Debuto de la
tempourado
de courso prouvençalo

Se li biòu soun bèn sourti despièi lou mes de mars, enjusqu’aro tóuti li courso soun Foro Troufèu!

L’ivèr estènt esta forço marrit pèr nòsti biòu, li manadié an demanda à la Federacioun que la sesoun debute pas avans lou mes de mai fin que pousquèsson se refaire uno santa. A uno grando majourita (31 vo e 8 noun sus 39) es esta decida de coumença lou champiounat de Franço lou 3 de mai. De soun coustat, la Coumissioun dóu Troufèu Taurin La Provence - Le Midi Libre a mantengu la debuto de si tres troufèu au 3 d’abriéu!

A l’ouro d’aro se saup pas coume acò s’acabara. Coume que siegue, tóuti li courso soun Foro Troufèu pèr la FFCC enjusqu’au 3 de mai e li poun gagna avans saran pas coumtabilisa!

Adounc, pèr lou moumen, avèn d’un coustat li tres troufèu – As, Rasetaire, Aveni – pèr la Coumissioun dóu Troufèu Taurin e de l’autre lou champiounat dis As Elèi 1, As Elèi 2 e Aveni Espèr pèr la Federacioun. Aquesto d’eici estènt óuficialamen afihado au Menistèri de la Jouvènço e di Jo despièi 1975 sèmblo pamens èstre dins soun bon dre. A l’ouro de vuei, se pau dire pèr lou mens que i’a d’aigo dins lou gaz entre li dos!

De novo de la Federacioun

Pèr vous teni enfourma de la seguido, vous counseie d’ana vèire - se lou poudès - sus ffcc.info. M. Enri Itier, capoulié de la FFCC ié tèn uno crounico TV ounte esplico bèn la situacioun. Ié trouvarés tambèn lou calendié di semano e di mes à veni.

Toujour dóu coustat de la Federacioun, de poun van èstre autreja i rasetaire fin de privilegia la bèuta de si gèste e lou ciéucle marca au sòu pèr li despart di raset es repourta pèr lou moumen.

Vint manado participon au Ficheiroun d’Or. Li courso de la proumiero serìo an douna, lou 5 d’abriéu : Lou Joncas 201 poun - Gillet 193; lou 11 : Nicollin 174 poun - Bon 170; lou 18 : Lautier 192 - Lou Brestalou 182; lou 19 : Blanc 196 - Ribaud 195 e Lagarde 196 - Lou Rose 192.

Camarina a soun estatuo à Senas despièi lou 7 de mars. Aquest an, lou triple Biòu d’Or nous fai sa retirado. Es sourti au Grau dóu Rèi lou 19 d’abriéu, pièi anara à Vau-Verd lou 21 de mai, à Soumèiro lou 28 de Jun, à Bèu-Caire lou 23 de juliet et à Castèu-Reinard lou 12 de setèmbre pèr la darniero fes.

Dève vous faire assaupre lou malur qu’a pica lou rasetaire Roudóufe Roux lou dissate 11 d’abriéu. Sa jouino espouso a defunta dins un terrible aucidènt de la routo qu’a fa dous mort entre Arle e Bello- Gardo. Roudóufe e sis enfant sóufron de la roumpeduro. De segur que sa carriero de rasetaire s’es arrestado aqui.

La sesoun en Eirago

La duberturo de la sesoun dins moun vilage d’Eirago se fara lou dijòu 21 de mai emé uno courso à l’Aveni Espèr (4 ouro de tantost, 8 €). Sourtiran : Franklin e Flaubert de Cuillé - Trelus e Gastaboi de Guillierme - Trimard e Boncoeur de Lautier, que saran raseta pèr Kevin Cartalade, Maumet Chig, Jerèmi Lafare, Dàvi Maurel e Dàvi Moine. Coume d’abitudo, es noste ami Pèire Pancin que n’en sara l’animatour.

Vous souvète uno bono tempourado.