De PACA n’i’a proun!

De PACA n’i’a proun! Es uno sentido que sian forço de l’agué en Prouvènço... PACA d’aqui au journau de FR 3 Mieterrano, PACA d’eila un pau de pertout, PACA sus lou site dóu Counsèu Regiounau de Prouvènço-Aup-Coustiero d’Azur que n’en pòu pas mai, bord qu’es en 1960, qu’aquesto apelacioun fuguè empegado à nosto Regioun...Encaro, fuguè un tèms qu’en i’apoundènt la Corso, l’abreviacioun èro devengudo PACAC...Pèr Michèu Vauzelle, presidènt de nosto Counsèu Regiounau, la coupo, aro, es pleno e memo desboundo!

Fau dire qu’au nostre, i’a un mouloun de gènt que sabon pas ço que vòu dire PACA, n’i’a un mouloun d’autre que lou sabon e que d’ausi PACA de-longo acò ié vèn en òdi, bord que soun, éli, Prouvençau, Aupin vo Niçard!

Michèu Vauzelle, desenant, coume es en demai deputa d’Arle, vòu prendre lou biòu PACA pèr li bano e ié faire crida sebo. Fau dire que n’avèn un, lou Brice Hortefeux, un menistre, que diguè, publicamen, en parlant de la Regioun PACA que degun saup ço qu’es. E qu’emé li nouvèu numerò d’imatriculacioun pèr li veituro (soun en plaço), quouro quaucun vòu agué lou numerò de soun despartamen, i’es empega en dessubre dóu logò de la Regioun, lou sigle PACA...en liogo de Prouvènço-Aup- Coustiero d’Azur, ço que sarié, pèr aro, la legalita...

Alor, Michèu Vauzelle a pres uno decisioun qu’aprouvan d’en plen : vòu cambia lou noum de nosto Regioun, fin d’agué un noum mai simple de prounouncia e de plus èstre óubliga d’emplega PACA.

Nosto pousicioun, à la chourmo di Nouvello e pèr lis Assouciacioun Parlaren, èi simplo : nosto Regioun a un noum PROUVÈNÇO. Es un noum que vèn di Rouman, dóu tèms qu’aquéli d’aqui avien counquista li dos ribo de Rose e crea la Provincia Narbonensis vengudo pièi Provincia Romana.

Fau se faire un pau, e pamens, l’avoucat dóu diable se voulèn un jour n’en sourti, bord que i’a de mounde de counvincre. D’efèt, lou mot Prouvènço a plusiour definicioun que se recuerbon pas toujour :

• * D’un, i’a uno Prouvènço idealo, mistralenco e meme mitico, que se trufo bèn di raro amenistrativo. Es l’ensèn dis encountrado ounte lou mounde vivon soun identita prouvençalo e parlon prouvençau.
• * De dous, la partido que nosto Regioun counsidèro coume estènt la Prouvènço, es la soubro de l’anciano Provincia Romana, em’ en mens si terro de l’autro man de Rose e de l’auto Valèio de Rose. D’aquesto soubro lèvo encaro uno partido de la Coustiero d’Azur (83) e dis Aup (04)...
• * De tres, nosto Regioun, en realita, fedèro tres identita eissido di provincia roumano : la Romana  que d’efèt, avié coume raro lou flume Var e lou pèd-de-mount dis Aup; de l’autro man de Var li Rouman avien crea la Provincia Alpes Maritimae (eiretié : la Coumtea de Niço e vuei lou despartamen dis Aup Marino) e, subre lis Aup, la Provincia Cottianae (eiretié : la Republico dis Escartoun e vuei lou despartamen dis Àutis Aup).

Partènt d’aqui, l’escoumesso sara de counvincre li gènt que soun tóuti de provinciales, adounc de Prouvençau, ciéutadan d’uno regioun poulimorfo que soun identita caup pas, en entié, dins lou Païs d’Arle, meme se tóuti l’amon bèn.

Anen èstre, au mes de jun, au pica de la daio. Mèste Vauzelle, d’efèt, vòu bandi uno counsultacioun poupulàri pèr prepausa au gouvèr de Franço de cambia lou noum de noste Regioun. Vòu pas toumba dins lou toumple coume soun vesin, lou Jòrgi Frèche, qu’a pas reüssi à impausa lou noum Setimanìo en plaço de Lengadò-Roussihoun. Déura teni comte, meme s’a soun idèio darrié la tèsto, dis avejaire dóu mounde e dis elegi despartamen pèr despartamen, ço que sara pas buteto...

Demandan en tóuti nòsti legèire, sòci e ami de Parlaren, de participa en raço à-n-aquelo counsultacioun. Pèr nautre es clar, pòu i’aguè qu’uno soulucioun coume noum de nosto Regioun : PROUVÈNÇO (en francés Provence), coume acò PACA se pourra plus dire.