Camin de lengo

Dempièi lou 21 de juliet de 2008, lou sabès, la Coustitucioun de Franço recounèis que li lengo regiounalo apartènon au patrimòni dóu païs. Aquelo vesioun, aro, es adounc óuficialo. Soun ensignamen, deja regi pèr de tèste de l’Educacioun Naciounalo, dèu, desenant, segui li direitivo dóu Cadre Européen Commun de référence des langues (CERCL), que definisson lis óujetiéu d’aprendissage. Em’acò, s’esperavo dempièi proun tèms lou prougramo, pèr lou coulège, di lengo regiounalo. Enfin a pareigu au Bulletin Ouficiau de l’Educacioun Naciounalo dóu 4 d’óutobre de 2007 (foro serìo, n°10). Lou CERCL definis pièi li nivèu que soun de touca dins l’aprendissage di lengo. S’agis de A1 (descuberto), A2 (usuau), B1 (independènt), B2 (avança), C1 (autounoumìo) e C2 (mestrìo), entre l’escolo primàri e l’universita. Pèr li lengo regiounalo, à la fin dóu coulège, lis escoulan déuran touca lou nivèu A2 (B1 pèr la proumiero lengo vivènto). C1 es lou nivèu dóu bacheleirat.

Partènt d’acò, l’assouciacioun Lou Prouvençau à l’Escolo a fa parèisse souto lou titre Camin de lengo, un libret d’aprendissage dóu prouvençau mouderne (es de dire literàri mistralen), en grafìo mistralenco, nivèu A1–A2.

Es un libret, bèn segur, de descuberto e d’iniciacioun à la lengo, mai que n’aprouficho tambèn pèr entroudurre d’elemen de culturo e de civilisacioun prouvençalo. I’atrouven ansin :

• uno presentacioun de la lengo, dóu biais de prounouncia, de la grafìo;
• li chifro e li comte;
• l’escoulan dins la famiho (àvi, rèire);
• l’escoulan dins la vido vidanto : la rintrado di classo e la vido au coulège, de l’oustau à la vilo, li mestié, la mangiho, la cousino e lis especialita, lis esport, lou cors, li vèsti, la santa, li vacanço;
• la presentacioun dóu mitan naturau, un pau de geougrafìo e de meteò (li jour de la Vièio),
• quàuqui persounage celèbre (Mistral, Nostradamus, li pintre de la Prouvènço);
• l’èime prouvençau, à travès di jo (lotò, petanco), di fèsto (Carnava, Nouvè), di legèndo (la Tarasco), di prouvèrbi;
• un pau d’istòri (la pèsto de 1720).

Un mouloun d’eisercice (n’i’a 320) permeton d’avança d’à cha pau dins l’aprendissage, apiela, quand fau, de dessin o de tèste d’autour prouvençau de vuei e d’aièr, e tambèn de quàuqui cansoun. La gramatico es entrouducho plan, discretamen, pèr noun rebuta l’aprendis.

Un disque sarra acoumpagno lou tout, que ié caupon de tèste di pèr un fube de mounde que couneissèn bèn, mai trop noumbrous pèr li cita tóuti , e tambèn d’enfant. 4 cansoun soun cantado pèr li Tard-Quand-Dine.

Aquelo parucioun, ajudado pèr lou Counsèu Regiounau e lou Counsèu Generau di Bouco dóu Rose, fai ansin un bèl óutis pèr l’aprendissage de nosto lengo dins li coulège, e meme en foro.