa chato naturalo, e soun fihat, Fèrri de Lourreno-Vaudemount. Sa chato Margarido, rèino d’Anglo-Terro, es presouniero à Loundro. Soun ome, Enri VI, vengu fòu, e soun darnié fiéu soun esta escoutela, vitimo de la guerro di dos roso. Sara deliéurado contro rançoun pagado pèr soun paire e Louïs XI e se retirara en Anjou.

Louïs XI es ambicious, vòu Prouvènço. Reinié es alassa. Fai soun testamen, lou 14 de juliet de 1471, noumant soun felen Micoulau eiretié universau. A Louïs, acò i’agrado pas. L’Anjou es terro estacado à la courouno de Franço, Louïs peso sus elo e soun ouncle Reinié e meme ié planto caviho. Aqueste, que vòu pas empura de garrouio, chausis de parti pèr Prouvènço, terro independènto, mounte sara mai tranquile. Aguènt manda vers Tarascoun sa biblioutèco, soun orfebrarié e si tapissarié, quito Angié lou 27 d’óutobre de 1471, ié revendra plus vivènt.

Prouvènço pèr acaba

illustration

En Prouvènço, istala à-z-Ais, Reinié e sa femo, Jano de Laval, retrobon mai de serenita. Pòu s’aduna à si passioun d’umanisto, aprouficha de si doumaine de Gardano e Mirabèu, de soun oustau de Marsiho. Sa bastido de Gardano, l’a croumpado, mai l’a jamai pagado. La legèndo dis qu’uno de si chato, que se sarié dicho Ano, ié sarié ensepelido e qu’à l’encauso d’acò, l’endré aurié pres lounoum de Gardo-Ano. Mai acò ’s qu’uno legèndo.

Amavo tambèn, Reinié, d’ana cassa vers Sant- Roumié. En 1476, croumpè un oustau en Avignoun, vuei au 6 de la carriero Grivolas, gaire liuen de la Carriero dóu… rèi Reinié.

Aqueste amavo tambèn li fèsto, à Tarascoun, à-z- Ais. Aqui, li Jo de la Fèsto-Diéu, adouba pèr Reinié éu-meme, coumencèron en 1475 (n’avié acaba la messo en sceno tre 1462). Duraran enjusquo la Revoulucioun.

L’eiretage dóu rèi Reinié

Mai de soucit, n’avié toujour. Soun eiretié, soun felen Micoulau, èro mort empouisouna, à 25 an, en 1473, e s’èro éu ansin retrouva, tourna-mai, mèstre de Bar e de Lourreno. Adounc, faguè en 1474 un segound testamen que, respetant l’ate de sucessioun de soun fraire einat Louïs III d’Anjou (1440), baiavo Anjou e Prouvènço à soun nebout Carle III, lou fiéu de soun autre fraire Carle.

Reinié s’enganavo pas, sabié Carle III feble e jouguet de Louïs XI, e que, fin finalo, estènt sènso enfant e de santa marrido, Prouvènço toumbarié dins lou reiaume de Franço. Mai pèr éu, qu’èro ista toujour fidèu à l’Oustau de Franço, èro acò uno fin lougico.

A soun autre felen, Reinié II de Lourreno, lou fiéu de Fèrri e Vióulando, dounè Bar e Lourreno.

Mai pèr l’ouro, coume s’entendien pas, Louïs XI aguè rèn. Lou prenguè mau, encaro un cop. Acusè Reinié de vougué s’alia ‘mé la Bourgougno, e lou faguè coundana pèr soun Parlamen, pèr crime d’auto trahisoun (06/04/1476). Acò rendeguè lou mounde mai resounable. Au mes de jun seguènt, un acord, signa à Lioun, rendeguè l’Anjou à Reinié, souto coundicioun, à sa mort, de reveni à Louïs XI. Prouvènço èro counfiermado à Carle III. Mai «l’aragno» (Louïs XI) tenié Carle, ié soubravo plus que de s’amiga Palamedo de Fourbin, senescau de Prouvènço, pèr alesti lou terren, e d’espera lou fru madur.

La mort dóu rèi Reinié

Reinié mouriguè à-z-Ais lou 10 de juliet de 1480. Prouvençau e Anjouvin, tant èro ama, se disputèron soun cors. Reinié avié chausi Angié pèr sa som darniero, i coustat d’Eisabello. Mau-grat lis empache di Prouvençau, Jano de Laval faguè eisecuta sa voulounta, mai ié fauguè lou faire discretamen. Es escoundu demié lis efèt de sa gardo-raubo qu’en mars de 1481 l’atahut de Reinié s’endraiè pèr Angié. La seguido la couneissèn, Carle III defuntè lou 11 de desèmbre de 1481 e un principau s’estaquè à-n-un autre principau...

Darnié féudau e precursour de la Reneissènço

Reinié d’Anjou èro un prince féudau, de la fin de l’Age-Mejan. Respetavo li liame de vassalita e de segnourage, li règlo de la chivalarié e se bateguè pèr garda o gagna de doumaine. Ero pas nimai toujour bon. Se dis que faguè estrangla un bouchié de Tarascoun que pagavo pas sis impost. Mai Reinié èro au jougnènt de dous mounde. Anounciavo la Reneissènço. Emé sa passioun pèr lis art (pinturo, musico), la literaturo e touto meno de sciènci (teoulougìo, dre, astrounoumìo, matematico, medecino, geougrafìo, agriculturo), se pòu regarda coume un umanisto.

Es dins sa jouinesso, à la court de Nanci, que descurbiguè art e literaturo, emé Carle II de Lourreno. Se dis qu’aguè de cous de dessin e de pinturo di fraire Van Dyck. Reinié pintè touto sa vido. Fasié noutamen de miniaturo de trìo, mai coumandè tambèn en de pintre coume Micoulau Froment (Lou bouissoun ardènt, à la catedralo de-z-Ais; pinturo de l’oustau d’Avignoun). Reinié peréu escrivié en proso e vers e enluminavo sis escri. Escrivié en francés, mai lou faguè, de-cop, en italian e prouvençau.

La legèndo l’a englouria, mai Reinié fuguè dins lou verai un prince pulèu mediocre. Ero d’èime trop feble e dous (à respèt de soun epoco) e avié gaire l’engèni pouliti e militàri. Èro toujour en bousco de sòu, que despensavo forço, e avié lou gàubi pèr se crea de revengut, meme emé d’impost gaire legau. Mai fau reteni que s’es esta qualifica de bon e se sa legèndo s’es bastido, es qu’avié lou soucit de soun pople, qu’amavo d’èstre proche d’éu, coume à Marsiho, quand charravo sus lou quèi ‘mé li pescadou, de i’óufri fèsto e tourné.

Favourisè l’ensignamen publi e lis universita de-z- Ais e d’Angié e, ‘mé la pas, lou redreissamen ecounoumi de Prouvènço. Signè de counvencioun e tratat de negòci, ajudè l’agriculturo (dounavo eisèmple dins si doumaine, coume à Gardano), l’elevage, l’endustrìo (veirarié de Gòut, fabrico de drap, sabounarié).

Ansin fuguè Reinié d’Anjou, emé si deco e si qualita, un prince que marquè soun epoco e la visquè plenamen, tant que sièis siècle après es toujour bèn vivènt dins la memòri couleitivo. Vertadieramen Prouvènço beneficiè de soun passage e, mai que la rèino Jano, s’amerito aquelo poupularita

signdecham

deco de bas de page

1122045