Lou bouan limerò

L’AVEP (Assouciacien Vareso pèr l’Ensignamen dóu Prouvençau) rènd óumage, dins soun numerò 129 bis, à Andriéu Degioanni, en publicant lou tome proumié de soun obro autoubiougrafico : Lou bouan limerò. De qu’èi qu’un limerò? Es tout simplamen un numerò. Lou tiravon antan li couscri, s’èro bon partien pas à l’armado! Es la proumiero obro impourtanto qu’escriguè Degioanni. N’espandiguè, en 1975, quàuquis eisemplàri tira à la rouneò. L’avié dedicado En óumage à mei gènt : bastidié, pastre, lauraire, cavihaire d’amourié, que douarmon dins lou blanquié de Prouvènço, vo souto l’erbo di raro italiano. Es quàsi uno saga, la saga di Vincèn, d’aiours lou proumié chapitre s’entitoulo La tiero dei Vincèn - Un pin fa pas un cade. Remounto, ansin, à soun aujòu, nascu en 1734. Pièi, arrivo dóu tèms que lei Rouge e lei Blanc si partejavon lei coumuno e que falié passa lou counsèu de revisioun. Debano la vido di bastidié (ei pus fin li braio li toumbon) em’ aquest persounage, lou crestaire, que fasié besoun pèr adouba lis agnèu e li pourquet. E tout acò dins uno lengo drudo, soun bèu parla varés, riche d’un voucabulàri que te fai lingueto, tout pasta dóu travai de la terro e d’un tèms esvali. Es uno leituro que vous recoumande voulountié.