Entre Prouvènço e Ceveno, i’avié, antan, de liame ecounoumi estré. I’a ‘gu, segur, lou carboun cevenòu que pèr la ligno Alès-Bèu-Caire, prouvesissié li port de Marsiho e de Touloun. Mai i’a ‘gu, tambèn, lou liame fort de la magnanarié (sericiculture) e dóu tèisse.

Vuei, Reiniero Lefranc, encargado de l’animacioun culturalo dóu Palais di Papo, nous ramento l’epoupèio de la sedo, dis indiano e de la telo denim, dins de vilo coume Avignoun, Nime, Aurenjo, Marsiho.

Acò douno un libre, Soies, indiennes, blue-jeans, superbamen enlusi de foutò, reprouducioun de tablèu, doucumen, carto geougrafico e de moutiéu d’indiano.

Aquesto epoupèio se declino en tres evoucacioun :

* La sedo, d’abord, emé si secrèt, qu’arrivè dóu Levant à l’Age Mejan. Es i Papo d’Avignoun que devèn soun espandido dins lou Miejour di Gaulo, bord que menavon grand trin. Au siècle 13en, dins la regioun d’Anduzo, en Ceveno, Ramoun de Gaussargue èro descoucounaire de magnan e tiraire de sedo. Fasié partido d’uno courpouracioun que faguè la fourtuno d’Anduzo e fournissié Luco, en Italìo, em’ Avignoun, que devenguè l’un di grand cèntre de l’art de la sedo. Flourentin, Venician e Loumbard, que fugissien li bourroulado di republico italiano, s’assoustèron en Avignoun e aduguèron l’amourié blanc, que si fueio nourrissien li magnan.

L’endustrìo de la sedo faguè la fourtuno d’Avignoun, mai tambèn di Ceveno touto e desvouloupè li routo miejournalo de la sedo. L’agrounome Óulivié de Serre, Enri Quatre, Sully, Colbert favourisèron li plantacioun d’amourié. Es li dos darniéri guerro e lou niloun que faguèron cabussa l’emplé de la sedo pèr li vièsti. Vuei lis amourié an despareigu o soun à l’abandoun. E la Coundicioun di Sedo, en Avignoun, sièr pus que de liò d’espetacle dóu Festenau Off en juliet.

L’estùdi es adourna de foutò de magnanarié, de bancels, d’encabanage e de descoucounage di magnan à Sènt-Estève de Valfrancesco e, subre-tout, de foutò de cencho, coutihoun, raubo, debas, vièsti ufanous pourta en Alès vers 1920, tóuti en sedo, qu’apartènon en de couleicioun privado e de musèu.

* Reiniero Lefranc nous meno, pièi, sus la routo dis indiano, aquéstis estofo de coutounado lóugiero qu’arrivavon dis Indo e que li Prouvençalo adóutèron pèr ramplaça si lourd vièsti de lano vo de canebe. Tre 1675, Avignoun, Nime, pièi tóuti li vilo dóu Miejour di Gaulo devenguèron lou brès de l’indianage qu’óucupè, à la fin dóu siècle 17en, 30 % de la poupulacioun de la ciéuta papalo! La modo dis indiano espetè au siècle 18en. Fuguè favourisado pèr l’arrivado de la garanço, emé sa superbo coulour roujo, que Jan Althen entrouduguè sa culturo à Caumount e dins la Coumtat de Venisso. Mai la coucurrènci d’àutri proudu faguè cabussa, emé la revoulucioun endustrialo, la garanço e la fabricacioun d’indiano. Vuei, carriero di Tenchurié, en Avignoun, i’a pus que li rodo brassejant l’aigo de la Sorgo, que remembron lou tèms di fabricant d’indiano. Aquesto endustrìo se mantèn, un pau, à l’entour de Tarascoun e Sant-Estève dóu Gres.

* La darniero evoucacioun de l’autour councernis lou blue-jeans, que sièr à counfeiciouna subretout de braio pourtado, vuei, dins lou mounde entié. I siècle 18en e 19en, Nime emplegavo li 2/3 de sa poupulacioun ativo dins lou tèisse. Li pastre di Ceveno, coume li marin genouvés, se vestissien de cadisset (serge) qu’es uno telo counfourtablo e forço resistènto.

Sis abit èron tenchura de blu dins de tino qu’avien deja servi pèr de prouducioun mai lussuouso e que l’on reviéudavo emé d’indigò. Partènt d’aqui, l’emplé dóu blu, pèr li vièsti de travai, s’espandiguè dins tout lou Miejour. Pièi, emé li grand negouciant uganaud de Nime, gagnè l’Americo, à l’epoco de la Rounsado vers l’Or. Es aqui qu’un jouine Judiéu, Ouscar Levi-Strauss, aguè l’idèio de faire de braio que se poudien pas gausi, emé de telo de cadisset emplegado pèr li tibanèu di bouscaire d’or.