L'Armana Prouvençau

Se fai espera, chasque an, e pamens arrivo! Vole parla de L’Armana Prouvençau que parèis, chasque an, despièi 1855, adouba de la man di felibre. Es esta presenta à Maiano, au mes de Mars. Soun edicioun 2009 es pleno coume un iòu de pouèmo e raconte dins li diferènt parla dóu Païs Prouvençau.

Jan-Pèire Tennevin nous mèno sus li piado d’un esquiròulet, bèstio fèro, menaçado pèr la poulucioun de l’aigo que béu e li cassaire.

Reinié Moucadèu nous pourgis dous pouèmo, à soun biais : L’espigoun a peta... e Lis animau estravia .

Jan-Michèu Jausseran nous assabènto d’uno obro essencialo retrouvado e que sara dins gaire publicado. S’agis dóu Dictionnaire comique et pittoresque de la langue provençale. Soun autour? Camihe Moirenc (1827-1892), nascu en Païs d’Ate, à Rustrèu, qu’un ditoun dis de Rustrèu, lou diable n’a fa quatre moussèu. Fuguè sòci de l’Acadèmi de Vaucluso, en Avignoun. À l’armado, coume couscri, participè à la counquisto de l’Argerìo. Passè pièi touto sa vido en Ate e escriguè forço estùdi istouri. Pièi, e subre-tout pèr nautre, a nouta dins un libre-cartabèu de comte de 400 pajo, d’uno escrituro coume se n’en vèi plus, li prouvèrbi prouvençau, acoumpagna di citacioun de 130 autour! Soun ourtougràfi, segur, es pre-mistralenco, mai porto testimòni de l’estamen de la lengo, au siècle 19en, en Païs d’Ate.

Fau cita encaro li countribucioun goustouso de Pèire Pessemesse, Camihe Goiran, Pèire Pascal, Miquèu Benedetto, Reinié Limouzin, Jan Abello etc.

Disèn pas À l’an que vèn, mai À desèmbre que vèn! pèr la tinado 2010.