Uno manifaturo laniero en Prouvènço

Magui Gross vous a presenta, dins soun article, la Manifaturo laniero Brun de Vian-Tiran, de l’Ilo de Venisso, en Vaucluso, e tout lou travai que se ié fai. A counta en particulié la recerco e la retroubado de la lano fino dóu Merinos d’Arle Antique. Pèr l’escasènço de soun segound centenàri (1808-2008), Pèire Brun, que beilejo l’entre-presso, a fa parèisse is Edicioun Equinoxe, un libre tras que poulit, que conto, segur, l’istòri di 8 generacioun que l’an bastido, mai pas soulamen.

Ié retrouven tambèn l’istòri de la lano, à travès di siècle, subre-tout li dous darnié, e de soun countèste vauclusen.

La lano i’es presènto dempièi de milié d’annado, quand vèi arriva la sedo, emé li papo d’Avignoun. Es elo que butara à l’endustrialisacioun e, quand coumençara de cabussa, au siècle 19en, dounara vanc à l’endustrìo laniero. A la debuto dóu seguènt, li manifaturo de lano fan flòri. An besoun d’aigo, de terro de paraire, de cardoun. Vesèn pièi l’evoulun teini, la duberturo sus lou mounde de l’en-deforo, que pèr li Brun coumencè pèr la Fiero de Bèu-Caire, l’evoulun di fabricacioun, que dintre éli fau cita lou tapis d’Avignoun.

La lano, de Prouvènço, o d’aiours, lou péu animau soun bèn segur la baso dóu travai de la manifaturo de l’Ilo de Venisso, mai, a pouscu o degu, de fes que i’a, utilisa de causo un pau curiouso, coume de fibro de genèsto, avans la darniero guerro, o de péu de caniche, que fan uno meno de lano, pèr faire de linçòu, quand la Franço mancavo de tout. En 1960, es l’arrivado dóu mouër. An segui lou péu de camèu, lou cachemire, l’alpaca (1970), lou cashgora, eissi dóu crousamen de cabro cachemire e angora (annado 1980), lou iac, e, dins la recerco de-countùnio di péu li mai fin, lou lama. Acò a permés la diversita, la qualita, la nouvéuta, de couleicioun richo de proudu. L’entre-presso ansin a sachu s’asata, evouluna emé la demando e li teinico, prepausa, adounc se manteni.

Pèire Brun nous presènto pièi li mestié, lou de fabricant, lou de coumerçant, si souveni, lis istòri di machino, la dimensioun culturalo de l’endustrìo laniero. Es vertadieramen un vouiage passiounant, un vouiage de descuberto que nous prepauso à travès di pajo d’aqueste libre, poulidamen presenta e ilustra, que fara un bèu presènt, se n’avès à faire.