Cévennes Magazine

La galanto revisto semaniero Cévennes Magazine vèn de publica soun numerò...1500! Es pas de dire mai, despièi la primo de 1973, li Raiòu (e li Raiouleto...) podon se coungousta d’uno publicacioun counsacrado à l’istòri loucalo, à si tradicioun, à si manifestacioun.

Cévennes Magazine fuguè crea pèr lou regreta Lucian André que, d’annado de tèms, editè L’almanach cévenol - Encyclopédie des Cévennes. Vuei es anima pèr touto uno colo beilejado pèr Michèu Vincent e si gènti coulabouratriço.

Lou n°1500 nous pourge, noutamen, la seguido de l’obro d’Andriéu Bernardy, Les sobriquets collectifs, tèste en francés, mai escais-noum en lengo raiolo. Pièi, uno istòri dóu castèu de Fan, à Lussan, en Lussanenco, pichot païs entre Usés e Alès, pèr Roubert Chastanier, sòci de l’Acadèmi de Nime. Aqueste castèu fuguè, à passa tèms, la demoro dei gènt d’Andriéu Gide que ié passè sa jouinesso. Nous assabènto, encaro, de l’espelido d’un libre de Marineto Mazoyer, clafi de remèmbre sus l’Alès-Vièi, e qu’a pèr titre : Subre lo pont de Rochàbelà (grafìo óucitano).

Cévennes Magazine publico, tambèn, dins la seguido de si numerò, li Minutes toponymiques dOc forço saberudo de Laurèns Aiglon, qu’espepidounon li toupounime cevenòu que vènon de la lengo nostro.

Es un semanié que fai gau de reçaupre bord que mantèn em’ encagnamen e courage l’èime dóu Païs Raiòu. Es un ounour, èr iéu, de ié manda, tèms en tèms, d’article. Osco e longo mai!