I’a de causo que se n’en parlo gaire e pamens!

Es de situacioun que permeton de faire lume sus l’evoulun - prouvouca - de nosto agriculturo tradiciounalo e li dangié que fan courre à l’estamen sanitàri de nòsti poupulacioun. Sabèn tóuti que li nivo de Tchernoubil se soun pas arrestado i poste di gabelou dis Aup pèr demanda l’autourisacioun de travessa Prouvènço e Corso.

Mai ço que s’es passa en Indo, dins li quaranto darniéris annado, es autant dangeirous emé de counsequènci tras que grèvo.

En 1947, l’Indo venguè à l’independènci. Avié uno agriculturo tradiciounalo eficaço, mai que poudié pas rebiha en 20 an lou gast de 200 an de coulounisacioun angleso. En 1966, emé lou crèis de-countùnio de sa poupulacioun, l’Indo couneiguè la carestié. Pèr n’en sourti, soun gouvèr cridè à l’ajudo. Es aqui que lou gouvèr american vouguè bèn ié baia uno ajudo alimentàri mai à coundicioun que lou gouvèr indian acetèsse de s’engaja dins la Revoulucioun Verdo. L’escoumesso èro aquelo : siegue falié leissa creba de fam li poupulacioun, siegue falié abandouna l’agriculturo tradiciounalo pèr emplega de semènço fourestiero em’ un rendemen aut, tant coume lis engrais chimi e li pesticide proudu pèr li multinaciounalo americano.

Lou gouvèr indian, quicha pèr li besoun alimentàri de si poupulacioun, cedè.

Dins li 20 an que seguiguèron, d’Estat indian coume lou Punjab e lou Bengalo couneiguèron uno prousperita suto. Mai, lèu, se veguè lou revès de la medaio : terro counchado pèr lis engrais chimi e li pesticide, poulucioun, agoutage em’ empouisounamen pèr l’arseni di napo freatico, perdo de la bioudiversita agricolo e, counsequènci terriblo de tout acò, uno epidemìo de cancèr. L’OMS (Ourganisacioun Moundialo de la Santa) dis que lou councha de l’aigo pèr l’arseni pourrié deveni, en Indo, au Bengalo, l’empouisounamen couleitiéu lou mai grand de l’Istòri!

Lusour d’espèr dins tout acò : is Estat Uni, 6 estat dóu Sud soun óubliga d’abandouna l’espandimen de desbruiant sus si champ e de tourna emplega de semènço tradiciounalo de soja. La resoun? Vous l’avèn dounado dins noste n° 151 : uno planto terradourenco, l’amaranto, s’es mestissado emé de soja OGM, adounc a fa sa mudacioun e resisto i desbruiant.

En Indo, l’agriculturo e li semènço tradiciounalo reparèisson. Mai fin finalo, lou pres en vido umano sara lourd. Vaqui de que perpensa à prepaus de l’entrouducioun dis OGM au nostre.