Lis Edicioun dóu Toulourenc an presenta, à Perno-li-Font, à l'Oustau Fléchier, un libre di chanu de Silveto Gabert e Marìo-Crestino Giraud, enlusi de poulìdi foutò de Roumié Michel. A pèr titre, bèn segur, Le Costume Comtadin. Au fiéu di pajo, se pòu descurbi tout lou gàubi, lou travai e lou saupre-faire ancestrau de nòsti courduriero coumtadino.

Es un libre que fara referènci bord, qu’emé d’autre qu’avèn saluda eici, adus tambèn sa pèiro au clapié de la mantenènço de nòsti tradicioun e de la respelido de l’Identita Prouvençalo e Coumtadino.

La presentacioun s’es ounourado de la presènci de Pèire Gabert (l’ome de Silveto) qu’es en demai proumié conse de Perno-li-Font e de Francés Pantagène, counseié generau de Vaucluso.

Lou biais de se viesti de nòsti rèire es quaucarèn que fau garda, ilustra, embeli e trasmetre i generacioun mountanto.

À Perno-li-Font, ciéuta que fuguè lou sèti dóu baile di comte de Toulouso, marqués de Prouvènço, nòsti bello e gènti Coumtadino sabon bèn que l’aveni apartendra, coume toujour, à-n-aquéli qu’an li pèd e li cambo bèn tanca dins soun terraire, sis us, si coustumo e soun coustume tradiciounau, ço qu’empacho pas de se durbi is autre e sus lou Mounde.

Lou Counservatòri dóu Coustume Coumtadin es à Perno-li-Font, 9 carriero Gambetta (tel. 04 90 66 51 45). Lou libre Le Costume Comtadin se ié pòu croumpa i jour e ouro de duberturo.