En Vaucluso, lou proumié conse dóu Tor, Jaque Olivier, qu’es tambèn counseié regiounau de Prouvènço, a pres li causo en man pèr aplanta, dins lou despartamen, l’entrouducioun e lou desvouloupamen di culturo de planto OGM (ourganisme geneticamen moudifica).

Segui pèr soun counsèu municipau, a plaça, à l’intrado de sa coumuno, de panèu verd ounte i’a de marca : Commune sans OGM.

Despièi la debuto d’abriéu, es 25 coumuno vauclusenco, belèu 27 o 28, que se soun apoundudo à-n-aquesto lucho, seguido pièi pèr lou Pargue Naturau Regiounau dóu Leberoun.

N’en vaqui la tiero (n’en manco quàuquis-uno que nous desencusaran de pas lis agué cita ) : Faucoun, Lou Rastèu, Crestet, Entrechaus, Ate, La Gardo d’Ate, Auribèu, Aurenjo, Buòus, Alten di Palun, Lou Tor, Lou Bausset, La Roco de Perno, Mus, Saut, Sant-Martin de Castihoun, Óupedo, Chivau-Blanc, Veisoun, Perno-li-Font, Carpentras, Cairano, Pue-Meiras.

Alor, Vaucluso Terro de Resistènci? Bèn segur. Eici lou mounde volon d’uno agriculturo de qualita, respetouso de la Naturo, dis equilibre naturau, de la biou-diversita e volon pas d’uno agriculturo endustrialo que councharié lou païs, ié fairié perdre soun èime, sa qualita de vido e sa bèuta.

Devèn nouta que lou Counsèu Generau de Vaucluso, de soun coustat, dins uno assemblado pleniero tengudo mié-abriéu, à Perno-li-Font, dins la Salo dis Agustin, a vouta uno moucioun presentado pèr Michèu Bayet, entitulado Pèr un Vaucluso sènso OGM.

L’eisèmple dóu Vaucluso coumenço d’èstre segui dins li Bouco de Rose e dins Gard.

Tout acò a autant d’atualita que, coume pourrés lou legi dins noste Evenimen, l’agriculturo à baso d’OGM necito, en mai d’engrais chimi, l’emplé de desbruiant (herbicides) chimi que tuion la vido dins li terro labourablo e tuion tambèn lis Ome (vèire ço que se passo en Argentino proche lis inmènsi plantacioun de soja), sènso óublida que d’ùnis espèci de planto, qualificado bèn à tort de marrido, podon s’asata e veni rouina lis espèr dis agricultour e dis aprendis-sourcié di multinaciounalo.

Alor? Refusa lis OGM sarié refusa lou prougrès? Lou cresèn pas. Refusa lis OGM es lucha pèr lou mantèn de la biou-diversita di planto e di bestiouleto, tout en refusant de passa souto la joto di semencié que volon countourroula, à soun proufié, la prouducioun internaciounalo de nourrituro!